၂. သဗ္ဗညုဘာဝပဉှော

၂. ‘‘ဘန္တေ နာဂသေန၊ ဗုဒ္ဓေါ သဗ္ဗညူ’’တိ? ‘‘အာမ၊ မဟာရာဇ၊ ဘဂဝါ သဗ္ဗညူ၊ န စ ဘဂဝတော သတတံ သမိတံ ဉာဏဒဿနံ ပစ္စုပဋ္ဌိတံ၊ အာဝဇ္ဇနပဋိဗဒ္ဓံ ဘဂဝတော သဗ္ဗညုတဉာဏံ၊ အာဝဇ္ဇိတွာ ယဒိစ္ဆကံ ဇာနာတီ’’တိ. ‘‘တေန ဟိ၊ ဘန္တေ နာဂသေန၊ ဗုဒ္ဓေါ အသဗ္ဗညူတိ. ယဒိ တဿ ပရိယေသနာယ သဗ္ဗညုတဉာဏံ ဟောတီ’’တိ. ‘‘ဝါဟသတံ ခေါ၊ မဟာရာဇ၊ ဝီဟီနံ အဍ္ဎစူဠဉ္စ ဝါဟာ ဝီဟိသတ္တမ္ဗဏာနိ ဒွေ စ တုမ္ဗာ ဧကစ္ဆရာက္ခဏေ ပဝတ္တစိတ္တဿ ဧတ္တကာ ဝီဟီ လက္ခံ ဌပီယမာနာ [ဌပီယမာနေ (သီ. ပီ.)] ပရိက္ခယံ ပရိယာဒါနံ ဂစ္ဆေယျုံ?

‘‘တတြိမေ သတ္တဝိဓာ စိတ္တာ ပဝတ္တန္တိ၊ ယေ တေ၊ မဟာရာဇ၊ သရာဂါ သဒေါသာ သမောဟာ သကိလေသာ အဘာဝိတကာယာ အဘာဝိတသီလာ အဘာဝိတစိတ္တာ အဘာဝိတပညာ၊ တေသံ တံ စိတ္တံ ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? အဘာဝိတတ္တာ စိတ္တဿ. ယထာ၊ မဟာရာဇ၊ ဝံသနာဠဿ ဝိတတဿ ဝိသာလဿ ဝိတ္ထိဏ္ဏဿ သံသိဗ္ဗိတဝိသိဗ္ဗိတဿ သာခါဇဋာဇဋိတဿ အာကဍ္ဎိယန္တဿ ဂရုကံ ဟောတိ အာဂမနံ ဒန္ဓံ. ကိံ ကာရဏာ? သံသိဗ္ဗိတဝိသိဗ္ဗိတတ္တာ သာခါနံ. ဧဝမေဝ ခေါ၊ မဟာရာဇ၊ ယေ တေ သရာဂါ သဒေါသာ သမောဟာ သကိလေသာ အဘာဝိတကာယာ အဘာဝိတသီလာ အဘာဝိတစိတ္တာ အဘာဝိတပညာ၊ တေသံ တံ စိတ္တံ ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? သံသိဗ္ဗိတဝိသိဗ္ဗိတတ္တာ ကိလေသေဟိ၊ ဣဒံ ပဌမံ စိတ္တံ.

