၄၃၂. ပဒကုသလမာဏဝဇာတကံ (၆)

၄၉. ဗဟုဿုတံ စိတ္တကထိံ [စိတ္တကထံ (သျာ. က.)]၊ ဂင်္ဂါ ဝဟတိ ပါဋလိံ [ပါဋလံ (သီ. ပီ.)]၊

ဝုယှမာနက ဘဒ္ဒန္တေ၊ ဧကံ မေ ဒေဟိ ဂါထကံ [ဂီတကံ (က. အဋ္ဌ.)].

၅၀. ယေန သိဉ္စန္တိ ဒုက္ခိတံ၊ ယေန သိဉ္စန္တိ အာတုရံ၊

တဿ မဇ္ဈေ မရိဿာမိ၊ ဇာတံ သရဏတော ဘယံ.

၅၁. ယတ္ထ ဗီဇာနိ ရူဟန္တိ၊ သတ္တာ ယတ္ထ ပတိဋ္ဌိတာ၊

သာ မေ သီသံ နိပီဠေတိ၊ ဇာတံ သရဏတော ဘယံ.

၅၂. ယေန ဘတ္တာနိ ပစ္စန္တိ၊ သီတံ ယေန ဝိဟညတိ၊

သော မံ ဍဟတိ [ဒယှတိ (က.)] ဂတ္တာနိ၊ ဇာတံ သရဏတော ဘယံ.

၅၃. ယေန ဘုတ္တေန [ဘတ္တေန (သျာ. က.)] ယာပေန္တိ၊ ပုထူ ဗြာဟ္မဏခတ္တိယာ၊

သော မံ ဘုတ္တော ဗျာပါဒေတိ၊ ဇာတံ သရဏတော ဘယံ.

၅၄. ဂိမှာနံ ပစ္ဆိမေ မာသေ၊ ဝါတမိစ္ဆန္တိ ပဏ္ဍိတာ၊

သော မံ [သော မေ (သီ. ပီ.)] ဘဉ္ဇတိ ဂတ္တာနိ၊ ဇာတံ သရဏတော ဘယံ.

၅၅. ယံ နိဿိတာ ဇဂတိရုဟံ၊ သွာယံ အဂ္ဂိံ ပမုဉ္စတိ၊

ဒိသာ ဘဇထ ဝက္ကင်္ဂါ၊ ဇာတံ သရဏတော ဘယံ.

၅၆. ယမာနယိံ သောမနဿံ၊ မာလိနိံ စန္ဒနုဿဒံ၊

သာ မံ ဃရာ နိစ္ဆုဘတိ [နီဟရတိ (သီ. သျာ.)]၊ ဇာတံ သရဏတော ဘယံ.

၅၇. ယေန ဇာတေန နန္ဒိဿံ၊ ယဿ စ ဘဝမိစ္ဆိသံ၊

သော မံ ဃရာ နိစ္ဆုဘတိ [နီဟရတိ (သီ. သျာ.)]၊ ဇာတံ သရဏတော ဘယံ.

၅၈. သုဏန္တု မေ ဇာနပဒါ၊ နေဂမာ စ သမာဂတာ၊

ယတောဒကံ တဒါဒိတ္တံ၊ ယတော ခေမံ တတော ဘယံ.

၅၉. ရာဇာ ဝိလုမ္ပတေ ရဋ္ဌံ၊ ဗြာဟ္မဏော စ ပုရောဟိတော၊

အတ္တဂုတ္တာ ဝိဟရထ၊ ဇာတံ သရဏတော ဘယန္တိ.

ပဒကုသလမာဏဝဇာတကံ ဆဋ္ဌံ.