၁. ဗုဒ္ဓဿ အတ္ထိနတ္ထိဘာဝပဉှော

၁. ရာဇာ အာဟ ‘‘ဘန္တေ နာဂသေန၊ ဗုဒ္ဓေါ တယာ ဒိဋ္ဌော’’တိ? ‘‘န ဟိ၊ မဟာရာဇာ’’တိ. ‘‘အထ တေ အာစရိယေဟိ ဗုဒ္ဓေါ ဒိဋ္ဌော’’တိ? ‘‘န ဟိ၊ မဟာရာဇာ’’တိ. ‘‘တေန ဟိ၊ ဘန္တေ နာဂသေန၊ နတ္ထိ ဗုဒ္ဓေါ’’တိ. ‘‘ကိံ ပန၊ မဟာရာဇ၊ ဟိမဝတိ ဦဟာ နဒီ တယာ ဒိဋ္ဌာ’’တိ? ‘‘န ဟိ၊ ဘန္တေ’’တိ. ‘‘အထ တေ ပိတရာ ဦဟာ နဒီ ဒိဋ္ဌာ’’တိ? ‘‘န ဟိ၊ ဘန္တေ’’တိ. ‘‘တေန ဟိ၊ မဟာရာဇ၊ နတ္ထိ ဦဟာ နဒီ’’တိ. ‘‘အတ္ထိ၊ ဘန္တေ၊ ကိဉ္စာပိ မယာ ဦဟာ နဒီ န ဒိဋ္ဌာ၊ ပိတရာပိ မေ ဦဟာ နဒီ န ဒိဋ္ဌာ၊ အပိ စ အတ္ထိ ဦဟာ နဒီ’’တိ. ‘‘ဧဝမေဝ ခေါ၊ မဟာရာဇ၊ ကိဉ္စာပိ မယာ ဘဂဝါ န ဒိဋ္ဌော၊ အာစရိယေဟိပိ မေ ဘဂဝါ န ဒိဋ္ဌော၊ အပိ စ အတ္ထိ ဘဂဝါ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဗုဒ္ဓဿ အတ္ထိနတ္ထိဘာဝပဉှော ပဌမော.