၃၂၉. ကာဠဗာဟုဇာတကံ (၄-၃-၉)

၁၁၃. ယံ အန္နပါနဿ ပုရေ လဘာမ၊ တံ ဒါနိ သာခမိဂမေဝ ဂစ္ဆတိ၊

ဂစ္ဆာမ ဒါနိ ဝနမေဝ ရာဓ၊ အသက္ကတာ စသ္မ ဓနဉ္ဇယာယ [ဓနဉ္စယာယ (က.)].

၁၁၄. လာဘော အလာဘော ယသော အယသော စ၊ နိန္ဒာ ပသံသာ စ သုခဉ္စ ဒုက္ခံ၊

ဧတေ အနိစ္စာ မနုဇေသု ဓမ္မာ၊ မာ သောစိ ကိံ သောစသိ ပေါဋ္ဌပါဒ.

၁၁၅. အဒ္ဓါ တုဝံ ပဏ္ဍိတကောသိ ရာဓ၊ ဇာနာသိ အတ္ထာနိ အနာဂတာနိ၊

ကထံ နု သာခါမိဂံ ဒက္ခိသာမ [ဒက္ခိယာမ (က.)၊ ဒက္ခာမ (သျာ.)]၊ နိဒ္ဓါဝိတံ [နိဒ္ဓါပိတံ (သီ. သျာ.)၊ နိဗ္ဗာပိတံ (ပီ.)၊ နိစ္ဆဒံ (က.)] ရာဇကုလတောဝ ဇမ္မံ.

၁၁၆. စာလေတိ ကဏ္ဏံ ဘကုဋိံ ကရောတိ၊ မုဟုံ မုဟုံ ဘာယယတေ [ဘာယတေ (သျာ.)၊ ဘာယာပတေ (က.)] ကုမာရေ၊

သယမေဝ တံ ကာဟတိ ကာဠဗာဟု၊ ယေနာရကာ ဌဿတိ အန္နပါနာတိ.

ကာဠဗာဟုဇာတကံ နဝမံ.