၃၇၃. မူသိကဇာတကံ (၅-၃-၃)

၁၂၃. ကုဟိံ ဂတာ ကတ္ထ ဂတာ၊ ဣတိ လာလပ္ပတီ ဇနော၊

အဟမေဝေကော ဇာနာမိ၊ ဥဒပါနေ မူသိကာ ဟတာ.

၁၂၄. ယဉ္စေတံ [ယထေတံ (ပီ.)၊ ယဝေတံ (က.)၊ ယမေတံ (ကတ္ထစိ)] ဣတိ စီတိ စ၊ ဂဒြဘောဝ နိဝတ္တသိ၊

ဥဒပါနေ မူသိကံ ဟန္တွာ၊ ယဝံ ဘက္ခေတုမိစ္ဆသိ.

၁၂၅. ဒဟရော စာသိ ဒုမ္မေဓ၊ ပဌမုပ္ပတ္တိကော [ပဌမုပ္ပတ္တိတော (သီ. ပီ.)] သုသု၊

ဒီဃဉ္စေတံ [ဒီဃမေတံ (ပီ.)] သမာသဇ္ဇ [သမာပဇ္ဇ (သျာ. က.)]၊ န တေ ဒဿာမိ ဇီဝိတံ.

၁၂၆. နာန္တလိက္ခဘဝနေန၊ နာင်္ဂပုတ္တပိနေန [နာင်္ဂပုတ္တသိရေန (သီ. သျာ. ပီ.)] ဝါ၊

ပုတ္တေန ဟိ ပတ္ထယိတော၊ သိလောကေဟိ ပမောစိတော.

၁၂၇. သဗ္ဗံ သုတမဓီယေထ၊ ဟီနမုက္ကဋ္ဌမဇ္ဈိမံ၊

သဗ္ဗဿ အတ္ထံ ဇာနေယျ၊ န စ သဗ္ဗံ ပယောဇယေ၊

ဟောတိ တာဒိသကော ကာလော၊ ယတ္ထ အတ္ထာဝဟံ သုတန္တိ.

မူသိကဇာတကံ တတိယံ.