၇. အညကာယသင်္ကမနပဉှော

၇. ရာဇာ အာဟ ‘‘ဘန္တေ နာဂသေန၊ အတ္ထိ ကောစိ သတ္တော ယော ဣမမှာ ကာယာ အညံ ကာယံ သင်္ကမတီ’’တိ? ‘‘န ဟိ၊ မဟာရာဇာ’’တိ. ‘‘ယဒိ၊ ဘန္တေ နာဂသေန၊ ဣမမှာ ကာယာ အညံ ကာယံ သင်္ကမန္တော နတ္ထိ၊ နနု မုတ္တော ဘဝိဿတိ ပါပကေဟိ ကမ္မေဟီ’’တိ? ‘‘အာမ၊ မဟာရာဇ၊ ယဒိ န ပဋိသန္ဒဟေယျ၊ မုတ္တော ဘဝိဿတိ ပါပကေဟိ ကမ္မေဟီတိ၊ ယသ္မာ စ ခေါ၊ မဟာရာဇ၊ ပဋိသန္ဒဟတိ၊ တသ္မာ န ပရိမုတ္တော ပါပကေဟိ ကမ္မေဟီ’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော အညတရဿ ပုရိသဿ အမ္ဗံ အဝဟရေယျ၊ ကိံ သော ဒဏ္ဍပ္ပတ္တော ဘဝေယျာ’’တိ? ‘‘အာမ၊ ဘန္တေ၊ ဒဏ္ဍပ္ပတ္တော ဘဝေယျာ’’တိ. ‘‘န ခေါ သော၊ မဟာရာဇ၊ တာနိ အမ္ဗာနိ အဝဟရိ၊ ယာနိ တေန ရောပိတာနိ၊ ကသ္မာ ဒဏ္ဍပ္ပတ္တော ဘဝေယျာ’’တိ? ‘‘တာနိ၊ ဘန္တေ၊ အမ္ဗာနိ နိဿာယ ဇာတာနိ၊ တသ္မာ ဒဏ္ဍပ္ပတ္တော ဘဝေယျာ’’တိ. ‘‘ဧဝမေဝ ခေါ၊ မဟာရာဇ၊ ဣမိနာ နာမရူပေန ကမ္မံ ကရောတိ သောဘနံ ဝါ အသောဘနံ ဝါ၊ တေန ကမ္မေန အညံ နာမရူပံ ပဋိသန္ဒဟတိ၊ တသ္မာ န ပရိမုတ္တော ပါပကေဟိ ကမ္မေဟီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

အညကာယသင်္ကမနပဉှော သတ္တမော.