၁၀. သညာလက္ခဏပဉှော

၁၀. ‘‘ဘန္တေ နာဂသေန၊ ကိံလက္ခဏာ သညာ’’တိ? ‘‘သဉ္ဇာနနလက္ခဏာ၊ မဟာရာဇ၊ သညာ. ကိံ သဉ္ဇာနာတိ? နီလမ္ပိ သဉ္ဇာနာတိ၊ ပီတမ္ပိ သဉ္ဇာနာတိ၊ လောဟိတမ္ပိ သဉ္ဇာနာတိ၊ ဩဒါတမ္ပိ သဉ္ဇာနာတိ၊ မဉ္ဇိဋ္ဌမ္ပိ [မဉ္ဇေဋ္ဌမ္ပိ (သီ. ပီ.)] သဉ္ဇာနာတိ. ဧဝံ ခေါ၊ မဟာရာဇ၊ သဉ္ဇာနနလက္ခဏာ သညာ’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ရညော ဘဏ္ဍာဂါရိကော ဘဏ္ဍာဂါရံ ပဝိသိတွာ နီလပီတလောဟိတောဒါတမဉ္ဇိဋ္ဌာနိ [မဉ္ဇေဋ္ဌာနိ (သီ. ပီ.)] ရာဇဘောဂါနိ ရူပါနိ ပဿိတွာ သဉ္ဇာနာတိ. ဧဝံ ခေါ၊ မဟာရာဇ၊ သဉ္ဇာနနလက္ခဏာ သညာ’’တိ.

‘‘ကလ္လောသိ၊ ဘန္တေ နာဂသေနာ’’တိ.

သညာလက္ခဏပဉှော ဒသမော.