၃၂၆. ကက္ကာရုဇာတကံ (၄-၃-၆)
၁၀၁. ကာယေန ယော နာဝဟရေ၊ ဝါစာယ န မုသာ ဘဏေ၊
ယသော လဒ္ဓါ န မဇ္ဇေယျ၊ သ ဝေ ကက္ကာရုမရဟတိ.
၁၀၂. ဓမ္မေန ဝိတ္တမေသေယျ၊ န နိကတျာ ဓနံ ဟရေ၊
ဘောဂေ လဒ္ဓါ န မဇ္ဇေယျ၊ သ ဝေ ကက္ကာရုမရဟတိ.
၁၀၃. ယဿ စိတ္တံ အဟာလိဒ္ဒံ၊ သဒ္ဓါ စ အဝိရာဂိနီ၊
ဧကော သာဒုံ န ဘုဉ္ဇေယျ၊ သ ဝေ ကက္ကာရုမရဟတိ.
၁၀၄. သမ္မုခါ ဝါ တိရောက္ခာ ဝါ [ပရောက္ခာ ဝါ (ပီ.)၊ ပရမ္မုခါ (က.)]၊ ယော သန္တေ န ပရိဘာသတိ၊
ယထာဝါဒီ တထာကာရီ၊ သ ဝေ ကက္ကာရုမရဟတီတိ.
ကက္ကာရုဇာတကံ ဆဋ္ဌံ.