‘‘တတြိဒံ ဒုတိယံ စိတ္တံ ဝိဘတ္တမာပဇ္ဇတိ – ယေ တေ၊ မဟာရာဇ၊ သောတာပန္နာ ပိဟိတာပါယာ ဒိဋ္ဌိပ္ပတ္တာ ဝိညာတသတ္ထုသာသနာ၊ တေသံ တံ စိတ္တံ တီသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ. ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? တီသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ. ယထာ၊ မဟာရာဇ၊ ဝံသနာဠဿ တိပဗ္ဗဂဏ္ဌိပရိသုဒ္ဓဿ ဥပရိ သာခါဇဋာဇဋိတဿ အာကဍ္ဎိယန္တဿ ယာဝ တိပဗ္ဗံ တာဝ လဟုကံ ဧတိ၊ တတော ဥပရိ ထဒ္ဓံ. ကိံ ကာရဏာ? ဟေဋ္ဌာ ပရိသုဒ္ဓတ္တာ ဥပရိ သာခါဇဋာဇဋိတတ္တာ. ဧဝမေဝ ခေါ၊ မဟာရာဇ၊ ယေ တေ သောတာပန္နာ ပိဟိတာပါယာ ဒိဋ္ဌိပ္ပတ္တာ ဝိညာတသတ္ထုသာသနာ၊ တေသံ တံ စိတ္တံ တီသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ၊ ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? တီသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ၊ ဣဒံ ဒုတိယံ စိတ္တံ.

‘‘တတြိဒံ တတိယံ စိတ္တံ ဝိဘတ္တမာပဇ္ဇတိ – ယေ တေ၊ မဟာရာဇ၊ သကဒါဂါမိနော၊ ယေသံ ရာဂဒေါသမောဟာ တနုဘူတာ၊ တေသံ တံ စိတ္တံ ပဉ္စသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ၊ ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ပဉ္စသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ. ယထာ၊ မဟာရာဇ၊ ဝံသနာဠဿ ပဉ္စပဗ္ဗဂဏ္ဌိပရိသုဒ္ဓဿ ဥပရိ သာခါဇဋာဇဋိတဿ အာကဍ္ဎိယန္တဿ ယာဝ ပဉ္စပဗ္ဗံ တာဝ လဟုကံ ဧတိ၊ တတော ဥပရိ ထဒ္ဓံ. ကိံ ကာရဏာ? ဟေဋ္ဌာ ပရိသုဒ္ဓတ္တာ ဥပရိ သာခါဇဋာဇဋိတတ္တာ. ဧဝမေဝ ခေါ၊ မဟာရာဇ၊ ယေ တေ သကဒါဂါမိနော၊ ယေသံ ရာဂဒေါသမောဟာ တနုဘူတာ၊ တေသံ တံ စိတ္တံ ပဉ္စသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ၊ ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ပဉ္စသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ၊ ဣဒံ တတိယံ စိတ္တံ.

‘‘တတြိဒံ စတုတ္ထံ စိတ္တံ ဝိဘတ္တမာပဇ္ဇတိ – ယေ တေ၊ မဟာရာဇ၊ အနာဂါမိနော၊ ယေသံ ပဉ္စောရမ္ဘာဂိယာနိ သညောဇနာနိ ပဟီနာနိ၊ တေသံ တံ စိတ္တံ ဒသသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ၊ ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ဒသသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ. ယထာ၊ မဟာရာဇ၊ ဝံသနာဠဿ ဒသပဗ္ဗဂဏ္ဌိပရိသုဒ္ဓဿ ဥပရိ သာခါဇဋာဇဋိတဿ အာကဍ္ဎိယန္တဿ ယာဝ ဒသပဗ္ဗံ တာဝ လဟုကံ ဧတိ၊ တတော ဥပရိ ထဒ္ဓံ. ကိံ ကာရဏာ? ဟေဋ္ဌာ ပရိသုဒ္ဓတ္တာ ဥပရိ သာခါဇဋာဇဋိတတ္တာ. ဧဝမေဝ ခေါ၊ မဟာရာဇ၊ ယေ တေ အနာဂါမိနော၊ ယေသံ ပဉ္စောရမ္ဘာဂိယာနိ သညောဇနာနိ ပဟီနာနိ၊ တေသံ တံ စိတ္တံ ဒသသု ဌာနေသု လဟုကံ ဥပ္ပဇ္ဇတိ လဟုကံ ပဝတ္တတိ၊ ဥပရိဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ဒသသု ဌာနေသု စိတ္တဿ ပရိသုဒ္ဓတ္တာ ဥပရိ ကိလေသာနံ အပ္ပဟီနတ္တာ၊ ဣဒံ စတုတ္ထံ စိတ္တံ.

