၃၅၂. သုဇာတဇာတကံ (၅-၁-၂)

၆. ကိံ နု သန္တရမာနောဝ၊ လာယိတွာ ဟရိတံ တိဏံ၊

ခါဒ ခါဒါတိ လပသိ၊ ဂတသတ္တံ ဇရဂ္ဂဝံ.

၇. န ဟိ အန္နေန ပါနေန၊ မတော ဂေါဏော သမုဋ္ဌဟေ၊

တွဉ္စ တုစ္ဆံ ဝိလပသိ၊ ယထာ တံ ဒုမ္မတီ တထာ.

၈. တထေဝ တိဋ္ဌတိ သီသံ၊ ဟတ္ထပါဒါ စ ဝါလဓိ၊

သောတာ တထေဝ တိဋ္ဌန္တိ [သော တာတ တထေဝ တိဋ္ဌတိ (က.)]၊ မညေ ဂေါဏော သမုဋ္ဌဟေ.

၉. နေဝယျကဿ သီသဉ္စ [သီသံ ဝါ (သီ. သျာ. ပီ.)]၊ ဟတ္ထပါဒါ စ ဒိဿရေ၊

ရုဒံ မတ္တိကထူပသ္မိံ၊ နနု တွညေဝ ဒုမ္မတိ.

၁၀. အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊

ဝါရိနာ ဝိယ ဩသိဉ္စံ [ဩသိဉ္စိ (က.)]၊ သဗ္ဗံ နိဗ္ဗာပယေ ဒရံ.

၁၁. အဗ္ဗဟီ [အဗ္ဗူဠှံ (သီ. သျာ.)၊ အဗ္ဘူဠှံ (က.)] ဝတ မေ သလ္လံ၊ ယမာသိ ဟဒယဿိတံ [သောကံ ဟဒယနိဿိတံ (သီ. သျာ.)]၊

ယော မေ သောကပရေတဿ၊ ပိတု သောကံ အပါနုဒိ.

၁၂. သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊

န သောစာမိ န ရောဒါမိ၊ တဝ သုတွာန မာဏဝ.

၁၃. ဧဝံ ကရောန္တိ သပ္ပညာ၊ ယေ ဟောန္တိ အနုကမ္ပကာ၊

ဝိနိဝတ္တေန္တိ သောကမှာ၊ သုဇာတော ပိတရံ ယထာတိ.

သုဇာတဇာတကံ ဒုတိယံ.