၆. ဗောဇ္ဈင်္ဂပဉှော

၆. ရာဇာ အာဟ ‘‘ကတိ နု ခေါ၊ ဘန္တေ နာဂသေန၊ ဗောဇ္ဈင်္ဂါ’’တိ? ‘‘သတ္တ ခေါ၊ မဟာရာဇ၊ ဗောဇ္ဈင်္ဂါ’’တိ. ‘‘ကတိဟိ ပန၊ ဘန္တေ၊ ဗောဇ္ဈင်္ဂေဟိ ဗုဇ္ဈတီ’’တိ? ‘‘ဧကေန ခေါ၊ မဟာရာဇ၊ ဗောဇ္ဈင်္ဂေန ဗုဇ္ဈတိ ဓမ္မဝိစယသမ္ဗောဇ္ဈင်္ဂေနာ’’တိ. ‘‘အထ ကိဿ နု ခေါ၊ ဘန္တေ၊ ဝုစ္စန္တိ ‘သတ္တ ဗောဇ္ဈင်္ဂါ’’’တိ? ‘‘တံ ကိံ မညသိ၊ မဟာရာဇ၊ အသိ ကောသိယာ ပက္ခိတ္တော အဂ္ဂဟိတော ဟတ္ထေန ဥဿဟတိ ဆေဇ္ဇံ ဆိန္ဒိတု’’န္တိ. ‘‘န ဟိ၊ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ဓမ္မဝိစယသမ္ဗောဇ္ဈင်္ဂေန ဝိနာ ဆဟိ ဗောဇ္ဈင်္ဂေဟိ န ဗုဇ္ဈတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗောဇ္ဈင်္ဂပဉှော ဆဋ္ဌော.