၃၂၃. ဗြဟ္မဒတ္တဇာတကံ (၄-၃-၃)

၈၉. ဒွယံ ယာစနကော ရာဇ၊ ဗြဟ္မဒတ္တ နိဂစ္ဆတိ၊

အလာဘံ ဓနလာဘံ ဝါ၊ ဧဝံ ဓမ္မာ ဟိ ယာစနာ.

၉၀. ယာစနံ ရောဒနံ အာဟု၊ ပဉ္စာလာနံ ရထေသဘ၊

ယော ယာစနံ ပစ္စက္ခာတိ၊ တမာဟု ပဋိရောဒနံ.

၉၁. မာ မဒ္ဒသံသု ရောဒန္တံ၊ ပဉ္စာလာ သုသမာဂတာ၊

တုဝံ ဝါ ပဋိရောဒန္တံ၊ တသ္မာ ဣစ္ဆာမဟံ ရဟော.

၉၂. ဒဒါမိ တေ ဗြာဟ္မဏ ရောဟိဏီနံ၊ ဂဝံ သဟဿံ သဟ ပုင်္ဂဝေန၊

အရိယော ဟိ အရိယဿ ကထံ န ဒဇ္ဇာ [ဒဇ္ဇေ (သီ.)၊ ဒဇ္ဇံ (?)]၊ သုတွာန ဂါထာ တဝ ဓမ္မယုတ္တာတိ.

ဗြဟ္မဒတ္တဇာတကံ တတိယံ.