၂. အဒ္ဓါနဝဂ္ဂေါ

၁. ဓမ္မသန္တတိပဉှော

၁. ရာဇာ အာဟ ‘‘ဘန္တေ နာဂသေန၊ ယော ဥပ္ပဇ္ဇတိ၊ သော ဧဝ သော၊ ဥဒါဟု အညော’’တိ? ထေရော အာဟ ‘‘န စ သော၊ န စ အညော’’တိ.

‘‘ဩပမ္မံ ကရောဟီ’’တိ. ‘‘တံ ကိံ မညသိ၊ မဟာရာဇ၊ ယဒါ တွံ ဒဟရော တရုဏော မန္ဒော ဥတ္တာနသေယျကော အဟောသိ၊ သော ယေဝ တွံ ဧတရဟိ မဟန္တော’’တိ? ‘‘န ဟိ၊ ဘန္တေ၊ အညော သော ဒဟရော တရုဏော မန္ဒော ဥတ္တာနသေယျကော အဟောသိ၊ အညော အဟံ ဧတရဟိ မဟန္တော’’တိ. ‘‘ဧဝံ သန္တေ ခေါ၊ မဟာရာဇ၊ မာတာတိပိ န ဘဝိဿတိ၊ ပိတာတိပိ န ဘဝိဿတိ၊ အာစရိယောတိပိ န ဘဝိဿတိ၊ သိပ္ပဝါတိပိ န ဘဝိဿတိ၊ သီလဝါတိပိ န ဘဝိဿတိ၊ ပညဝါတိပိ န ဘဝိဿတိ. ကိံ နု ခေါ၊ မဟာရာဇ၊ အညာ ဧဝ ကလလဿ မာတာ၊ အညာ အဗ္ဗုဒဿ မာတာ၊ အညာ ပေသိယာ မာတာ၊ အညာ ဃနဿ မာတာ၊ အညာ ခုဒ္ဒကဿ မာတာ၊ အညာ မဟန္တဿ မာတာ၊ အညော သိပ္ပံ သိက္ခတိ၊ အညော သိက္ခိတော ဘဝတိ၊ အညော ပါပကမ္မံ ကရောတိ၊ အညဿ ဟတ္ထပါဒါ ဆိဇ္ဇန္တီ’’တိ? ‘‘န ဟိ၊ ဘန္တေ. တွံ ပန၊ ဘန္တေ၊ ဧဝံ ဝုတ္တေ ကိံ ဝဒေယျာသီ’’တိ? ထေရော အာဟ ‘‘အဟညေဝ ခေါ၊ မဟာရာဇ၊ ဒဟရော အဟောသိံ တရုဏော မန္ဒော ဥတ္တာနသေယျကော၊ အဟညေဝ ဧတရဟိ မဟန္တော၊ ဣမမေဝ ကာယံ နိဿာယ သဗ္ဗေ တေ ဧကသင်္ဂဟိတာ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော ပဒီပံ ပဒီပေယျ၊ ကိံ သော သဗ္ဗရတ္တိံ ပဒီပေယျာ’’တိ? ‘‘အာမ၊ ဘန္တေ၊ သဗ္ဗရတ္တိံ ပဒီပေယျာ’’တိ. ‘‘ကိံ နု ခေါ၊ မဟာရာဇ၊ ယာ ပုရိမေ ယာမေ အစ္စိ၊ သာ မဇ္ဈိမေ ယာမေ အစ္စီ’’တိ? ‘‘န ဟိ ဘန္တေ’’တိ. ‘‘ယာ မဇ္ဈိမေ ယာမေ အစ္စိ၊ သာ ပစ္ဆိမေ ယာမေ အစ္စီ’’တိ? ‘‘န ဟိ ဘန္တေ’’တိ. ‘‘ကိံ နု ခေါ၊ မဟာရာဇ၊ အညော သော အဟောသိ ပုရိမေ ယာမေ ပဒီပေါ၊ အညော မဇ္ဈိမေ ယာမေ ပဒီပေါ၊ အညော ပစ္ဆိမေ ယာမေ ပဒီပေါ’’တိ? ‘‘န ဟိ ဘန္တေ၊ တံ ယေဝ နိဿာယ သဗ္ဗရတ္တိံ ပဒီပိတော’’တိ. ‘‘ဧဝမေဝ ခေါ၊ မဟာရာဇ၊ ဓမ္မသန္တတိ သန္ဒဟတိ၊ အညော ဥပ္ပဇ္ဇတိ၊ အညော နိရုဇ္ဈတိ၊ အပုဗ္ဗံ အစရိမံ ဝိယ သန္ဒဟတိ၊ တေန န စ သော၊ န စ အညော၊ ပုရိမဝိညာဏေ ပစ္ဆိမဝိညာဏံ သင်္ဂဟံ ဂစ္ဆတီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ခီရံ ဒုယှမာနံ ကာလန္တရေန ဒဓိ ပရိဝတ္တေယျ၊ ဒဓိတော နဝနီတံ၊ နဝနီတတော ဃတံ ပရိဝတ္တေယျ၊ ယော နု ခေါ၊ မဟာရာဇ၊ ဧဝံ ဝဒေယျ ‘ယံ ယေဝ ခီရံ တံ ယေဝ ဒဓိ၊ ယံ ယေဝ ဒဓိ တံ ယေဝ နဝနီတံ၊ ယံ ယေဝ နဝနီတံ တံ ယေဝ ဃတ’န္တိ၊ သမ္မာ နု ခေါ သော၊ မဟာရာဇ၊ ဝဒမာနော ဝဒေယျာ’’တိ? ‘‘န ဟိ ဘန္တေ၊ တံယေဝ နိဿာယ သမ္ဘူတ’’န္တိ. ‘‘ဧဝမေဝ ခေါ၊ မဟာရာဇ၊ ဓမ္မသန္တတိ သန္ဒဟတိ၊ အညော ဥပ္ပဇ္ဇတိ၊ အညော နိရုဇ္ဈတိ၊ အပုဗ္ဗံ အစရိမံ ဝိယ သန္ဒဟတိ၊ တေန န စ သော၊ န စ အညော၊ ပုရိမဝိညာဏေ ပစ္ဆိမဝိညာဏံ သင်္ဂဟံ ဂစ္ဆတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဓမ္မသန္တတိပဉှော ပဌမော.

