၃၁၆. သသပဏ္ဍိတဇာတကံ (၄-၂-၆)

၆၁. သတ္တ မေ ရောဟိတာ မစ္ဆာ၊ ဥဒကာ ထလမုဗ္ဘတာ၊

ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသ.

၆၂. ဒုဿ မေ ခေတ္တပါလဿ၊ ရတ္တိဘတ္တံ အပါဘတံ၊

မံသသူလာ စ ဒွေ ဂေါဓာ၊ ဧကဉ္စ ဒဓိဝါရကံ၊

ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသ.

၆၃. အမ္ဗပက္ကံ ဒကံ [အမ္ဗပက္ကောဒကံ (သီ. ပီ.)] သီတံ၊ သီတစ္ဆာယာ မနောရမာ [သီတစ္ဆာယံ မနောရမံ (သီ. သျာ. ပီ.)]၊

ဣဒံ ဗြာဟ္မဏ မေ အတ္ထိ၊ ဧတံ ဘုတွာ ဝနေ ဝသ.

၆၄. န သသဿ တိလာ အတ္ထိ၊ န မုဂ္ဂါ နပိ တဏ္ဍုလာ၊

ဣမိနာ အဂ္ဂိနာ ပက္ကံ၊ မမံ [မံသံ (က.)] ဘုတွာ ဝနေ ဝသာတိ.

သသပဏ္ဍိတဇာတကံ ဆဋ္ဌံ.