‘‘တတြိဒံ ပဉ္စမံ စိတ္တံ ဝိဘတ္တမာပဇ္ဇတိ – ယေ တေ၊ မဟာရာဇ၊ အရဟန္တော ခီဏာသဝါ ဓောတမလာ ဝန္တကိလေသာ ဝုသိတဝန္တော ကတကရဏီယာ ဩဟိတဘာရာ အနုပ္ပတ္တသဒတ္ထာ ပရိက္ခီဏဘဝသညောဇနာ ပတ္တပဋိသမ္ဘိဒါ သာဝကဘူမီသု ပရိသုဒ္ဓါ၊ တေသံ တံ စိတ္တံ သာဝကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ၊ ပစ္စေကဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ပရိသုဒ္ဓတ္တာ သာဝကဝိသယေ၊ အပရိသုဒ္ဓတ္တာ ပစ္စေကဗုဒ္ဓဝိသယေ. ယထာ၊ မဟာရာဇ၊ ဝံသနာဠဿ သဗ္ဗပဗ္ဗဂဏ္ဌိပရိသုဒ္ဓဿ အာကဍ္ဎိယန္တဿ လဟုကံ ဟောတိ အာဂမနံ အဒန္ဓံ. ကိံ ကာရဏာ? သဗ္ဗပဗ္ဗဂဏ္ဌိပရိသုဒ္ဓတ္တာ အဂဟနတ္တာ ဝံသဿ. ဧဝမေဝ ခေါ၊ မဟာရာဇ၊ ယေ တေ အရဟန္တော ခီဏာသဝါ ဓောတမလာ ဝန္တကိလေသာ ဝုသိတဝန္တော ကတကရဏီယာ ဩဟိတဘာရာ အနုပ္ပတ္တသဒတ္ထာ ပရိက္ခီဏဘဝသညောဇနာ ပတ္တပဋိသမ္ဘိဒါ သာဝကဘူမီသု ပရိသုဒ္ဓါ၊ တေသံ တံ စိတ္တံ သာဝကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ၊ ပစ္စေကဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ပရိသုဒ္ဓတ္တာ သာဝကဝိသယေ၊ အပရိသုဒ္ဓတ္တာ ပစ္စေကဗုဒ္ဓဝိသယေ၊ ဣဒံ ပဉ္စမံ စိတ္တံ.

‘‘တတြိဒံ ဆဋ္ဌံ စိတ္တံ ဝိဘတ္တမာပဇ္ဇတိ – ယေ တေ၊ မဟာရာဇ၊ ပစ္စေကဗုဒ္ဓါ သယမ္ဘုနော အနာစရိယကာ ဧကစာရိနော ခဂ္ဂဝိသာဏကပ္ပါ သကဝိသယေ ပရိသုဒ္ဓဝိမလစိတ္တာ၊ တေသံ တံ စိတ္တံ သကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ၊ သဗ္ဗညုဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ပရိသုဒ္ဓတ္တာ သကဝိသယေ မဟန္တတ္တာ သဗ္ဗညုဗုဒ္ဓဝိသယဿ. ယထာ၊ မဟာရာဇ၊ ပုရိသော သကဝိသယံ ပရိတ္တံ နဒိံ ရတ္တိမ္ပိ ဒိဝါပိ ယဒိစ္ဆက အစ္ဆမ္ဘိတော ဩတရေယျ၊ အထ ပရတော မဟာသမုဒ္ဒံ ဂမ္ဘီရံ ဝိတ္ထတံ အဂါဓမပါရံ ဒိသွာ ဘာယေယျ၊ ဒန္ဓာယေယျ န ဝိသဟေယျ ဩတရိတုံ. ကိံ ကာရဏာ? တိဏ္ဏတ္တာ [စိဏ္ဏတ္တာ (သီ. သျာ. ပီ.)] သကဝိသယဿ၊ မဟန္တတ္တာ စ မဟာသမုဒ္ဒဿ. ဧဝမေဝ ခေါ၊ မဟာရာဇ၊ ယေ တေ ပစ္စေကဗုဒ္ဓါ သယမ္ဘုနော အနာစရိယကာ ဧကစာရိနော ခဂ္ဂဝိသာဏကပ္ပါ သကဝိသယေ ပရိသုဒ္ဓဝိမလစိတ္တာ၊ တေသံ တံ စိတ္တံ သကဝိသယေ လဟုကံ ဥပ္ပဇ္ဇတိ လဟုကံ ပဝတ္တတိ၊ သဗ္ဗညုဗုဒ္ဓဘူမီသု ဂရုကံ ဥပ္ပဇ္ဇတိ ဒန္ဓံ ပဝတ္တတိ. ကိံ ကာရဏာ? ပရိသုဒ္ဓတ္တာ သကဝိသယေ မဟန္တတ္တာ သဗ္ဗညုဗုဒ္ဓဝိသယဿ၊ ဣဒံ ဆဋ္ဌံ စိတ္တံ.

