၄၀၆. ဂန္ဓာရဇာတကံ (၇-၂-၁)

၇၆. ဟိတွာ ဂါမသဟဿာနိ၊ ပရိပုဏ္ဏာနိ သောဠသ၊

ကောဋ္ဌာဂါရာနိ ဖီတာနိ၊ သန္နိဓိံ ဒါနိ ကုဗ္ဗသိ.

၇၇. ဟိတွာ ဂန္ဓာရဝိသယံ၊ ပဟူတဓနဓာရိယံ [ဓာနိယံ (သီ. ပီ.)၊ ဓညန္တိ အတ္ထော]၊

ပသာသနတော [ပသာသနိတော (သီ. သျာ.)၊ ပသာသနာတော (ပီ.)] နိက္ခန္တော၊ ဣဓ ဒါနိ ပသာသသိ.

၇၈. ဓမ္မံ ဘဏာမိ ဝေဒေဟ၊ အဓမ္မော မေ န ရုစ္စတိ၊

ဓမ္မံ မေ ဘဏမာနဿ၊ န ပါပမုပလိမ္ပတိ.

၇၉. ယေန ကေနစိ ဝဏ္ဏေန၊ ပရော လဘတိ ရုပ္ပနံ၊

မဟတ္ထိယမ္ပိ စေ ဝါစံ၊ န တံ ဘာသေယျ ပဏ္ဍိတော.

၈၀. ကာမံ ရုပ္ပတု ဝါ မာ ဝါ၊ ဘုသံဝ ဝိကိရီယတု၊

ဓမ္မံ မေ ဘဏမာနဿ၊ န ပါပမုပလိမ္ပတိ.

၈၁. နော စေ အဿ သကာ ဗုဒ္ဓိ၊ ဝိနယော ဝါ သုသိက္ခိတော၊

ဝနေ အန္ဓမဟိံသောဝ [အန္ဓမဟိသောဝ (သီ. ပီ.)] စရေယျ ဗဟုကော ဇနော.

၈၂. ယသ္မာ စ ပနိဓေကစ္စေ၊ အာစေရမှိ [အာစာရမှိ (သီ. ပီ.)] သုသိက္ခိတာ၊

တသ္မာ ဝိနီတဝိနယာ၊ စရန္တိ သုသမာဟိတာတိ.

ဂန္ဓာရဇာတကံ ပဌမံ.