၃၁၄. လောဟကုမ္ဘိဇာတကံ (၄-၂-၄)

၅၃. ဒုဇ္ဇီဝိတမဇီဝိမှ၊ ယေ သန္တေ [ယေသံ နော (သျာ. က.)] န ဒဒမှသေ၊

ဝိဇ္ဇမာနေသု ဘောဂေသု၊ ဒီပံ နာကမှ အတ္တနော.

၅၄. သဋ္ဌိ [သဋ္ဌိံ (သျာ.)] ဝဿသဟဿာနိ၊ ပရိပုဏ္ဏာနိ သဗ္ဗသော၊

နိရယေ ပစ္စမာနာနံ၊ ကဒါ အန္တော ဘဝိဿတိ.

၅၅. နတ္ထိ အန္တော ကုတော အန္တော၊ န အန္တော ပဋိဒိဿတိ၊

တဒါ ဟိ ပကတံ ပါပံ၊ မမ တုယှဉ္စ မာရိသာ [မာရိသ (သီ. သျာ. ပီ.)].

၅၆. သောဟံ နူန ဣတော ဂန္တွာ၊ ယောနိံ လဒ္ဓါန မာနုသိံ၊

ဝဒညူ သီလသမ္ပန္နော၊ ကာဟာမိ ကုသလံ ဗဟုန္တိ.

လောဟကုမ္ဘိဇာတကံ စတုတ္ထံ.