၃၄၇. အယကူဋဇာတကံ (၄-၅-၇)

၁၈၅. သဗ္ဗာယသံ ကူဋမတိပ္ပမာဏံ၊ ပဂ္ဂယှ ယော [သော (ပီ.)] တိဋ္ဌသိ အန္တလိက္ခေ၊

ရက္ခာယ မေ [မံ (သီ.)] တွံ ဝိဟိတော နုသဇ္ဇ၊ ဥဒါဟု မေ စေတယသေ [ဝါယမသေ (သီ. သျာ.)] ဝဓာယ.

၁၈၆. ဒူတော အဟံ ရာဇိဓ ရက္ခသာနံ၊ ဝဓာယ တုယှံ ပဟိတောဟမသ္မိ၊

ဣန္ဒော စ တံ ရက္ခတိ ဒေဝရာဇာ၊ တေနုတ္တမင်္ဂံ န တေ [န ဟိ (က. သီ. ပီ.)၊ တေ န (က.)] ဖာလယာမိ.

၁၈၇. သစေ စ မံ ရက္ခတိ ဒေဝရာဇာ၊ ဒေဝါနမိန္ဒော မဃဝါ သုဇမ္ပတိ၊

ကာမံ ပိသာစာ ဝိနဒန္တု သဗ္ဗေ၊ န သန္တသေ ရက္ခသိယာ ပဇာယ.

၁၈၈. ကာမံ ကန္ဒန္တု [ကန္တန္တု (က.)၊ ကဏ္ဍန္တု (သျာ.)] ကုမ္ဘဏ္ဍာ၊ သဗ္ဗေ ပံသုပိသာစကာ၊

နာလံ ပိသာစာ ယုဒ္ဓါယ၊ မဟတီ သာ ဝိဘိံသိကာတိ [ဝိဘေသိကာတိ (သျာ.)၊ ဝိဟေသိကာတိ (ပီ.)].

အယကူဋဇာတကံ သတ္တမံ.