၂. ပဋိသန္ဒဟနပဉှော

၂. ရာဇာ အာဟ ‘‘ဘန္တေ နာဂသေန၊ ယော န ပဋိသန္ဒဟတိ၊ ဇာနာတိ သော ‘န ပဋိသန္ဒဟိဿာမီ’တိ? ‘‘အာမ၊ မဟာရာဇ၊ ယော န ပဋိသန္ဒဟတိ၊ ဇာနာတိ သော ‘န ပဋိသန္ဒဟိဿာမီ’တိ. ‘‘ကထံ၊ ဘန္တေ၊ ဇာနာတီ’’တိ? ‘‘ယော ဟေတု ယော ပစ္စယော၊ မဟာရာဇ၊ ပဋိသန္ဒဟနာယ၊ တဿ ဟေတုဿ တဿ ပစ္စယဿ ဥပရမာ ဇာနာတိ သော ‘န ပဋိသန္ဒဟိဿာမီ’’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကဿကော ဂဟပတိကော ကသိတွာ စ ဝပိတွာ စ ဓညာဂါရံ ပရိပူရေယျ. သော အပရေန သမယေန နေဝ ကဿေယျ န ဝပ္ပေယျ၊ ယထာသမ္ဘတဉ္စ ဓညံ ပရိဘုဉ္ဇေယျ ဝါ ဝိသဇ္ဇေယျ ဝါ ယထာ ပစ္စယံ ဝါ ကရေယျ၊ ဇာနေယျ သော၊ မဟာရာဇ၊ ကဿကော ဂဟပတိကော ‘န မေ ဓညာဂါရံ ပရိပူရေဿတီ’တိ? ‘‘အာမ၊ ဘန္တေ၊ ဇာနေယျာ’’တိ. ‘‘ကထံ ဇာနေယျာ’’တိ? ‘‘ယော ဟေတု ယော ပစ္စယော ဓညာဂါရဿ ပရိပူရဏာယ၊ တဿ ဟေတုဿ တဿ ပစ္စယဿ ဥပရမာ ဇာနာတိ ‘န မေ ဓညာဂါရံ ပရိပူရေဿတီ’’’တိ. ‘‘ဧဝမေဝ ခေါ၊ မဟာရာဇ၊ ယော ဟေတု ယော ပစ္စယော ပဋိသန္ဒဟနာယ၊ တဿ ဟေတုဿ တဿ ပစ္စယဿ ဥပရမာ ဇာနာတိ သော ‘န ပဋိသန္ဒဟိဿာမီ’တိ.

‘‘ကလ္လောသိ၊ ဘန္တေ နာဂသေနာ’’တိ.

ပဋိသန္ဒဟနပဉှော ဒုတိယော.

၃. ဉာဏပညာပဉှော

၃. ရာဇာ အာဟ ‘‘ဘန္တေ နာဂသေန၊ ယဿ ဉာဏံ ဥပ္ပန္နံ၊ တဿ ပညာ ဥပ္ပန္နာ’’တိ? ‘‘အာမ၊ မဟာရာဇ၊ ယဿ ဉာဏံ ဥပ္ပန္နံ၊ တဿ ပညာ ဥပ္ပန္နာ’’တိ. ‘‘ကိံ၊ ဘန္တေ၊ ယညေဝ ဉာဏံ သာ ယေဝ ပညာ’’တိ? ‘‘အာမ၊ မဟာရာဇ၊ ယညေဝ ဉာဏံ သာ ယေဝ ပညာ’’တိ. ‘‘ယဿ ပန၊ ဘန္တေ၊ တညေဝ ဉာဏံ သာ ယေဝ ပညာ ဥပ္ပန္နာ၊ ကိံ သမ္မုယှေယျ သော၊ ဥဒါဟု န သမ္မုယှေယျာ’’တိ? ‘‘ကတ္ထစိ၊ မဟာရာဇ၊ သမ္မုယှေယျ၊ ကတ္ထစိ န သမ္မုယှေယျာ’’တိ. ‘‘ကုဟိံ၊ ဘန္တေ၊ သမ္မုယှေယျာ’’တိ? ‘‘အညာတပုဗ္ဗေသု ဝါ၊ မဟာရာဇ၊ သိပ္ပဋ္ဌာနေသု၊ အဂတပုဗ္ဗာယ ဝါ ဒိသာယ၊ အဿုတပုဗ္ဗာယ ဝါ နာမပညတ္တိယာ သမ္မုယှေယျာ’’တိ. ‘‘ကုဟိံ န သမ္မုယှေယျာ’’တိ? ‘‘ယံ ခေါ ပန၊ မဟာရာဇ၊ တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တဟိံ န သမ္မုယှေယျာ’’တိ. ‘‘မောဟော ပနဿ၊ ဘန္တေ၊ ကုဟိံ ဂစ္ဆတီ’’တိ? ‘‘မောဟော ခေါ၊ မဟာရာဇ၊ ဉာဏေ ဥပ္ပန္နမတ္တေ တတ္ထေဝ နိရုဇ္ဈတီ’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော အန္ဓကာရဂေဟေ ပဒီပံ အာရောပေယျ၊ တတော အန္ဓကာရော နိရုဇ္ဈေယျ၊ အာလောကော ပါတုဘဝေယျ. ဧဝမေဝ ခေါ၊ မဟာရာဇ၊ ဉာဏေ ဥပ္ပန္နမတ္တေ မောဟော တတ္ထေဝ နိရုဇ္ဈတီ’’တိ.

‘‘ပညာ ပန၊ ဘန္တေ၊ ကုဟိံ ဂစ္ဆတီ’’တိ? ‘‘ပညာပိ ခေါ၊ မဟာရာဇ၊ သကိစ္စယံ ကတွာ တတ္ထေဝ နိရုဇ္ဈတိ၊ ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တံ န နိရုဇ္ဈတီ’’တိ.