‘‘တတြိဒံ သတ္တမံ စိတ္တံ ဝိဘတ္တမာပဇ္ဇတိ – ယေ တေ၊ မဟာရာဇ၊ သမ္မာသမ္ဗုဒ္ဓါ သဗ္ဗညုနော ဒသဗလဓရာ စတုဝေသာရဇ္ဇဝိသာရဒါ အဋ္ဌာရသဟိ ဗုဒ္ဓဓမ္မေဟိ သမန္နာဂတာ အနန္တဇိနာ အနာဝရဏဉာဏာ၊ တေသံ တံ စိတ္တံ သဗ္ဗတ္ထ လဟုကံ ဥပ္ပဇ္ဇတိ လဟုကံ ပဝတ္တတိ. ကိံ ကာရဏာ? သဗ္ဗတ္ထ ပရိသုဒ္ဓတ္တာ. အပိ နု ခေါ၊ မဟာရာဇ၊ နာရာစဿ သုဓောတဿ ဝိမလဿ နိဂ္ဂဏ္ဌိဿ သုခုမဓာရဿ အဇိမှဿ အဝင်္ကဿ အကုဋိလဿ ဒဠှစာပသမာရူဠှဿ ခေါမသုခုမေ ဝါ ကပ္ပါသသုခုမေ ဝါ ကမ္ဗလသုခုမေ ဝါ ဗလဝနိပါတိတဿ ဒန္ဓာယိတတ္တံ ဝါ လဂ္ဂနံ ဝါ ဟောတီ’’တိ? ‘‘န ဟိ၊ ဘန္တေ၊ ‘‘ကိံ ကာရဏာ’’? ‘‘သုခုမတ္တာ ဝတ္ထာနံ သုဓောတတ္တာ နာရာစဿ နိပါတဿ စ ဗလဝတ္တာ’’တိ၊ ဧဝမေဝ ခေါ၊ မဟာရာဇ၊ ယေ တေ သမ္မာသမ္ဗုဒ္ဓါ သဗ္ဗညုနော ဒသဗလဓရာ စတုဝေသာရဇ္ဇဝိသာရဒါ အဋ္ဌာရသဟိ ဗုဒ္ဓဓမ္မေဟိ သမန္နာဂတာ အနန္တဇိနာ အနာဝရဏဉာဏာ၊ တေသံ တံ စိတ္တံ သဗ္ဗတ္ထ လဟုကံ ဥပ္ပဇ္ဇတိ လဟုကံ ပဝတ္တတိ. ကိံ ကာရဏာ? သဗ္ဗတ္ထ ပရိသုဒ္ဓတ္တာ၊ ဣဒံ သတ္တမံ စိတ္တံ.

