၃၅၉. သုဝဏ္ဏမိဂဇာတကံ (၅-၁-၉)

၅၀. ဝိက္ကမ ရေ ဟရိပါဒ [မဟာမိဂ (သီ. သျာ. ပီ.)]၊ ဝိက္ကမ ရေ မဟာမိဂ [ဟရီပဒ (သီ. သျာ. ပီ.)]၊

ဆိန္ဒ ဝါရတ္တိကံ ပါသံ၊ နာဟံ ဧကာ ဝနေ ရမေ.

၅၁. ဝိက္ကမာမိ န ပါရေမိ၊ ဘူမိံ သုမ္ဘာမိ ဝေဂသာ၊

ဒဠှော ဝါရတ္တိကော ပါသော၊ ပါဒံ မေ ပရိကန္တတိ.

၅၂. အတ္ထရဿု ပလာသာနိ၊ အသိံ နိဗ္ဗာဟ လုဒ္ဒက၊

ပဌမံ မံ ဝဓိတွာန၊ ဟန ပစ္ဆာ မဟာမိဂံ.

၅၃. န မေ သုတံ ဝါ ဒိဋ္ဌံ ဝါ၊ ဘာသန္တိံ မာနုသိံ မိဂိံ [န မေ သုတာ ဝါ ဒိဋ္ဌာ ဝါ၊ ဘာသန္တီ မာနုသိံ မိဂီ (ဋီကာ)]၊

တွဉ္စ ဘဒ္ဒေ သုခီ ဟောဟိ၊ ဧသော စာပိ မဟာမိဂေါ.

၅၄. ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊

ယထာဟမဇ္ဇ နန္ဒာမိ၊ မုတ္တံ ဒိသွာ မဟာမိဂန္တိ.

သုဝဏ္ဏမိဂဇာတကံ နဝမံ.