‘‘ဘန္တေ နာဂသေန၊ ယံ ပနေတံ ဗြူသိ ‘ပညာ သကိစ္စယံ ကတွာ တတ္ထေဝ နိရုဇ္ဈတိ၊ ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တံ န နိရုဇ္ဈတီ’တိ၊ တဿ ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ယော ကောစိ ပုရိသော ရတ္တိံ လေခံ ပေသေတုကာမော လေခကံ ပက္ကောသာပေတွာ ပဒီပံ အာရောပေတွာ လေခံ လိခါပေယျ၊ လိခိတေ ပန လေခေ ပဒီပံ ဝိဇ္ဈာပေယျ၊ ဝိဇ္ဈာပိတေပိ ပဒီပေ လေခံ န ဝိနဿေယျ. ဧဝမေဝ ခေါ၊ မဟာရာဇ၊ ပညာ သကိစ္စယံ ကတွာ တတ္ထေဝ နိရုဇ္ဈတိ၊ ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တံ န နိရုဇ္ဈတီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ပုရတ္ထိမေသု ဇနပဒေသု မနုဿာ အနုဃရံ ပဉ္စ ပဉ္စ ဥဒကဃဋကာနိ ဌပေန္တိ အာလိမ္ပနံ ဝိဇ္ဈာပေတုံ၊ ဃရေ ပဒိတ္တေ တာနိ ပဉ္စ ဥဒကဃဋကာနိ ဃရဿူပရိ ခိပန္တိ၊ တတော အဂ္ဂိ ဝိဇ္ဈာယတိ၊ ကိံ နု ခေါ၊ မဟာရာဇ၊ တေသံ မနုဿာနံ ဧဝံ ဟောတိ ‘ပုန တေဟိ ဃဋေဟိ ဃဋကိစ္စံ ကရိဿာမာ’’’တိ? ‘‘န ဟိ၊ ဘန္တေ၊ အလံ တေဟိ ဃဋေဟိ၊ ကိံ တေဟိ ဃဋေဟီ’’တိ? ‘‘ယထာ၊ မဟာရာဇ၊ ပဉ္စ ဥဒကဃဋကာနိ၊ ဧဝံ ပဉ္စိန္ဒြိယာနိ ဒဋ္ဌဗ္ဗာနိ သဒ္ဓိန္ဒြိယံ ဝီရိယိန္ဒြိယံ သတိန္ဒြိယံ သမာဓိန္ဒြိယံ ပညိန္ဒြိယံ. ယထာ တေ မနုဿာ၊ ဧဝံ ယောဂါဝစရော ဒဋ္ဌဗ္ဗော. ယထာ အဂ္ဂိ၊ ဧဝံ ကိလေသာ ဒဋ္ဌဗ္ဗာ. ယထာ ပဉ္စဟိ ဥဒကဃဋကေဟိ အဂ္ဂိ ဝိဇ္ဈာပီယတိ၊ ဧဝံ ပဉ္စိန္ဒြိယေဟိ ကိလေသာ ဝိဇ္ဈာပိယန္တိ၊ ဝိဇ္ဈာပိတာပိ ကိလေသာ န ပုန သမ္ဘဝန္တိ. ဧဝမေဝ ခေါ၊ မဟာရာဇ၊ ပညာ သကိစ္စယံ ကတွာ တတ္ထေဝ နိရုဇ္ဈတိ၊ ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တံ န နိရုဇ္ဈတီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ဝေဇ္ဇော ပဉ္စမူလဘေသဇ္ဇာနိ ဂဟေတွာ ဂိလာနကံ ဥပသင်္ကမိတွာ တာနိ ပဉ္စမူလဘေသဇ္ဇာနိ ပိသိတွာ [ပိံသိတွာ (သီ. ပီ.)] ဂိလာနကံ ပါယေယျ၊ တေဟိ စ ဒေါသာ နိဒ္ဓမေယျုံ၊ ကိံ နု ခေါ၊ မဟာရာဇ၊ တဿ ဝေဇ္ဇဿ ဧဝံ ဟောတိ ‘ပုန တေဟိ ပဉ္စမူလဘေသဇ္ဇေဟိ ဘေသဇ္ဇကိစ္စံ ကရိဿာမီ’’’တိ? ‘‘န ဟိ၊ ဘန္တေ၊ အလံ တေဟိ ပဉ္စမူလဘေသဇ္ဇေဟိ၊ ကိံ တေဟိ ပဉ္စမူလဘေသဇ္ဇေဟီ’’တိ? ‘‘ယထာ၊ မဟာရာဇ၊ ပဉ္စမူလဘေသဇ္ဇာနိ၊ ဧဝံ ပဉ္စိန္ဒြိယာနိ ဒဋ္ဌဗ္ဗာနိ သဒ္ဓိန္ဒြိယံ ဝီရိယိန္ဒြိယံ သတိန္ဒြိယံ သမာဓိန္ဒြိယံ ပညိန္ဒြိယံ၊ ယထာ ဝေဇ္ဇော၊ ဧဝံ ယောဂါဝစရော ဒဋ္ဌဗ္ဗော. ယထာ ဗျာဓိ၊ ဧဝံ ကိလေသာ ဒဋ္ဌဗ္ဗာ. ယထာ ဗျာဓိတော ပုရိသော၊ ဧဝံ ပုထုဇ္ဇနော ဒဋ္ဌဗ္ဗော. ယထာ ပဉ္စမူလဘေသဇ္ဇေဟိ ဂိလာနဿ ဒေါသာ နိဒ္ဓန္တာ၊ ဒေါသေ နိဒ္ဓန္တေ ဂိလာနော အရောဂေါ ဟောတိ၊ ဧဝံ ပဉ္စိန္ဒြိယေဟိ ကိလေသာ နိဒ္ဓမီယန္တိ၊ နိဒ္ဓမိတာ စ ကိလေသာ န ပုန သမ္ဘဝန္တိ. ဧဝမေဝ ခေါ၊ မဟာရာဇ၊ ပညာ သကိစ္စယံ ကတွာ တတ္ထေဝ နိရုဇ္ဈတိ၊ ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တံ န နိရုဇ္ဈတီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ သင်္ဂါမာဝစရော ယောဓော ပဉ္စ ကဏ္ဍာနိ ဂဟေတွာ သင်္ဂါမံ ဩတရေယျ ပရသေနံ ဝိဇေတုံ၊ သော သင်္ဂါမဂတော တာနိ ပဉ္စ ကဏ္ဍာနိ ခိပေယျ၊ တေဟိ စ ပရသေနာ ဘိဇ္ဇေယျ၊ ကိံ နု ခေါ၊ မဟာရာဇ၊ တဿ သင်္ဂါမာဝစရဿ ယောဓဿ ဧဝံ ဟောတိ ‘ပုန တေဟိ ကဏ္ဍေဟိ ကဏ္ဍကိစ္စံ ကရိဿာမီ’’’တိ? ‘‘န ဟိ၊ ဘန္တေ၊ အလံ တေဟိ ကဏ္ဍေဟိ၊ ကိံ တေဟိ ကဏ္ဍေဟီ’’တိ? ‘‘ယထာ၊ မဟာရာဇ၊ ပဉ္စ ကဏ္ဍာနိ၊ ဧဝံ ပဉ္စိန္ဒြိယာနိ ဒဋ္ဌဗ္ဗာနိ သဒ္ဓိန္ဒြိယံ ဝီရိယိန္ဒြိယံ သတိန္ဒြိယံ သမာဓိန္ဒြိယံ ပညိန္ဒြိယံ. ယထာ၊ မဟာရာဇ၊ သင်္ဂါမာဝစရော ယောဓော၊ ဧဝံ ယောဂါဝစရော ဒဋ္ဌဗ္ဗော. ယထာ ပရသေနာ၊ ဧဝံ ကိလေသာ ဒဋ္ဌဗ္ဗာ. ယထာ ပဉ္စဟိ ကဏ္ဍေဟိ ပရသေနာ ဘိဇ္ဇတိ၊ ဧဝံ ပဉ္စိန္ဒြိယေဟိ ကိလေသာ ဘိဇ္ဇန္တိ၊ ဘဂ္ဂါ စ ကိလေသာ န ပုန သမ္ဘဝန္တိ. ဧဝမေဝ ခေါ၊ မဟာရာဇ၊ ပညာ သကိစ္စယံ ကတွာ တတ္ထေဝ နိရုဇ္ဈတိ၊ ယံ ပန တာယ ပညာယ ကတံ ‘အနိစ္စ’န္တိ ဝါ ‘ဒုက္ခ’န္တိ ဝါ ‘အနတ္တာ’တိ ဝါ၊ တံ န နိရုဇ္ဈတီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဉာဏပညာပဉှော တတိယော.

