၃၁၀. သေယျဇာတကံ (၄-၁-၁၀)

၃၇. သသမုဒ္ဒပရိယာယံ၊ မဟိံ သာဂရကုဏ္ဍလံ၊

န ဣစ္ဆေ သဟ နိန္ဒာယ၊ ဧဝံ သေယျ [သယှ (သီ. သျာ. ပီ.)] ဝိဇာနဟိ.

၃၈. ဓိရတ္ထု တံ ယသလာဘံ၊ ဓနလာဘဉ္စ ဗြာဟ္မဏ၊

ယာ ဝုတ္တိ ဝိနိပါတေန၊ အဓမ္မစရဏေန ဝါ.

၃၉. အပိ စေ ပတ္တမာဒါယ၊ အနဂါရော ပရိဗ္ဗဇေ၊

သာယေဝ ဇီဝိကာ သေယျော၊ ယာ စာဓမ္မေန ဧသနာ.

၄၀. အပိ စေ ပတ္တမာဒါယ၊ အနဂါရော ပရိဗ္ဗဇေ၊

အညံ အဟိံသယံ လောကေ၊ အပိ ရဇ္ဇေန တံ ဝရန္တိ.

သေယျဇာတကံ [သယှဇာတကံ (သီ. သျာ. ပီ.)] ဒသမံ.

ကာလိင်္ဂဝဂ္ဂေါ [ဝိဝရဝဂ္ဂေါ (သီ. ပီ.)] ပဌမော.

တဿုဒ္ဒါနံ –

ဝိဝရဉ္စ အဒေယျ သမိဒ္ဓဝရံ၊ အထ ဒဒ္ဒရ ပါပမဟာတိရဟော၊

အထ ကောလိ ပလာသဝရဉ္စ ကရ၊ စရိမံ သသမုဒ္ဒဝရေန ဒသာတိ.