၃၁၁. ပုစိမန္ဒဇာတကံ (၄-၂-၁)

၄၁. ဥဋ္ဌေဟိ စောရ ကိံ သေသိ၊ ကော အတ္ထော သုပနေန [သုပိတေန (သီ.)၊ သုပိနေန (ပီ. က.)] တေ၊

မာ တံ ဂဟေသုံ [ဂဏှေယျုံ (က.)] ရာဇာနော၊ ဂါမေ ကိဗ္ဗိသကာရကံ.

၄၂. ယံ နု [နူန (သျာ.)] စောရံ ဂဟေဿန္တိ၊ ဂါမေ ကိဗ္ဗိသကာရကံ၊

ကိံ တတ္ထ ပုစိမန္ဒဿ၊ ဝနေ ဇာတဿ တိဋ္ဌတော.

၄၃. န တွံ အဿတ္ထ ဇာနာသိ၊ မမ စောရဿ စန္တရံ၊

စောရံ ဂဟေတွာ ရာဇာနော၊ ဂါမေ ကိဗ္ဗိသကာရကံ၊

အပ္ပေန္တိ [အစ္စေန္တိ (သျာ.)] နိမ္ဗသူလသ္မိံ၊ တသ္မိံ မေ သင်္ကတေ မနော.

၄၄. သင်္ကေယျ သင်္ကိတဗ္ဗာနိ၊ ရက္ခေယျာနာဂတံ ဘယံ၊

အနာဂတဘယာ ဓီရော၊ ဥဘော လောကေ အဝေက္ခတီတိ.

ပုစိမန္ဒဇာတကံ ပဌမံ.