၄. ပဋိသန္ဒဟနပုဂ္ဂလဝေဒိယနပဉှော

၄. ရာဇာ အာဟ ‘‘ဘန္တေ နာဂသေန၊ ယော န ပဋိသန္ဒဟတိ၊ ဝေဒေတိ သော ကိဉ္စိ ဒုက္ခံ ဝေဒန’’န္တိ? ထေရော အာဟ ‘‘ကိဉ္စိ ဝေဒေတိ၊ ကိဉ္စိ န ဝေဒေတီ’’တိ. ‘‘ကိံ ဝေဒေတိ၊ ကိံ န ဝေဒေတီ’’တိ? ‘‘ကာယိကံ၊ မဟာရာဇ၊ ဝေဒနံ ဝေဒေတိ၊ စေတသိကံ ဝေဒနံ န ဝေဒေတီ’’တိ. ‘‘ကထံ၊ ဘန္တေ၊ ကာယိကံ ဝေဒနံ ဝေဒေတိ၊ ကထံ စေတသိကံ ဝေဒနံ န ဝေဒေတီ’’တိ? ‘‘ယော ဟေတု ယော ပစ္စယော ကာယိကာယ ဒုက္ခဝေဒနာယ ဥပ္ပတ္တိယာ၊ တဿ ဟေတုဿ တဿ ပစ္စယဿ အနုပရမာ ကာယိကံ ဒုက္ခဝေဒနံ ဝေဒေတိ၊ ယော ဟေတု ယော ပစ္စယော စေတသိကာယ ဒုက္ခဝေဒနာယ ဥပ္ပတ္တိယာ၊ တဿ ဟေတုဿ တဿ ပစ္စယဿ ဥပရမာ စေတသိကံ ဒုက္ခဝေဒနံ န ဝေဒေတိ. ဘာသိတမ္ပေတံ၊ မဟာရာဇ၊ ဘဂဝတာ – ‘သော ဧကံ ဝေဒနံ ဝေဒေတိ ကာယိကံ န စေတသိက’’’န္တိ.

‘‘ဘန္တေ နာဂသေန၊ ယော ဒုက္ခံ ဝေဒနံ ဝေဒေတိ၊ ကသ္မာ သော န ပရိနိဗ္ဗာယတီ’’တိ? ‘‘နတ္ထိ၊ မဟာရာဇ၊ အရဟတော အနုနယော ဝါ ပဋိဃော ဝါ၊ န စ အရဟန္တော အပက္ကံ ပါတေန္တိ ပရိပါကံ အာဂမေန္တိ ပဏ္ဍိတာ. ဘာသိတမ္ပေတံ၊ မဟာရာဇ၊ ထေရေန သာရိပုတ္တေန ဓမ္မသေနာပတိနာ –

‘‘‘နာဘိနန္ဒာမိ မရဏံ၊ နာဘိနန္ဒာမိ ဇီဝိတံ၊

ကာလဉ္စ ပဋိကင်္ခါမိ၊ နိဗ္ဗိသံ ဘတကော ယထာ.

‘‘‘နာဘိနန္ဒာမိ မရဏံ၊ နာဘိနန္ဒာမိ ဇီဝိတံ၊

ကာလဉ္စ ပဋိကင်္ခါမိ၊ သမ္ပဇာနော ပတိဿတော’’’တိ.

‘‘ကလ္လောသိ၊ ဘန္တေ နာဂသေနာ’’တိ [ပဿ ထေရဂါ. ၆၅၄].