‘‘တတြ၊ မဟာရာဇ၊ ယဒိဒံ သဗ္ဗညုဗုဒ္ဓါနံ စိတ္တံ၊ တံ ဆန္နမ္ပိ စိတ္တာနံ ဂဏနံ အတိက္ကမိတွာ အသင်္ချေယျေန ဂုဏေန ပရိသုဒ္ဓဉ္စ လဟုကဉ္စ. ယသ္မာ စ ဘဂဝတော စိတ္တံ ပရိသုဒ္ဓဉ္စ လဟုကဉ္စ၊ တသ္မာ၊ မဟာရာဇ၊ ဘဂဝါ ယမကပါဋိဟီရံ ဒဿေတိ. ယမကပါဋိဟီရေ၊ မဟာရာဇ၊ ဉာတဗ္ဗံ ဗုဒ္ဓါနံ ဘဂဝန္တာနံ စိတ္တံ ဧဝံ လဟုပရိဝတ္တန္တိ၊ န တတ္ထ သက္ကာ ဥတ္တရိံ ကာရဏံ ဝတ္တုံ၊ တေပိ၊ မဟာရာဇ၊ ပါဋိဟီရာ သဗ္ဗညုဗုဒ္ဓါနံ စိတ္တံ ဥပါဒါယ ဂဏနမ္ပိ သင်္ခမ္ပိ ကလမ္ပိ ကလဘာဂမ္ပိ န ဥပေန္တိ၊ အာဝဇ္ဇနပဋိဗဒ္ဓံ၊ မဟာရာဇ၊ ဘဂဝတော သဗ္ဗညုတဉာဏံ၊ အာဝဇ္ဇေတွာ ယဒိစ္ဆကံ ဇာနာတိ.

‘‘ယထာ၊ မဟာရာဇ၊ ပုရိသော ဟတ္ထေ ဌပိတံ ယံ ကိဉ္စိ ဒုတိယေ ဟတ္ထေ ဌပေယျ ဝိဝဋေန မုခေန ဝါစံ နိစ္ဆာရေယျ၊ မုခဂတံ ဘောဇနံ ဂိလေယျ၊ ဥမ္မီလေတွာ ဝါ နိမီလေယျ၊ နိမီလေတွာ ဝါ ဥမ္မီလေယျ၊ သမိဉ္ဇိတံ ဝါ ဗာဟံ ပသာရေယျ၊ ပသာရိတံ ဝါ ဗာဟံ သမိဉ္ဇေယျ၊ စိရတရံ ဧတံ၊ မဟာရာဇ၊ လဟုတရံ ဘဂဝတော သဗ္ဗညုတဉာဏံ၊ လဟုတရံ အာဝဇ္ဇနံ၊ အာဝဇ္ဇေတွာ ယဒိစ္ဆကံ ဇာနာတိ၊ အာဝဇ္ဇနဝိကလမတ္တကေန န တာဝတာ ဗုဒ္ဓါ ဘဂဝန္တော အသဗ္ဗညုနော နာမ ဟောန္တီ’’တိ.

