၄၀၇. မဟာကပိဇာတကံ (၇-၂-၂)

၈၃. အတ္တာနံ သင်္ကမံ ကတွာ၊ ယော သောတ္ထိံ သမတာရယိ၊

ကိံ တွံ တေသံ ကိမေ [ကိမော (သီ. ပီ.)၊ ကိံ မေ (သျာ.)] တုယှံ၊ ဟောန္တိ ဧတေ [ဟေတေ (သျာ.)၊ သော တေ (က.)] မဟာကပိ.

၈၄. ရာဇာဟံ ဣဿရော တေသံ၊ ယူထဿ ပရိဟာရကော၊

တေသံ သောကပရေတာနံ၊ ဘီတာနံ တေ အရိန္ဒမ.

၈၅. ဥလ္လင်္ဃယိတွာ [သ လင်္ဃယိတွာ (ပီ.)၊ သုလင်္ဃယိတွာ (က.)] အတ္တာနံ၊ ဝိဿဋ္ဌဓနုနော သတံ၊

တတော အပရပါဒေသု၊ ဒဠှံ ဗန္ဓံ လတာဂုဏံ.

၈၆. ဆိန္နဗ္ဘမိဝ ဝါတေန၊ နုဏ္ဏော [နုန္နော (သီ.)] ရုက္ခံ ဥပါဂမိံ၊

သောဟံ အပ္ပဘဝံ တတ္ထ၊ သာခံ ဟတ္ထေဟိ အဂ္ဂဟိံ.

၈၇. တံ မံ ဝိယာယတံ သန္တံ၊ သာခါယ စ လတာယ စ၊

သမနုက္ကမန္တာ ပါဒေဟိ၊ သောတ္ထိံ သာခါမိဂါ ဂတာ.

၈၈. တံ မံ န တပတေ ဗန္ဓော၊ မတော [ဝဓော (သီ. သျာ. ပီ.)] မေ န တပေဿတိ၊

သုခမာဟရိတံ တေသံ၊ ယေသံ ရဇ္ဇမကာရယိံ.

၈၉. ဧသာ တေ ဥပမာ ရာဇ၊ တံ သုဏောဟိ အရိန္ဒမ [အတ္ထသန္ဒဿနီ ကတာ (ပီ.)]၊

ရညာ ရဋ္ဌဿ ယောဂ္ဂဿ၊ ဗလဿ နိဂမဿ စ၊

သဗ္ဗေသံ သုခမေဋ္ဌဗ္ဗံ၊ ခတ္တိယေန ပဇာနတာတိ.

မဟာကပိဇာတကံ ဒုတိယံ.