၃၁၂. ကဿပမန္ဒိယဇာတကံ (၄-၂-၂)
၄၅. အပိ ကဿပ မန္ဒိယာ၊ ယုဝါ သပတိ ဟန္တိ [သမ္ပဋိဟန္တိ (က.)] ဝါ၊
သဗ္ဗံ တံ ခမတေ ဓီရော၊ ပဏ္ဍိတော တံ တိတိက္ခတိ.
၄၆. သစေပိ သန္တော ဝိဝဒန္တိ၊ ခိပ္ပံ သန္ဓီယရေ ပုန၊
ဗာလာ ပတ္တာဝ ဘိဇ္ဇန္တိ၊ န တေ သမထမဇ္ဈဂူ.
၄၇. ဧတေ ဘိယျော သမာယန္တိ၊ သန္ဓိ တေသံ န ဇီရတိ၊
ယော စာဓိပန္နံ ဇာနာတိ၊ ယော စ ဇာနာတိ ဒေသနံ.
၄၈. ဧသော ဟိ ဥတ္တရိတရော၊ ဘာရဝဟော ဓုရဒ္ဓရော၊
ယော ပရေသာဓိပန္နာနံ၊ သယံ သန္ဓာတုမရဟတီတိ.
ကဿပမန္ဒိယဇာတကံ ဒုတိယံ.