ပဋိသန္ဒဟနပုဂ္ဂလဝေဒိယနပဉှော စတုတ္ထော.

၅. ဝေဒနာပဉှော

၅. ရာဇာ အာဟ ‘‘ဘန္တေ နာဂသေန၊ သုခါ ဝေဒနာ ကုသလာ ဝါ အကုသလာ ဝါ အဗျာကတာ ဝါ’’တိ? ‘‘သိယာ၊ မဟာရာဇ၊ ကုသလာ၊ သိယာ အကုသလာ၊ သိယာ အဗျာကတာ’’တိ. ‘‘ယဒိ၊ ဘန္တေ၊ ကုသလာ န ဒုက္ခာ၊ ယဒိ ဒုက္ခာ န ကုသလာ၊ ကုသလံ ဒုက္ခန္တိ နုပ္ပဇ္ဇတီ’’တိ. ‘‘တံ ကိံ မညသိ၊ မဟာရာဇ၊ ဣဓ ပုရိသဿ ဟတ္ထေ တတ္တံ အယောဂုဠံ နိက္ခိပေယျ၊ ဒုတိယေ ဟတ္ထေ သီတံ ဟိမပိဏ္ဍံ နိက္ခိပေယျ၊ ကိံ နု ခေါ၊ မဟာရာဇ၊ ဥဘောပိ တေ ဒဟေယျု’’န္တိ? ‘‘အာမ၊ ဘန္တေ၊ ဥဘောပိ တေ ဒဟေယျု’’န္တိ. ‘‘ကိံ နု ခေါ၊ တေ မဟာရာဇ၊ ဥဘောပိ ဥဏှာ’’တိ? ‘‘န ဟိ ဘန္တေ’’တိ. ‘‘ကိံ ပန တေ၊ မဟာရာဇ၊ ဥဘောပိ သီတလာ’’တိ? ‘‘န ဟိ ဘန္တေ’’တိ. ‘‘အာဇာနာဟိ နိဂ္ဂဟံ ယဒိ တတ္တံ ဒဟတိ၊ န စ တေ ဥဘောပိ ဥဏှာ၊ တေန နုပ္ပဇ္ဇတိ. ယဒိ သီတလံ ဒဟတိ၊ န စ တေ ဥဘောပိ သီတလာ၊ တေန နုပ္ပဇ္ဇတိ. ကိဿ ပန တေ၊ မဟာရာဇ၊ ဥဘောပိ ဒဟန္တိ၊ န စ တေ ဥဘောပိ ဥဏှာ၊ န စ တေ ဥဘောပိ သီတလာ? ဧကံ ဥဏှံ၊ ဧကံ သီတလံ၊ ဥဘောပိ တေ ဒဟန္တိ၊ တေန နုပ္ပဇ္ဇတီ’’တိ. ‘‘နာဟံ ပဋိဗလော တယာ ဝါဒိနာ သဒ္ဓိံ သလ္လပိတုံ၊ သာဓု အတ္ထံ ဇပ္ပေဟီ’’တိ. တတော ထေရော အဘိဓမ္မသံယုတ္တာယ ကထာယ ရာဇာနံ မိလိန္ဒံ သညာပေသိ –

‘‘ဆယိမာနိ၊ မဟာရာဇ၊ ဂေဟနိဿိတာနိ သောမနဿာနိ၊ ဆ နေက္ခမ္မနိဿိတာနိ သောမနဿာနိ၊ ဆ ဂေဟနိဿိတာနိ ဒေါမနဿာနိ၊ ဆ နေက္ခမ္မနိဿိတာနိ ဒေါမနဿာနိ၊ ဆ ဂေဟနိဿိတာ ဥပေက္ခာ၊ ဆ နေက္ခမ္မနိဿိတာ ဥပေက္ခာတိ၊ ဣမာနိ ဆ ဆက္ကာနိ၊ အတီတာပိ ဆတ္တိံသဝိဓာ ဝေဒနာ၊ အနာဂတာပိ ဆတ္တိံသဝိဓာ ဝေဒနာ၊ ပစ္စုပ္ပန္နာပိ ဆတ္တိံသဝိဓာ ဝေဒနာ၊ တဒေကဇ္ဈံ အဘိသညုဟိတွာ အဘိသမ္ပိဏ္ဍေတွာ အဋ္ဌသတံ ဝေဒနာ ဟောန္တီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

ဝေဒနာပဉှော ပဉ္စမော.

