၉. ဥတ္တရကုရုကာဒိဂမနပဉှော

၉. ရာဇာ အာဟ ‘‘ဘန္တေ နာဂသေန၊ အတ္ထိ ကောစိ၊ ယော ဣမိနာ သရီရေန ဥတ္တရကုရုံ ဝါ ဂစ္ဆေယျ၊ ဗြဟ္မလောကံ ဝါ၊ အညံ ဝါ ပန ဒီပ’’န္တိ? ‘‘အတ္ထိ၊ မဟာရာဇ၊ ယော ဣမိနာ စာတုမ္မဟာဘူတိကေန ကာယေန ဥတ္တရကုရုံ ဝါ ဂစ္ဆေယျ၊ ဗြဟ္မလောကံ ဝါ၊ အညံ ဝါ ပန ဒီပ’’န္တိ.

‘‘ကထံ၊ ဘန္တေ နာဂသေန၊ ဣမိနာ စာတုမ္မဟာဘူတိကေန ကာယေန ဥတ္တရကုရုံ ဝါ ဂစ္ဆေယျ၊ ဗြဟ္မလောကံ ဝါ၊ အညံ ဝါ ပန ဒီပ’’န္တိ? ‘‘အဘိဇာနာသိ နု၊ တွံ မဟာရာဇ၊ ဣမိဿာ ပထဝိယာ ဝိဒတ္ထိံ ဝါ ရတနံ ဝါ လင်္ဃိတာ’’တိ? ‘‘အာမ၊ ဘန္တေ၊ အဘိဇာနာမိ ‘အဟံ၊ ဘန္တေ နာဂသေန၊ အဋ္ဌပိ ရတနိယော လင်္ဃေမီ’’’တိ. ‘‘ကထံ၊ တွံ မဟာရာဇ၊ အဋ္ဌပိ ရတနိယော လင်္ဃေသီ’’တိ? ‘‘အဟဉှိ၊ ဘန္တေ၊ စိတ္တံ ဥပ္ပါဒေမိ ‘ဧတ္ထ နိပတိဿာမီ’တိ သဟ စိတ္တုပ္ပါဒေန ကာယော မေ လဟုကော ဟောတီ’’တိ. ‘‘ဧဝမေဝ ခေါ၊ မဟာရာဇ၊ ဣဒ္ဓိမာ ဘိက္ခု စေတောဝသိပ္ပတ္တော ကာယံ စိတ္တေ သမာရောပေတွာ စိတ္တဝသေန ဝေဟာသံ ဂစ္ဆတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဥတ္တရကုရုကာဒိဂမနပဉှော နဝမော.