၃၂၇. ကာကဝတီဇာတကံ (၄-၃-၇)

၁၀၅. ဝါတိ စာယံ [ဝါယံ (က.)] တတော ဂန္ဓော၊ ယတ္ထ မေ ဝသတီ ပိယာ၊

ဒူရေ ဣတော ဟိ ကာကဝတီ [ကာကာတီ (သီ.)၊ ကာကာတိ (သျာ. ပီ.)]၊ ယတ္ထ မေ နိရတော မနော.

၁၀၆. ကထံ သမုဒ္ဒမတရီ၊ ကထံ အတရိ ကေပုကံ [ကေဗုကံ (သီ. ပီ.)]၊

ကထံ သတ္တ သမုဒ္ဒါနိ၊ ကထံ သိမ္ဗလိမာရုဟိ.

၁၀၇. တယာ သမုဒ္ဒမတရိံ၊ တယာ အတရိ ကေပုကံ [ကေဗုကံ (သီ. ပီ.)]၊

တယာ သတ္တ သမုဒ္ဒါနိ၊ တယာ သိမ္ဗလိမာရုဟိံ.

၁၀၈. ဓိရတ္ထုမံ မဟာကာယံ၊ ဓိရတ္ထုမံ အစေတနံ၊

ယတ္ထ ဇာယာယဟံ ဇာရံ၊ အာဝဟာမိ ဝဟာမိ စာတိ.

ကာကဝတီဇာတကံ သတ္တမံ.