၃၅၅. ဃဋဇာတကံ (၅-၁-၅)

၂၉. အညေ သောစန္တိ ရောဒန္တိ၊ အညေ အဿုမုခါ ဇနာ၊

ပသန္နမုခဝဏ္ဏောသိ၊ ကသ္မာ ဃဋ [ဃတ (သီ. ပီ.)] န သောစသိ.

၃၀. နာဗ္ဘတီတဟရော သောကော၊ နာနာဂတသုခါဝဟော၊

တသ္မာ ဓင်္က [ဝံက (ပီ.)] န သောစာမိ၊ နတ္ထိ သောကေ ဒုတီယတာ [သောကော ဒုတီယကာ (က.)].

၃၁. သောစံ ပဏ္ဍု ကိသော ဟောတိ၊ ဘတ္တဉ္စဿ န ရုစ္စတိ၊

အမိတ္တာ သုမနာ ဟောန္တိ၊ သလ္လဝိဒ္ဓဿ ရုပ္ပတော.

၃၂. ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ၊

ဌိတံ မံ နာဂမိဿတိ၊ ဧဝံ ဒိဋ္ဌပဒေါ အဟံ.

၃၃. ယဿတ္တာ နာလမေကောဝ၊ သဗ္ဗကာမရသာဟရော၊

သဗ္ဗာပိ ပထဝီ တဿ၊ န သုခံ အာဝဟိဿတီတိ.

ဃဋဇာတကံ ပဉ္စမံ.