၃၂၁. ကုဋိဒူသကဇာတကံ (၄-၃-၁)

၈၁. မနုဿဿေဝ တေ သီသံ၊ ဟတ္ထပါဒါ စ ဝါနရ၊

အထ ကေန နု ဝဏ္ဏေန၊ အဂါရံ တေ န ဝိဇ္ဇတိ.

၈၂. မနုဿဿေဝ မေ သီသံ၊ ဟတ္ထပါဒါ စ သိင်္ဂိလ [သိင်္ဂါလ (က.)၊ ပိင်္ဂလ (ဋီကာ)]၊

ယာဟု သေဋ္ဌာ မနုဿေသု၊ သာ မေ ပညာ န ဝိဇ္ဇတိ.

၈၃. အနဝဋ္ဌိတစိတ္တဿ၊ လဟုစိတ္တဿ ဒုဗ္ဘိနော [ဒူဘိနော (ပီ.)]၊

နိစ္စံ အဒ္ဓုဝသီလဿ၊ သုခဘာဝေါ [သုစိဘာဝေါ (သီ.)၊ သုခဘာဂေါ (?)] န ဝိဇ္ဇတိ.

၈၄. သော ကရဿု အာနုဘာဝံ၊ ဝီတိဝတ္တဿု သီလိယံ၊

သီတဝါတပရိတ္တာဏံ၊ ကရဿု ကုဋဝံ [ကုဋိကံ (သီ. သျာ.)] ကပီတိ.

ကုဋိဒူသက [သိင်္ဂါလသကုဏ (က.)] ဇာတကံ ပဌမံ.