၃၃၆. ဗြဟာဆတ္တဇာတကံ (၄-၄-၆)

၁၄၁. တိဏံ တိဏန္တိ လပသိ၊ ကော နု တေ တိဏမာဟရိ၊

ကိံ နု တေ တိဏကိစ္စတ္ထိ၊ တိဏမေဝ ပဘာသသိ.

၁၄၂. ဣဓာဂမာ ဗြဟ္မစာရီ၊ ဗြဟာ ဆတ္တော ဗဟုဿုတော၊

သော မေ [သော ဝေ (က.)] သဗ္ဗံ သမာဒါယ၊ တိဏံ နိက္ခိပ္ပ ဂစ္ဆတိ.

၁၄၃. ဧဝေတံ ဟောတိ ကတ္တဗ္ဗံ၊ အပ္ပေန ဗဟုမိစ္ဆတာ၊

သဗ္ဗံ သကဿ အာဒါနံ၊ အနာဒါနံ တိဏဿ စ. ( ) [(တိဏဿ စာဋီသု ဂတော၊ တတ္ထ ကာ ပရိဒေဝနာ) (သီ. သျာ.) (စာဋီသု ပက္ခိပိတွာန၊ တတ္ထ ကာ ပရိဒေဝနာ) (က.)]

၁၄၄. သီလဝန္တော န ကုဗ္ဗန္တိ၊ ဗာလော သီလာနိ ကုဗ္ဗတိ၊

အနိစ္စသီလံ ဒုဿီလျံ [ဒုဿီလံ (ပီ.)]၊ ကိံ ပဏ္ဍိစ္စံ ကရိဿတီတိ.

ဗြဟာဆတ္တဇာတကံ ဆဋ္ဌံ.