၃၀၉. ဆဝကဇာတကံ (၄-၁-၉)

၃၃. သဗ္ဗမိဒံ စရိမံ ကတံ [စရိမဝတံ (သီ. ပီ.)]၊ ဥဘော ဓမ္မံ န ပဿရေ၊

ဥဘော ပကတိယာ စုတာ၊ ယော စာယံ မန္တေဇ္ဈာပေတိ [မန္တဇ္ဈာယတိ (သီ.)၊ သဇ္ဈာပယတိ (ပီ.)]၊

ယော စ မန္တံ အဓီယတိ.

၃၄. သာလီနံ ဩဒနံ ဘုဉ္ဇေ၊ သုစိံ မံသူပသေစနံ၊

တသ္မာ ဧတံ န သေဝါမိ၊ ဓမ္မံ ဣသီဟိ သေဝိတံ.

၃၅. ပရိဗ္ဗဇ မဟာ လောကော [မဟာဗြဟ္မေ (က.)]၊ ပစန္တညေပိ ပါဏိနော၊

မာ တံ အဓမ္မော အာစရိတော၊ အသ္မာ ကုမ္ဘမိဝါဘိဒါ.

၃၆. ဓိရတ္ထု တံ ယသလာဘံ၊ ဓနလာဘဉ္စ ဗြာဟ္မဏ၊

ယာ ဝုတ္တိ ဝိနိပါတေန၊ အဓမ္မစရဏေန ဝါတိ.

ဆဝကဇာတကံ နဝမံ.