၂၆၅. ခုရပ္ပဇာတကံ (၃-၂-၅)
၄၃. ဒိသွာ ခုရပ္ပေ ဓနုဝေဂနုန္နေ၊ ခဂ္ဂေ ဂဟီတေ တိခိဏေ တေလဓောတေ၊
တသ္မိံ ဘယသ္မိံ မရဏေ ဝိယူဠှေ၊ ကသ္မာ နု တေ နာဟု ဆမ္ဘိတတ္တံ.
၄၄. ဒိသွာ ခုရပ္ပေ ဓနုဝေဂနုန္နေ၊ ခဂ္ဂေ ဂဟီတေ တိခိဏေ တေလဓောတေ၊
တသ္မိံ ဘယသ္မိံ မရဏေ ဝိယူဠှေ၊ ဝေဒံ အလတ္ထံ ဝိပုလံ ဥဠာရံ.
၄၅. သော ဝေဒဇာတော အဇ္ဈဘဝိံ အမိတ္တေ၊ ပုဗ္ဗေဝ မေ ဇီဝိတမာသိ စတ္တံ၊
န ဟိ ဇီဝိတေ အာလယံ ကုဗ္ဗမာနော၊ သူရော ကယိရာ သူရကိစ္စံ ကဒါစီတိ.
ခုရပ္ပဇာတကံ ပဉ္စမံ.