၆. နာမရူပဧကတ္တနာနတ္တပဉှော

၆. ရာဇာ အာဟ ‘‘ဘန္တေ နာဂသေန၊ ကော ပဋိသန္ဒဟတီ’’တိ? ထေရော အာဟ ‘‘နာမရူပံ ခေါ၊ မဟာရာဇ၊ ပဋိသန္ဒဟတီ’’တိ. ‘‘ကိံ ဣမံ ယေဝ နာမရူပံ ပဋိသန္ဒဟတီ’’တိ? ‘‘န ခေါ၊ မဟာရာဇ၊ ဣမံ ယေဝ နာမရူပံ ပဋိသန္ဒဟတိ၊ ဣမိနာ ပန၊ မဟာရာဇ၊ နာမရူပေန ကမ္မံ ကရောတိ သောဘနံ ဝါ ပါပကံ ဝါ၊ တေန ကမ္မေန အညံ နာမရူပံ ပဋိသန္ဒဟတီ’’တိ. ‘‘ယဒိ၊ ဘန္တေ၊ န ဣမံ ယေဝ နာမရူပံ ပဋိသန္ဒဟတိ၊ နနု သော မုတ္တော ဘဝိဿတိ ပါပကေဟိ ကမ္မေဟီ’’တိ? ထေရော အာဟ ‘‘ယဒိ န ပဋိသန္ဒဟေယျ၊ မုတ္တော ဘဝေယျ ပါပကေဟိ ကမ္မေဟိ. ယသ္မာ စ ခေါ၊ မဟာရာဇ၊ ပဋိသန္ဒဟတိ၊ တသ္မာ န မုတ္တော ပါပကေဟိ ကမ္မေဟီ’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော အညတရဿ ပုရိသဿ အမ္ဗံ အဝဟရေယျ၊ တမေနံ အမ္ဗသာမိကော ဂဟေတွာ ရညော ဒဿေယျ ‘ဣမိနာ ဒေဝ ပုရိသေန မယှံ အမ္ဗာ အဝဟဋာ’တိ၊ သော ဧဝံ ဝဒေယျ ‘နာဟံ၊ ဒေဝ၊ ဣမဿ အမ္ဗေ အဝဟရာမိ၊ အညေ တေ အမ္ဗာ၊ ယေ ဣမိနာ ရောပိတာ၊ အညေ တေ အမ္ဗာ၊ ယေ မယာ အဝဟဋာ၊ နာဟံ ဒဏ္ဍပ္ပတ္တော’တိ. ကိံ နု ခေါ သော၊ မဟာရာဇ၊ ပုရိသော ဒဏ္ဍပ္ပတ္တော ဘဝေယျာ’’တိ? ‘‘အာမ၊ ဘန္တေ၊ ဒဏ္ဍပ္ပတ္တော ဘဝေယျာ’’တိ. ‘‘ကေန ကာရဏေနာ’’တိ? ‘‘ကိဉ္စာပိ သော ဧဝံ ဝဒေယျ၊ ပုရိမံ၊ ဘန္တေ၊ အမ္ဗံ အပ္ပစ္စက္ခာယ ပစ္ဆိမေန အမ္ဗေန သော ပုရိသော ဒဏ္ဍပ္ပတ္တော ဘဝေယျာ’’တိ. ‘‘ဧဝမေဝ ခေါ၊ မဟာရာဇ၊ ဣမိနာ နာမရူပေန ကမ္မံ ကရောတိ သောဘနံ ဝါ ပါပကံ ဝါ၊ တေန ကမ္မေန အညံ နာမရူပံ ပဋိသန္ဒဟတိ၊ တသ္မာ န မုတ္တော ပါပကေဟိ ကမ္မေဟီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော အညတရဿ ပုရိသဿ သာလိံ အဝဟရေယျ။ပေ။ ဥစ္ဆုံ အဝဟရေယျ။ပေ။ ယထာ မဟာရာဇ ကောစိ ပုရိသော ဟေမန္တကာလေ အဂ္ဂိံ ဇာလေတွာ ဝိသိဗ္ဗေတွာ [ဝိသီဝေတွာ (သီ. ပီ.)] အဝိဇ္ဈာပေတွာ ပက္ကမေယျ၊ အထ ခေါ သော အဂ္ဂိ အညတရဿ ပုရိသဿ ခေတ္တံ ဍဟေယျ [ဥပဍဟေယျ (က.)]၊ တမေနံ ခေတ္တသာမိကော ဂဟေတွာ ရညော ဒဿေယျ ‘ဣမိနာ၊ ဒေဝ၊ ပုရိသေန မယှံ ခေတ္တံ ဒဍ္ဎ’န္တိ. သော ဧဝံ ဝဒေယျ ‘နာဟံ၊ ဒေဝ၊ ဣမဿ ခေတ္တံ ဈာပေမိ၊ အညော သော အဂ္ဂိ၊ ယော မယာ အဝိဇ္ဈာပိတော၊ အညော သော အဂ္ဂိ၊ ယေနိမဿ ခေတ္တံ ဒဍ္ဎံ၊ နာဟံ ဒဏ္ဍပ္ပတ္တော’တိ. ကိံ နု ခေါ သော၊ မဟာရာဇ၊ ပုရိသော ဒဏ္ဍပ္ပတ္တော ဘဝေယျာ’’တိ? ‘‘အာမ၊ ဘန္တေ၊ ဒဏ္ဍပ္ပတ္တော ဘဝေယျာ’’တိ. ‘‘ကေန ကာရဏေနာ’’တိ? ‘‘ကိဉ္စာပိ သော ဧဝံ ဝဒေယျ၊ ပုရိမံ၊ ဘန္တေ၊ အဂ္ဂိံ အပ္ပစ္စက္ခာယ ပစ္ဆိမေန အဂ္ဂိနာ သော ပုရိသော ဒဏ္ဍပ္ပတ္တော ဘဝေယျာ’’တိ. ‘‘ဧဝမေဝ ခေါ၊ မဟာရာဇ၊ ဣမိနာ နာမရူပေန ကမ္မံ ကရောတိ သောဘနံ ဝါ ပါပကံ ဝါ၊ တေန ကမ္မေန အညံ နာမရူပံ ပဋိသန္ဒဟတိ၊ တသ္မာ န မုတ္တော ပါပကေဟိ ကမ္မေဟီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော ပဒီပံ အာဒါယ ပါသာဒံ အဘိရူဟိတွာ ဘုဉ္ဇေယျ၊ ပဒီပေါ ဈာယမာနော တိဏံ ဈာပေယျ၊ တိဏံ ဈာယမာနံ ဃရံ ဈာပေယျ၊ ဃရံ ဈာယမာနံ ဂါမံ ဈာပေယျ၊ ဂါမဇနော တံ ပုရိသံ ဂဟေတွာ ဧဝံ ဝဒေယျ ‘ကိဿ တွံ၊ ဘော ပုရိသ၊ ဂါမံ ဈာပေသီ’တိ၊ သော ဧဝံ ဝဒေယျ ‘နာဟံ၊ ဘော၊ ဂါမံ ဈာပေမိ၊ အညော သော ပဒီပဂ္ဂိ၊ ယဿာဟံ အာလောကေန ဘုဉ္ဇိံ၊ အညော သော အဂ္ဂိ၊ ယေန ဂါမော ဈာပိတော’တိ၊ တေ ဝိဝဒမာနာ တဝ သန္တိကေ အာဂစ္ဆေယျုံ၊ ကဿ တွံ၊ မဟာရာဇ၊ အဋ္ဋံ [အတ္ထံ (သီ. ပီ.)] ဓာရေယျာသီ’’တိ? ‘‘ဂါမဇနဿ ဘန္တေ’’တိ. ‘‘ကိံ ကာရဏာ’’တိ? ‘‘ကိဉ္စာပိ သော ဧဝံ ဝဒေယျ၊ အပိ စ တတော ဧဝ သော အဂ္ဂိ နိဗ္ဗတ္တော’’တိ. ‘‘ဧဝမေဝ ခေါ၊ မဟာရာဇ၊ ကိဉ္စာပိ အညံ မာရဏန္တိကံ နာမရူပံ၊ အညံ ပဋိသန္ဓိသ္မိံ နာမရူပံ၊ အပိ စ တတော ယေဝ တံ နိဗ္ဗတ္တံ၊ တသ္မာ န မုတ္တော ပါပကေဟိ ကမ္မေဟီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော ဒဟရိံ ဒါရိကံ ဝါရေတွာ သုင်္ကံ ဒတွာ ပက္ကမေယျ. သာ အပရေန သမယေန မဟတီ အဿ ဝယပ္ပတ္တာ၊ တတော အညော ပုရိသော သုင်္ကံ ဒတွာ ဝိဝါဟံ ကရေယျ၊ ဣတရော အာဂန္တွာ ဧဝံ ဝဒေယျ ‘ကိဿ ပန မေ တွံ၊ အမ္ဘော ပုရိသ၊ ဘရိယံ နေသီ’တိ? သော ဧဝံ ဝဒေယျ ‘နာဟံ တဝ ဘရိယံ နေမိ၊ အညာ သာ ဒါရိကာ ဒဟရီ တရုဏီ၊ ယာ တယာ ဝါရိတာ စ ဒိန္နသုင်္ကာ စ၊ အညာယံ ဒါရိကာ မဟတီ ဝယပ္ပတ္တာ မယာ ဝါရိတာ စ ဒိန္နသုင်္ကာ စာ’တိ၊ တေ ဝိဝဒမာနာ တဝ သန္တိကေ အာဂစ္ဆေယျုံ. ကဿ တွံ၊ မဟာရာဇ၊ အဋ္ဋံ ဓာရေယျာသီ’’တိ? ‘‘ပုရိမဿ ဘန္တေ’’တိ. ‘‘ကိံ ကာရဏာ’’တိ? ‘‘ကိဉ္စာပိ သော ဧဝံ ဝဒေယျ၊ အပိ စ တတော ယေဝ သာ မဟတီ နိဗ္ဗတ္တာ’’တိ. ‘‘ဧဝမေဝ ခေါ၊ မဟာရာဇ၊ ကိဉ္စာပိ အညံ မာရဏန္တိကံ နာမရူပံ၊ အညံ ပဋိသန္ဓိသ္မိံ နာမရူပံ၊ အပိ စ တတော ယေဝ တံ နိဗ္ဗတ္တံ၊ တသ္မာ နပရိမုတ္တော ပါပကေဟိ ကမ္မေဟီ’’တိ.

