၃၀၄. ဒဒ္ဒရဇာတကံ (၄-၁-၄)

၁၃. ဣမာနိ မံ ဒဒ္ဒရ တာပယန္တိ၊ ဝါစာဒုရုတ္တာနိ မနုဿလောကေ၊

မဏ္ဍူကဘက္ခာ ဥဒကန္တသေဝီ၊ အာသီဝိသံ မံ အဝိသာ သပန္တိ.

၁၄. သကာ ရဋ္ဌာ ပဗ္ဗာဇိတော၊ အညံ ဇနပဒံ ဂတော၊

မဟန္တံ ကောဋ္ဌံ ကယိရာထ၊ ဒုရုတ္တာနံ [ဒုရုတ္တာနိ (က.)] နိဓေတဝေ.

၁၅. ယတ္ထ ပေါသံ န ဇာနန္တိ၊ ဇာတိယာ ဝိနယေန ဝါ၊

န တတ္ထ မာနံ ကယိရာထ၊ ဝသမညာတကေ ဇနေ.

၁၆. ဝိဒေသဝါသံ ဝသတော၊ ဇာတဝေဒသမေနပိ [ဇာတဝေဒဘယေနပိ (က.)]၊

ခမိတဗ္ဗံ သပညေန၊ အပိ ဒါသဿ တဇ္ဇိတန္တိ.

ဒဒ္ဒရဇာတကံ စတုတ္ထံ.