၄၃၈. ဒဒ္ဒရဇာတကံ (၁၂)

၁၀၅. ယော တေ ပုတ္တကေ အခါဒိ၊ ဒိန္နဘတ္တော အဒူသကေ၊

တသ္မိံ ဒါဌံ နိပါတေဟိ၊ မာ တေ မုစ္စိတ္ထ ဇီဝတော.

၁၀၆. အာကိဏ္ဏလုဒ္ဒေါ ပုရိသော၊ ဓာတိစေလံဝ မက္ခိတော၊

ပဒေသံ တံ န ပဿာမိ၊ ယတ္ထ ဒါဌံ နိပါတယေ.

၁၀၇. အကတညုဿ ပေါသဿ၊ နိစ္စံ ဝိဝရဒဿိနော၊

သဗ္ဗံ စေ ပထဝိံ ဒဇ္ဇာ၊ နေဝ နံ အဘိရာဓယေ.

၁၀၈. ကိန္နု သုဗာဟု တရမာနရူပေါ၊ ပစ္စာဂတောသိ သဟ မာဏဝေန၊

ကိံ ကိစ္စမတ္ထံ ဣဓမတ္ထိ တုယှံ၊ အက္ခာဟိ မေ ပုစ္ဆိတော ဧတမတ္ထံ.

၁၀၉. ယော တေ သခါ ဒဒ္ဒရော သာဓုရူပေါ၊ တဿ ဝဓံ ပရိသင်္ကာမိ အဇ္ဇ၊

ပုရိသဿ ကမ္မာယတနာနိ သုတွာ၊ နာဟံ သုခိံ ဒဒ္ဒရံ အဇ္ဇ မညေ.

၁၁၀. ကာနိဿ ကမ္မာယတနာနိ အဿု၊ ပုရိသဿ ဝုတ္တိသမောဓာနတာယ၊

ကံ ဝါ ပဋိညံ ပုရိသဿ သုတွာ၊ ပရိသင်္ကသိ ဒဒ္ဒရံ မာဏဝေန.

၁၁၁. စိဏ္ဏာ ကလိင်္ဂါ စရိတာ ဝဏိဇ္ဇာ၊ ဝေတ္တာစရော သင်္ကုပထောပိ စိဏ္ဏော၊

နဋေဟိ စိဏ္ဏံ သဟ ဝါကုရေဟိ [ဝါကရေဟိ (ပီ. သီ. နိယျ)၊ ဝါဂုရေဟိ (?)]၊ ဒဏ္ဍေန ယုဒ္ဓမ္ပိ သမဇ္ဇမဇ္ဈေ.

၁၁၂. ဗဒ္ဓါ ကုလီကာ [ကုလိင်္ကာ (သီ. ပီ.)] မိတမာဠှကေန၊ အက္ခာ ဇိတာ [အက္ခာစိတာ (သီ. အဋ္ဌ.)] သံယမော အဗ္ဘတီတော၊

အဗ္ဗာဟိတံ [အပ္ပဟိတံ (သီ. သျာ.)၊ အဗ္ဗူဟိတံ (ပီ. သီ. နိယျ)] ပုဗ္ဗကံ [ပုပ္ဖကံ (သီ. သျာ.)] အဍ္ဎရတ္တံ၊ ဟတ္ထာ ဒဍ္ဎာ ပိဏ္ဍပဋိဂ္ဂဟေန.

၁၁၃. တာနိဿ ကမ္မာယတနာနိ အဿု၊ ပုရိသဿ ဝုတ္တိသမောဓာနတာယ၊

ယထာ အယံ ဒိဿတိ လောမပိဏ္ဍော၊ ဂါဝေါ ဟတာ ကိံ ပန ဒဒ္ဒရဿာတိ.

ဒဒ္ဒရဇာတကံ ဒွါဒသမံ.

နဝကနိပါတံ နိဋ္ဌိတံ.