‘‘ဘိယျော ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော ဂေါပါလကဿ ဟတ္ထတော ခီရဃဋံ ကိဏိတွာ တဿေဝ ဟတ္ထေ နိက္ခိပိတွာ ပက္ကမေယျ ‘သွေ ဂဟေတွာ ဂမိဿာမီ’တိ၊ တံ အပရဇ္ဇု ဒဓိ သမ္ပဇ္ဇေယျ. သော အာဂန္တွာ ဧဝံ ဝဒေယျ ‘ဒေဟိ မေ ခီရဃဋ’န္တိ. သော ဒဓိံ ဒဿေယျ. ဣတရော ဧဝံ ဝဒေယျ ‘နာဟံ တဝ ဟတ္ထတော ဒဓိံ ကိဏာမိ၊ ဒေဟိ မေ ခီရဃဋ’န္တိ. သော ဧဝံ ဝဒေယျ ‘အဇာနတော တေ ခီရံ ဒဓိဘူတ’န္တိ တေ ဝိဝဒမာနာ တဝ သန္တိကေ အာဂစ္ဆေယျုံ၊ ကဿ တွံ မဟာရာဇ၊ အဋ္ဋံ ဓာရေယျာသီ’’တိ? ‘‘ဂေါပါလကဿ ဘန္တေ’’တိ. ‘‘ကိံ ကာရဏာ’’တိ? ‘‘ကိဉ္စာပိ သော ဧဝံ ဝဒေယျ၊ အပိ စ တတော ယေဝ တံ နိဗ္ဗတ္တ’’န္တိ. ‘‘ဧဝမေဝ ခေါ၊ မဟာရာဇ၊ ကိဉ္စာပိ အညံ မာရဏန္တိကံ နာမရူပံ၊ အညံ ပဋိသန္ဓိသ္မိံ နာမရူပံ၊ အပိ စ တတော ယေဝ တံ နိဗ္ဗတ္တံ၊ တသ္မာ န ပရိမုတ္တော ပါပကေဟိ ကမ္မေဟီ’’တိ.

‘‘ကလ္လောသိ၊ ဘန္တေ နာဂသေနာ’’တိ.

နာမရူပဧကတ္တနာနတ္တပဉှော ဆဋ္ဌော.

