၃၂၂. ဒုဒ္ဒုဘဇာတကံ (၄-၃-၂)

၈၅. ဒုဒ္ဒုဘာယတိ [ဒဒ္ဒဘာယတိ (သီ. ပီ.)] ဘဒ္ဒန္တေ၊ ယသ္မိံ ဒေသေ ဝသာမဟံ၊

အဟမ္ပေတံ န ဇာနာမိ၊ ကိမေတံ ဒုဒ္ဒုဘာယတိ.

၈၆. ဗေလုဝံ ပတိတံ သုတွာ၊ ဒုဒ္ဒုဘန္တိ [ဒဒ္ဒဘန္တိ (သီ.)] သသော ဇဝိ၊

သသဿ ဝစနံ သုတွာ၊ သန္တတ္တာ မိဂဝါဟိနီ.

၈၇. အပ္ပတွာ ပဒဝိညာဏံ၊ ပရဃောသာနုသာရိနော၊

ပနာဒပရမာ ဗာလာ၊ တေ ဟောန္တိ ပရပတ္တိယာ.

၈၈. ယေ စ သီလေန သမ္ပန္နာ၊ ပညာယူပသမေ ရတာ၊

အာရကာ ဝိရတာ ဓီရာ၊ န ဟောန္တိ ပရပတ္တိယာတိ.

ဒုဒ္ဒုဘဇာတကံ [ဒဒ္ဒဘဇာတကံ (သီ. ပီ.)] ဒုတိယံ.