၄၃၇. ပူတိမံသဇာတကံ (၁၁)

၉၆. န ခေါ မေ ရုစ္စတိ အာဠိ၊ ပူတိမံသဿ ပေက္ခနာ၊

ဧတာဒိသာ သခါရသ္မာ၊ အာရကာ ပရိဝဇ္ဇယေ.

၉၇. ဥမ္မတ္တိကာ အယံ ဝေဏီ၊ ဝဏ္ဏေတိ ပတိနော သခိံ၊

ပဇ္ဈာယိ [ပဇ္ဈာတိ (သီ. ပီ.)၊ ပဇ္ဈာယတိ (သီ. နိယျ)] ပဋိဂစ္ဆန္တိံ၊ အာဂတံ မေဏ္ဍ [မေဠ (သီ. ပီ.)] မာတရံ.

၉၈. တွံ ခေါသိ သမ္မ ဥမ္မတ္တော၊ ဒုမ္မေဓော အဝိစက္ခဏော၊

ယော တွံ [သော တွံ (သျာ.)] မတာလယံ ကတွာ၊ အကာလေန ဝိပေက္ခသိ.

၉၉. န အကာလေ ဝိပေက္ခေယျ၊ ကာလေ ပေက္ခေယျ ပဏ္ဍိတော၊

ပူတိမံသောဝ ပဇ္ဈာယိ [ပဇ္ဈာတိ (သီ. ပီ.)၊ ပဇ္ဈာယတိ (သီ. နိယျ)]၊ ယော အကာလေ ဝိပေက္ခတိ.

၁၀၀. ပိယံ ခေါ အာဠိ မေ ဟောတု၊ ပုဏ္ဏပတ္တံ ဒဒါဟိ မေ၊

ပတိ သဉ္ဇီဝိတော မယှံ၊ ဧယျာသိ ပိယပုစ္ဆိကာ [ပုစ္ဆိတာ (သျာ. က.)].

၁၀၁. ပိယံ ခေါ အာဠိ တေ ဟောတု၊ ပုဏ္ဏပတ္တံ ဒဒါမိ တေ၊

မဟတာ ပရိဝါရေန [ပရိဟာရေန (သျာ.)]၊ ဧဿံ [ဧသံ (သီ. ပီ.)] ကယိရာဟိ [ကယိရာသိ (ပီ.)] ဘောဇနံ.

၁၀၂. ကီဒိသော တုယှံ ပရိဝါရော၊ ယေသံ ကာဟာမိ ဘောဇနံ၊

ကိံနာမကာ စ တေ သဗ္ဗေ၊ တံ [တေ (သီ. သျာ. ပီ.)] မေ အက္ခာဟိ ပုစ္ဆိတာ.

၁၀၃. မာလိယော စတုရက္ခော စ၊ ပိင်္ဂိယော အထ ဇမ္ဗုကော၊

ဧဒိသော မယှံ ပရိဝါရော၊ တေသံ ကယိရာဟိ [ကယိရာသိ (ပီ.)] ဘောဇနံ.

၁၀၄. နိက္ခန္တာယ အဂါရသ္မာ၊ ဘဏ္ဍကမ္ပိ ဝိနဿတိ၊

အာရောဂျံ အာဠိနော ဝဇ္ဇံ [ဝစ္ဆံ (?)]၊ ဣဓေဝ ဝသ မာဂမာတိ.

ပူတိမံသဇာတကံ ဧကာဒသမံ.