၇. ထေရပဋိသန္ဒဟနာပဋိသန္ဒဟနပဉှော

၇. ရာဇာ အာဟ ‘‘ဘန္တေ နာဂသေန၊ တွံ ပန ပဋိသန္ဒဟိဿသီ’’တိ? ‘‘အလံ၊ မဟာရာဇ၊ ကိံ တေ တေန ပုစ္ဆိတေန၊ နနု မယာ ပဋိကစ္စေဝ အက္ခာတံ ‘သစေ၊ မဟာရာဇ၊ သဥပါဒါနော ဘဝိဿာမိ၊ ပဋိသန္ဒဟိဿာမိ၊ သစေ အနုပါဒါနော ဘဝိဿာမိ၊ န ပဋိသန္ဒဟိဿာမီ’’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကောစိဒေဝ ပုရိသော ရညော အဓိကာရံ ကရေယျ. ရာဇာ တုဋ္ဌော အဓိကာရံ ဒဒေယျ၊ သော တေန အဓိကာရေန ပဉ္စဟိ ကာမဂုဏေဟိ သမပ္ပိတော သမင်္ဂိဘူတော ပရိစရေယျ၊ သော စေ ဇနဿ အာရောစေယျ ‘န မေ ရာဇာ ကိဉ္စိ ပဋိကရောတီ’ တိ. ကိံ နု ခေါ သော၊ မဟာရာဇ၊ ပုရိသော ယုတ္တကာရီ ဘဝေယျာ’’တိ? ‘‘န ဟိ ဘန္တေ’’တိ. ‘‘ဧဝမေဝ ခေါ၊ မဟာရာဇ၊ ကိံ တေ တေန ပုစ္ဆိတေန၊ နနု မယာ ပဋိကစ္စေဝ အက္ခာတံ ‘သစေ သဥပါဒါနော ဘဝိဿာမိ၊ ပဋိသန္ဒဟိဿာမိ၊ သစေ အနုပါဒါနော ဘဝိဿာမိ၊ န ပဋိသန္ဒဟိဿာမီ’’’တိ.

‘‘ကလ္လောသိ၊ ဘန္တေ နာဂသေနာ’’တိ.

ထေရပဋိသန္ဒဟနာပဋိသန္ဒဟနပဉှော သတ္တမော.

၈. နာမရူပပဋိသန္ဒဟနပဉှော

၈. ရာဇာ အာဟ ‘‘ဘန္တေ နာဂသေန၊ ယံ ပနေတံ ဗြူသိ ‘နာမရူပ’န္တိ၊ တတ္ထ ကတမံ နာမံ၊ ကတမံ ရူပ’’န္တိ. ‘‘ယံ တတ္ထ၊ မဟာရာဇ၊ ဩဠာရိကံ၊ ဧတံ ရူပံ၊ ယေ တတ္ထ သုခုမာ စိတ္တစေတသိကာ ဓမ္မာ၊ ဧတံ နာမ’’န္တိ. ‘‘ဘန္တေ နာဂသေန၊ ကေန ကာရဏေန နာမံ ယေဝ န ပဋိသန္ဒဟတိ၊ ရူပံ ယေဝ ဝါ’’တိ? ‘‘အညမညူပနိဿိတာ၊ မဟာရာဇ၊ ဧတေ ဓမ္မာ ဧကတောဝ ဥပ္ပဇ္ဇန္တီ’’တိ.

‘‘ဩပမ္မံ ကရောဟီ’’တိ. ‘‘ယထာ၊ မဟာရာဇ၊ ကုက္ကုဋိယာ ကလလံ န ဘဝေယျ၊ အဏ္ဍမ္ပိ န ဘဝေယျ၊ ယဉ္စ တတ္ထ ကလလံ၊ ယဉ္စ အဏ္ဍံ၊ ဥဘောပေတေ အညမညူပနိဿိတာ၊ ဧကတောဝ နေသံ ဥပ္ပတ္တိ ဟောတိ. ဧဝမေဝ ခေါ၊ မဟာရာဇ၊ ယဒိ တတ္ထ နာမံ န ဘဝေယျ၊ ရူပမ္ပိ န ဘဝေယျ၊ ယဉ္စေဝ တတ္ထ နာမံ၊ ယဉ္စေဝ ရူပံ၊ ဥဘောပေတေ အညမညူပနိဿိတာ၊ ဧကတောဝ နေသံ ဥပ္ပတ္တိ ဟောတိ. ဧဝမေတံ ဒီဃမဒ္ဓါနံ သန္ဓာဝိတ’’န္တိ.

‘‘ကလ္လောသိ၊ ဘန္တေ နာဂသေနာ’’တိ.

နာမရူပပဋိသန္ဒဟနပဉှော အဋ္ဌမော.

၉. အဒ္ဓါနပဉှော

၉. ရာဇာ အာဟ ‘‘ဘန္တေ နာဂသေန၊ ယံ ပနေတံ ဗြူသိ ‘ဒီဃမဒ္ဓါန’န္တိ၊ ကိမေတံ အဒ္ဓါနံ နာမာ’’တိ? ‘‘အတီတော၊ မဟာရာဇ၊ အဒ္ဓါ၊ အနာဂတော အဒ္ဓါ၊ ပစ္စုပ္ပန္နော အဒ္ဓါ’’တိ. ‘‘ကိံ ပန၊ ဘန္တေ၊ သဗ္ဗေ အဒ္ဓါ အတ္ထီ’’တိ? ‘‘ကောစိ၊ မဟာရာဇ၊ အဒ္ဓါ အတ္ထိ၊ ကောစိ နတ္ထီ’’တိ. ‘‘ကတမော ပန၊ ဘန္တေ၊ အတ္ထိ၊ ကတမော နတ္ထီ’’တိ? ‘‘ယေ တေ၊ မဟာရာဇ၊ သင်္ခါရာ အတီတာ ဝိဂတာ နိရုဒ္ဓါ ဝိပရိဏတာ၊ သော အဒ္ဓါ နတ္ထိ၊ ယေ ဓမ္မာ ဝိပါကာ၊ ယေ စ ဝိပါကဓမ္မဓမ္မာ၊ ယေ စ အညတြ ပဋိသန္ဓိံ ဒေန္တိ၊ သော အဒ္ဓါ အတ္ထိ. ယေ သတ္တာ ကာလင်္ကတာ အညတြ ဥပ္ပန္နာ၊ သော စ အဒ္ဓါ အတ္ထိ. ယေ သတ္တာ ကာလင်္ကတာ အညတြ အနုပ္ပန္နာ၊ သော အဒ္ဓါ နတ္ထိ. ယေ စ သတ္တာ ပရိနိဗ္ဗုတာ၊ သော စ အဒ္ဓါ နတ္ထိ ပရိနိဗ္ဗုတတ္တာ’’တိ.

‘‘ကလ္လောသိ၊ ဘန္တေ နာဂသေနာ’’တိ.

အဒ္ဓါနပဉှော နဝမော.

အဒ္ဓါနဝဂ္ဂေါ ဒုတိယော.

ဣမသ္မိံ ဝဂ္ဂေ နဝ ပဉှာ.