၃၁၇. မတရောဒနဇာတကံ (၄-၂-၇)

၆၅. မတံ မတံ ဧဝ [မတမတမေဝ (သီ. သျာ. ပီ.)] ရောဒထ၊ န ဟိ တံ ရောဒထ ယော မရိဿတိ၊

သဗ္ဗေပိ [သဗ္ဗေဝ (သီ. သျာ. ပီ.)] သရီရဓာရိနော၊ အနုပုဗ္ဗေန ဇဟန္တိ ဇီဝိတံ.

၆၆. ဒေဝမနုဿာ စတုပ္ပဒါ၊ ပက္ခိဂဏာ ဥရဂါ စ ဘောဂိနော၊

သမှိ [ယမှိ (သျာ.)၊ အသ္မိံ (ပီ. က.)] သရီရေ အနိဿရာ၊ ရမမာနာဝ ဇဟန္တိ ဇီဝိတံ.

၆၇. ဧဝံ စလိတံ အသဏ္ဌိတံ၊ သုခဒုက္ခံ မနုဇေသွပေက္ခိယ၊

ကန္ဒိတရုဒိတံ နိရတ္ထကံ၊ ကိံ ဝေါ သောကဂဏာဘိကီရရေ.

၆၈. ဓုတ္တာ စ သောဏ္ဍာ [ဓုတ္တာ သောဏ္ဍာ (သီ.)၊ ဓုတ္တာ သောဏ္ဍာ စ (သျာ.)] အကတာ၊ ဗာလာ သူရာ အယောဂိနော [ဗာလာ သူရာ ဝီရာ အယောဂိနော (ပီ.)]၊

ဓီရံ မညန္တိ ဗာလောတိ၊ ယေ ဓမ္မဿ အကောဝိဒါတိ.

မတရောဒနဇာတကံ သတ္တမံ.