၄၃၆. သမုဂ္ဂဇာတကံ (၁၀)

၈၇. ကုတော နု အာဂစ္ဆထ ဘော တယော ဇနာ၊ သွာဂတာ ဧထ [သွာဂတံ ဧတ္ထ (သီ. ပီ.)] နိသီဒထာသနေ၊

ကစ္စိတ္ထ ဘောန္တော ကုသလံ အနာမယံ၊ စိရဿမဗ္ဘာဂမနံ ဟိ ဝေါ ဣဓ.

၈၈. အဟမေဝ ဧကော ဣဓ မဇ္ဇ ပတ္တော၊ န စာပိ မေ ဒုတိယော ကောစိ ဝိဇ္ဇတိ၊

ကိမေဝ သန္ဓာယ တေ ဘာသိတံ ဣသေ၊ ‘‘ကုတော နု အာဂစ္ဆထ ဘော တယော ဇနာ’’.

၈၉. တုဝဉ္စ ဧကော ဘရိယာ စ တေ ပိယာ၊ သမုဂ္ဂပက္ခိတ္တနိကိဏ္ဏမန္တရေ၊

သာ ရက္ခိတာ ကုစ္ဆိဂတာဝ [ကုစ္ဆိဂတာ စ (က.)] တေ သဒါ၊ ဝါယုဿ [ဟရိဿ (က.)] ပုတ္တေန သဟာ တဟိံ ရတာ.

၉၀. သံဝိဂ္ဂရူပေါ ဣသိနာ ဝိယာကတော [ပဗျာကတော (က.)၊ ဗျာကတော (သျာ. ပီ.)]၊ သော ဒါနဝေါ တတ္ထ သမုဂ္ဂမုဂ္ဂိလိ၊

အဒ္ဒက္ခိ ဘရိယံ သုစိ မာလဓာရိနိံ၊ ဝါယုဿ ပုတ္တေန သဟာ တဟိံ ရတံ.

၉၁. သုဒိဋ္ဌရူပမုဂ္ဂတပါနုဝတ္တိနာ [သုဒိဋ္ဌရူပုဂ္ဂတပါနုဝတ္တိနာ (သီ. သျာ. ပီ.)]၊ ဟီနာ နရာ ယေ ပမဒါဝသံ ဂတာ၊

ယထာ ဟဝေ ပါဏရိဝေတ္ထ ရက္ခိတာ၊ ဒုဋ္ဌာ မယီ အညမဘိပ္ပမောဒယိ.

၉၂. ဒိဝါ စ ရတ္တော စ မယာ ဥပဋ္ဌိတာ၊ တပဿိနာ ဇောတိရိဝါ ဝနေ ဝသံ၊

သာ ဓမ္မမုက္ကမ္မ အဓမ္မမာစရိ၊ အကိရိယရူပေါ ပမဒါဟိ သန္ထဝေါ.

၉၃. သရီရမဇ္ဈမှိ ဌိတာတိမညဟံ၊ မယှံ အယန္တိ အသတိံ အသညတံ၊

သာ ဓမ္မမုက္ကမ္မ အဓမ္မမာစရိ၊ အကိရိယရူပေါ ပမဒါဟိ သန္ထဝေါ.

၉၄. သုရက္ခိတံ မေတိ ကထံ နု ဝိဿသေ၊ အနေကစိတ္တာသု န ဟတ္ထိ [အနေကစိတ္တာ ပုန ဟေတ္ထ (က.)] ရက္ခဏာ၊

ဧတာ ဟိ ပါတာလပပါတသန္နိဘာ၊ ဧတ္ထပ္ပမတ္တော ဗျသနံ နိဂစ္ဆတိ.

၉၅. တသ္မာ ဟိ တေ သုခိနော ဝီတသောကာ၊ ယေ မာတုဂါမေဟိ စရန္တိ နိဿဋာ၊

ဧတံ သိဝံ ဥတ္တမမာဘိပတ္ထယံ၊ န မာတုဂါမေဟိ ကရေယျ သန္ထဝန္တိ.

သမုဂ္ဂဇာတကံ ဒသမံ.