၃၁၃. ခန္တီဝါဒီဇာတကံ (၄-၂-၃)

၄၉. ယော တေ ဟတ္ထေ စ ပါဒေ စ၊ ကဏ္ဏနာသဉ္စ ဆေဒယိ၊

တဿ ကုဇ္ဈ မဟာဝီရ၊ မာ ရဋ္ဌံ ဝိနသာ [ဝိနဿ (က. သီ. သျာ. က.)] ဣဒံ.

၅၀. ယော မေ ဟတ္ထေ စ ပါဒေ စ၊ ကဏ္ဏနာသဉ္စ ဆေဒယိ၊

စိရံ ဇီဝတု သော ရာဇာ၊ န ဟိ ကုဇ္ဈန္တိ မာဒိသာ.

၅၁. အဟူ အတီတမဒ္ဓါနံ [အဟု အတီတမဒ္ဓါနေ (သျာ. ပီ. က.)]၊ သမဏော ခန္တိဒီပနော၊

တံ ခန္တိယာယေဝ ဌိတံ၊ ကာသိရာဇာ အဆေဒယိ.

၅၂. တဿ ကမ္မ [ကမ္မဿ (သီ. ပီ.)] ဖရုသဿ၊ ဝိပါကော ကဋုကော အဟု၊

ယံ ကာသိရာဇာ ဝေဒေသိ၊ နိရယမှိ သမပ္ပိတောတိ.

ခန္တီဝါဒီဇာတကံ တတိယံ.