၈. မနသိကာရလက္ခဏပဉှော

၈. ရာဇာ အာဟ ‘‘ကိံလက္ခဏော၊ ဘန္တေ နာဂသေန၊ မနသိကာရော၊ ကိံလက္ခဏာ ပညာ’’တိ? ‘‘ဦဟနလက္ခဏော ခေါ၊ မဟာရာဇ၊ မနသိကာရော၊ ဆေဒနလက္ခဏာ ပညာ’’တိ.

‘‘ကထံ ဦဟနလက္ခဏော မနသိကာရော၊ ကထံ ဆေဒနလက္ခဏာ ပညာ၊ ဩပမ္မံ ကရောဟီ’’တိ. ‘‘ဇာနာသိ၊ တွံ မဟာရာဇ၊ ယဝလာဝကေ’’တိ. ‘‘အာမ၊ ဘန္တေ၊ ဇာနာမီ’’တိ. ‘‘ကထံ၊ မဟာရာဇ၊ ယဝလာဝကာ ယဝံ လုနန္တီ’’တိ? ‘‘ဝါမေန၊ ဘန္တေ၊ ဟတ္ထေန ယဝကလာပံ ဂဟေတွာ ဒက္ခိဏေန ဟတ္ထေန ဒါတ္တံ ဂဟေတွာ ဒါတ္တေန ဆိန္ဒန္တီ’’တိ.

‘‘ယထာ၊ မဟာရာဇ၊ ယဝလာဝကော ဝါမေန ဟတ္ထေန ယဝကလာပံ ဂဟေတွာ ဒက္ခိဏေန ဟတ္ထေန ဒါတ္တံ ဂဟေတွာ ယဝံ ဆိန္ဒတိ၊ ဧဝမေဝ ခေါ၊ မဟာရာဇ၊ ယောဂါဝစရော မနသိကာရေန မာနသံ ဂဟေတွာ ပညာယ ကိလေသေ ဆိန္ဒတိ၊ ဧဝံ ခေါ၊ မဟာရာဇ၊ ဦဟနလက္ခဏော မနသိကာရော၊ ဧဝံ ဆေဒနလက္ခဏာ ပညာ’’တိ.

‘‘ကလ္လောသိ၊ ဘန္တေ နာဂသေနာ’’တိ.

မနသိကာရလက္ခဏပဉှော အဋ္ဌမော.