၃၄၆. ကေသဝဇာတကံ (၄-၅-၆)

၁၈၁. မနုဿိန္ဒံ ဇဟိတွာန၊ သဗ္ဗကာမသမိဒ္ဓိနံ၊

ကထံ နု ဘဂဝါ ကေသီ၊ ကပ္ပဿ ရမတိ အဿမေ [ရမတဿမေ (က.)].

၁၈၂. သာဒူနီ [သာဓူနိ (က. သီ. သျာ. က.)] ရမဏီယာနိ၊ သန္တိ ဝက္ခာ မနောရမာ၊

သုဘာသိတာနိ ကပ္ပဿ၊ နာရဒ ရမယန္တိ မံ.

၁၈၃. သာလီနံ ဩဒနံ ဘုဉ္ဇေ၊ သုစိံ မံသူပသေစနံ၊

ကထံ သာမာကနီဝါရံ၊ အလောဏံ ဆာဒယန္တိ တံ.

၁၈၄. သာဒုံ ဝါ [အသာဒုံ (ပီ.)] ယဒိ ဝါသာဒုံ၊ အပ္ပံ ဝါ ယဒိ ဝါ ဗဟုံ၊

ဝိဿတ္ထော ယတ္ထ ဘုဉ္ဇေယျ၊ ဝိဿာသပရမာ ရသာတိ.

ကေသဝဇာတကံ [ကေသီဇာတကံ (က.)] ဆဋ္ဌံ.