၃၂၄. စမ္မသာဋကဇာတကံ (၄-၃-၄)

၉၃. ကလျာဏရူပေါ ဝတယံ စတုပ္ပဒေါ၊ သုဘဒ္ဒကော စေဝ သုပေသလော စ၊

ယော ဗြာဟ္မဏံ ဇာတိမန္တူပပန္နံ၊ အပစာယတိ မေဏ္ဍဝရော ယသဿီ.

၉၄. မာ ဗြာဟ္မဏ ဣတ္တရဒဿနေန၊ ဝိဿာသမာပဇ္ဇိ စတုပ္ပဒဿ၊

ဒဠှပ္ပဟာရံ အဘိကင်္ခမာနော [အဘိကတ္တုကာမော (သျာ.)]၊ အဝသက္ကတီ ဒဿတိ သုပ္ပဟာရံ.

၉၅. ဦရုဋ္ဌိ [ဦရဋ္ဌိ (သီ.)] ဘဂ္ဂံ ပဝဋ္ဋိတော [ပတိတော (သီ. သျာ.)] ခါရိဘာရော၊ သဗ္ဗဉ္စ ဘဏ္ဍံ ဗြာဟ္မဏဿ [ဗြာဟ္မဏဿီဓ (က. သီ. ပီ.)၊ ဗြာဟ္မဏဿေဝ (က. သီ. သျာ. က.)] ဘိန္နံ၊

ဥဘောပိ ဗာဟာ ပဂ္ဂယှ [ပဂ္ဂယျေဝ (သျာ.)၊ ပဂ္ဂဟီယ (?)] ကန္ဒတိ [ဗာဟာ ပဂ္ဂယျ ကန္ဒတိ (ပီ. က.)]၊ အဘိဓာဝထ ဟညတေ ဗြဟ္မစာရီ.

၉၆. ဧဝံ သော နိဟတော သေတိ၊ ယော အပူဇံ ပသံသတိ [နမဿတိ (ပီ.)]၊

ယထာဟမဇ္ဇ ပဟတော၊ ဟတော မေဏ္ဍေန ဒုမ္မတီတိ.

စမ္မသာဋကဇာတကံ စတုတ္ထံ.