၄၃၁. ဟရိတစဇာတကံ (၅)

၄၀. သုတံ မေတံ မဟာဗြဟ္မေ၊ ကာမေ ဘုဉ္ဇတိ ဟာရိတော၊

ကစ္စေတံ ဝစနံ တုစ္ဆံ၊ ကစ္စိ သုဒ္ဓေါ ဣရိယျသိ.

၄၁. ဧဝမေတံ မဟာရာဇ၊ ယထာ တေ ဝစနံ သုတံ၊

ကုမ္မဂ္ဂံ ပဋိပန္နောသ္မိ၊ မောဟနေယျေသု မုစ္ဆိတော.

၄၂. အဒု [အာဒု (သီ. ပီ.)] ပညာ ကိမတ္ထိယာ၊ နိပုဏာ သာဓုစိန္တိနီ [စိန္တနီ (သီ. ပီ.)]၊

ယာယ ဥပ္ပတိတံ ရာဂံ၊ ကိံ မနော န ဝိနောဒယေ.

၄၃. စတ္တာရောမေ မဟာရာဇ၊ လောကေ အတိဗလာ ဘုသာ၊

ရာဂေါ ဒေါသော မဒေါ မောဟော၊ ယတ္ထ ပညာ န ဂါဓတိ.

၄၄. အရဟာ သီလသမ္ပန္နော၊ သုဒ္ဓေါ စရတိ ဟာရိတော၊

မေဓာဝီ ပဏ္ဍိတော စေဝ၊ ဣတိ နော သမ္မတော ဘဝံ.

၄၅. မေဓာဝီနမ္ပိ ဟိံသန္တိ၊ ဣသိံ ဓမ္မဂုဏေ ရတံ၊

ဝိတက္ကာ ပါပကာ ရာဇ၊ သုဘာ ရာဂူပသံဟိတာ.

၄၆. ဥပ္ပန္နာယံ သရီရဇော၊ ရာဂေါ ဝဏ္ဏဝိဒူသနော တဝ၊

တံ ပဇဟ ဘဒ္ဒမတ္ထု တေ၊ ဗဟုန္နာသိ မေဓာဝိသမ္မတော.

၄၇. တေ အန္ဓကာရကေ [ကရဏေ (သီ. သျာ. ပီ.)] ကာမေ၊ ဗဟုဒုက္ခေ မဟာဝိသေ၊

တေသံ မူလံ ဂဝေသိဿံ၊ ဆေစ္ဆံ ရာဂံ သဗန္ဓနံ.

၄၈. ဣဒံ ဝတွာန ဟာရိတော၊ ဣသိ သစ္စပရက္ကမော၊

ကာမရာဂံ ဝိရာဇေတွာ၊ ဗြဟ္မလောကူပဂေါ အဟူတိ.

ဟရိတစဇာတကံ [ဟာရိတဇာတကံ (သီ. ပီ.)] ပဉ္စမံ.