၇. သရာဂဝီတရာဂနာနာကရဏပဉှော

၇. ရာဇာ အာဟ ‘‘ဘန္တေ နာဂသေန၊ ကိံ နာနာကရဏံ သရာဂဿ စ ဝီတရာဂဿ စာ’’တိ? ‘‘ဧကော ခေါ၊ မဟာရာဇ၊ အဇ္ဈောသိတော၊ ဧကော အနဇ္ဈောသိတော’’တိ. ‘‘ကိံ ဧတံ၊ ဘန္တေ၊ အဇ္ဈောသိတော အနဇ္ဈောသိတော နာမာ’’တိ? ‘‘ဧကော ခေါ၊ မဟာရာဇ၊ အတ္ထိကော၊ ဧကော အနတ္ထိကော’’တိ. ‘‘ပဿာမဟံ၊ ဘန္တေ၊ ဧဝရူပံ ယော စ သရာဂေါ၊ ယော စ ဝီတရာဂေါ၊ သဗ္ဗောပေသော သောဘနံ ယေဝ ဣစ္ဆတိ ခါဒနီယံ ဝါ ဘောဇနီယံ ဝါ၊ န ကောစိ ပါပကံ ဣစ္ဆတီ’’တိ. ‘‘အဝီတရာဂေါ ခေါ၊ မဟာရာဇ၊ ရသပဋိသံဝေဒီ စ ရသရာဂပဋိသံဝေဒီ စ ဘောဇနံ ဘုဉ္ဇတိ၊ ဝီတရာဂေါ ပန ရသပဋိသံဝေဒီ ဘောဇနံ ဘုဉ္ဇတိ၊ နော စ ခေါ ရသရာဂပဋိသံဝေဒီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

သရာဂဝီတရာဂနာနာကရဏပဉှော သတ္တမော.