၃၀၆. သုဇာတဇာတကံ (၄-၁-၆)

၂၁. ကိမဏ္ဍကာ ဣမေ ဒေဝ၊ နိက္ခိတ္တာ ကံသမလ္လကေ၊

ဥပလောဟိတကာ ဝဂ္ဂူ၊ တံ [တေ (ပီ.)] မေ အက္ခာဟိ ပုစ္ဆိတော.

၂၂. ယာနိ ပုရေ တုဝံ ဒေဝိ၊ ဘဏ္ဍု နန္တကဝါသိနီ၊

ဥစ္ဆင်္ဂဟတ္ထာ ပစိနာသိ၊ တဿာ တေ ကောလိယံ ဖလံ.

၂၃. ဥဍ္ဍယှတေ န ရမတိ၊ ဘောဂါ ဝိပ္ပဇဟန္တိ တံ [ဝိပ္ပဇဟန္တိ’မံ (?)]၊

တတ္ထေဝိမံ ပဋိနေထ၊ ယတ္ထ ကောလံ ပစိဿတိ.

၂၄. ဟောန္တိ ဟေတေ မဟာရာဇ၊ ဣဒ္ဓိပ္ပတ္တာယ [ဣဒ္ဓိမတ္တာယ (က.)] နာရိယာ၊

ခမ ဒေဝ သုဇာတာယ၊ မာဿာ [မာသု (က.)] ကုဇ္ဈ ရထေသဘာတိ.

သုဇာတဇာတကံ ဆဋ္ဌံ.