၃၂၈. အနနုသောစိယဇာတကံ (၄-၃-၈)

၁၀၉. ဗဟူနံ ဝိဇ္ဇတီ ဘောတီ၊ တေဟိ မေ ကိံ ဘဝိဿတိ၊

တသ္မာ ဧတံ န သောစာမိ၊ ပိယံ သမ္မိလ္လဟာသိနိံ.

၁၁၀. တံ တံ စေ အနုသောစေယျ၊ ယံ ယံ တဿ န ဝိဇ္ဇတိ၊

အတ္တာနမနုသောစေယျ၊ သဒါ မစ္စုဝသံ ပတံ.

၁၁၁. န ဟေဝ ဌိတံ နာသီနံ၊ န သယာနံ န ပဒ္ဓဂုံ [ပတ္ထဂုံ (သျာ.)]၊

ယာဝ ဗျာတိ နိမိသတိ၊ တတြာပိ ရသတီ [သရတီ (သီ. သျာ. ပီ.)] ဝယော.

၁၁၂. တတ္ထတ္တနိ ဝတပ္ပဒ္ဓေ [ဝတ ပန္ထေ (သျာ.)၊ ဝတ ဗန္ဓေ (က.) ဝတ + ပ-အဒ္ဓေ = ဝတပ္ပဒ္ဓေ]၊ ဝိနာဘာဝေ အသံသယေ၊

ဘူတံ သေသံ ဒယိတဗ္ဗံ၊ ဝီတံ အနနုသောစိယန္တိ [စဝိတံ နာနုသောစိယန္တိ (သျာ.)၊ မတန္တံ နာနုသောစိယံ (က.)].

အနနုသောစိယဇာတကံ အဋ္ဌမံ.