၃၀၇. ပလာသဇာတကံ (၄-၁-၇)

၂၅. အစေတနံ ဗြာဟ္မဏ အဿုဏန္တံ၊ ဇာနော အဇာနန္တမိမံ ပလာသံ၊

အာရဒ္ဓဝိရိယော ဓုဝံ အပ္ပမတ္တော၊ သုခသေယျံ ပုစ္ဆသိ ကိဿ ဟေတု.

၂၆. ဒူရေ သုတော စေဝ ဗြဟာ စ ရုက္ခော၊ ဒေသေ ဌိတော ဘူတနိဝါသရူပေါ၊

တသ္မာ နမဿာမိ ဣမံ ပလာသံ၊ ယေ စေတ္ထ ဘူတာ တေ [တေ စ (သီ. ပီ.)] ဓနဿ ဟေတု.

၂၇. သော တေ ကရိဿာမိ ယထာနုဘာဝံ၊ ကတညုတံ ဗြာဟ္မဏ ပေက္ခမာနော၊

ကထဉှိ အာဂမ္မ သတံ သကာသေ၊ မောဃာနိ တေ အဿု ပရိဖန္ဒိတာနိ.

၂၈. ယော တိန္ဒုကရုက္ခဿ ပရော [ပုရော (က.)] ပိလက္ခော [ပိလက္ခု (သီ. ပီ.)၊ မိလက္ခု (က.)]၊ ပရိဝါရိတော ပုဗ္ဗယညော ဥဠာရော၊

တဿေသ မူလသ္မိံ နိဓိ နိခါတော၊ အဒါယာဒေါ ဂစ္ဆ တံ ဥဒ္ဓရာဟီတိ.

ပလာသဇာတကံ သတ္တမံ.