၃၅၀. ဒေဝတာပဉှဇာတကံ (၄-၅-၁၀)

၁၉၇. ဟန္တိ ဟတ္ထေဟိ ပါဒေဟိ၊ မုခဉ္စ ပရိသုမ္ဘတိ၊

သ ဝေ ရာဇ ပိယော ဟောတိ၊ ကံ တေန တွာဘိပဿသိ [မဘိပဿသိ (သီ.)].

၁၉၈. အက္ကောသတိ ယထာကာမံ၊ အာဂမဉ္စဿ ဣစ္ဆတိ၊

သ ဝေ ရာဇ ပိယော ဟောတိ၊ ကံ တေန တွာဘိပဿသိ.

၁၉၉. အဗ္ဘက္ခာတိ အဘူတေန၊ အလိကေနာဘိသာရယေ၊

သ ဝေ ရာဇ ပိယော ဟောတိ၊ ကံ တေန တွာဘိပဿသိ.

၂၀၀. ဟရံ အန္နဉ္စ ပါနဉ္စ၊ ဝတ္ထသေနာသနာနိ စ၊

အညဒတ္ထုဟရာ သန္တာ၊ တေ ဝေ ရာဇ ပိယာ ဟောန္တိ၊

ကံ တေန တွာဘိပဿသီတိ.

ဒေဝတာပဉှဇာတကံ ဒသမံ.

စူဠကုဏာလဝဂ္ဂေါ ပဉ္စမော.

တဿုဒ္ဒါနံ –

နရာနံ အသက္ခိဝသိမှဝရော၊ နီလိယမဂ္ဂိဝရဉ္စ ပုန၊

ပုန ရသာယသကူဋဝရော၊ တထာရည သာရထိ ဟန္တိ ဒသာတိ.

အထ ဝဂ္ဂုဒ္ဒါနံ –

ကာလိင်္ဂံ [ဝိဝရံ (ဗဟူသု)] ပုစိမန္ဒဉ္စ၊ ကုဋိဒူသက ကောကိလာ [ကုဋိဒူသံ ဗဟုဘာဏကံ (ဗဟူသု)]၊

စူဠကုဏာလဝဂ္ဂေါ သော၊ ပဉ္စမော သုပ္ပကာသိတောတိ.

စတုက္ကနိပါတံ နိဋ္ဌိတံ.