၃၃၅. ဇမ္ဗုကဇာတကံ (၄-၄-၅)

၁၃၇. ဗြဟာ ပဝဍ္ဎကာယော သော၊ ဒီဃဒါဌော စ ဇမ္ဗုက၊

န တွံ တတ္ထ ကုလေ ဇာတော၊ ယတ္ထ ဂဏှန္တိ ကုဉ္ဇရံ.

၁၃၈. အသီဟော သီဟမာနေန၊ ယော အတ္တာနံ ဝိကုဗ္ဗတိ၊

ကောတ္ထူဝ [ကုဋ္ဌူဝ (သီ.)၊ ကုတ္ထုဝ (သျာ. ပီ)] ဂဇမာသဇ္ဇ၊ သေတိ ဘူမျာ အနုတ္ထုနံ.

၁၃၉. ယသဿိနော ဥတ္တမပုဂ္ဂလဿ၊ သဉ္ဇာတခန္ဓဿ မဟဗ္ဗလဿ၊

အသမေက္ခိယ ထာမဗလူပပတ္တိံ၊ သ သေတိ နာဂေန ဟတောယံ ဇမ္ဗုကော.

၁၄၀. ယော စီဓ ကမ္မံ ကုရုတေ ပမာယ၊ ထာမဗ္ဗလံ အတ္တနိ သံဝိဒိတွာ၊

ဇပ္ပေန မန္တေန သုဘာသိတေန၊ ပရိက္ခဝါ သော ဝိပုလံ ဇိနာတီတိ.

ဇမ္ဗုကဇာတကံ ပဉ္စမံ.