‘‘အာဝဇ္ဇနမ္ပိ၊ ဘန္တေ နာဂသေန၊ ပရိယေသနာယ ကာတဗ္ဗံ၊ ဣင်္ဃ မံ တတ္ထ ကာရဏေန သညာပေဟီ’’တိ. ‘‘ယထာ၊ မဟာရာဇ၊ ပုရိသဿ အဍ္ဎဿ မဟဒ္ဓနဿ မဟာဘောဂဿ ပဟူတဇာတရူပရဇတဿ ပဟူတဝိတ္တူပကရဏဿ ပဟူတဓနဓညဿ သာလိဝီဟိယဝတဏ္ဍုလတိလမုဂ္ဂမာသပုဗ္ဗဏ္ဏာပရဏ္ဏသပ္ပိတေလနဝနီတခီရဒဓိမဓုဂုဠဖာဏိတာ စ ခဠောပိကုမ္ဘိပီဌရကောဋ္ဌဘာဇနဂတာ ဘဝေယျုံ၊ တဿ စ ပုရိသဿ ပါဟုနကော အာဂစ္ဆေယျ ဘတ္တာရဟော ဘတ္တာဘိကင်္ခီ၊ တဿ စ ဂေဟေ ယံ ရန္ဓံ ဘောဇနံ၊ တံ ပရိနိဋ္ဌိတံ ဘဝေယျ၊ ကုမ္ဘိတော တဏ္ဍုလေ နီဟရိတွာ ဘောဇနံ ရန္ဓေယျ၊ အပိ စ ခေါ သော၊ မဟာရာဇ၊ တာဝတကေန ဘောဇနဝေကလ္လမတ္တကေန အဓနော နာမ ကပဏော နာမ ဘဝေယျာ’’တိ? ‘‘န ဟိ၊ ဘန္တေ၊ စက္ကဝတ္တိရညော ဃရေပိ၊ ဘန္တေ၊ အကာလေ ဘောဇနဝေကလ္လံ ဟောတိ၊ ကိံ ပန ဂဟပတိကဿာ’’တိ? ‘‘ဧဝမေဝ ခေါ၊ မဟာရာဇ၊ တထာဂတဿ အာဝဇ္ဇနဝိကလမတ္တကံ သဗ္ဗညုတဉာဏံ အာဝဇ္ဇေတွာ ယဒိစ္ဆကံ ဇာနာတိ.

‘‘ယထာ ဝါ ပန၊ မဟာရာဇ၊ ရုက္ခော အဿ ဖလိတော ဩဏတဝိနတော ပိဏ္ဍိဘာရဘရိတော၊ န ကိဉ္စိ တတ္ထ ပတိတံ ဖလံ ဘဝေယျ၊ အပိ နု ခေါ သော၊ မဟာရာဇ၊ ရုက္ခော တာဝတကေန ပတိတဖလဝေကလ္လမတ္တကေန အဖလော နာမ ဘဝေယျာ’’တိ? ‘‘န ဟိ၊ ဘန္တေ၊ ပတနပဋိဗဒ္ဓါနိ တာနိ ရုက္ခဖလာနိ၊ ပတိတေ ယဒိစ္ဆကံ လဘတီ’’တိ. ‘‘ဧဝမေဝ ခေါ၊ မဟာရာဇ၊ တထာဂတဿ အာဝဇ္ဇနပဋိဗဒ္ဓံ သဗ္ဗညုတဉာဏံ အာဝဇ္ဇေတွာ ယဒိစ္ဆကံ ဇာနာတီ’’တိ.

‘‘ဘန္တေ နာဂသေန၊ အာဝဇ္ဇေတွာ အာဝဇ္ဇေတွာ ဗုဒ္ဓေါ ယဒိစ္ဆကံ ဇာနာတီ’’တိ? ‘‘အာမ၊ မဟာရာဇ၊ ဘဂဝါ အာဝဇ္ဇေတွာ အာဝဇ္ဇေတွာ ယဒိစ္ဆကံ ဇာနာတီ’’တိ.

‘‘ယထာ၊ မဟာရာဇ၊ စက္ကဝတ္တီ ရာဇာ ယဒါ စက္ကရတနံ သရတိ ‘ဥပေတု မေ စက္ကရတန’န္တိ၊ သရိတေ စက္ကရတနံ ဥပေတိ၊ ဧဝမေဝ ခေါ၊ မဟာရာဇ၊ တထာဂတော အာဝဇ္ဇေတွာ အာဝဇ္ဇေတွာ ယဒိစ္ဆကံ ဇာနာတီ’’တိ. ‘‘ဒဠှံ၊ ဘန္တေ နာဂသေန၊ ကာရဏံ၊ ဗုဒ္ဓေါ သဗ္ဗညူ၊ သမ္ပဋိစ္ဆာမ ဗုဒ္ဓေါ သဗ္ဗညူ’’တိ.

ဗုဒ္ဓသဗ္ဗညုဘာဝပဉှော ဒုတိယော.