၂၅၆. ဇရူဒပါနဇာတကံ (၃-၁-၆)

၁၆. ဇရူဒပါနံ ခဏမာနာ၊ ဝါဏိဇာ ဥဒကတ္ထိကာ၊

အဇ္ဈဂမုံ အယသံ လောဟံ [အဇ္ဈဂံသု အယောလောဟံ (သီ. သျာ. ပီ.)]၊ တိပုသီသဉ္စ ဝါဏိဇာ၊

ရဇတံ ဇာတရူပဉ္စ၊ မုတ္တာ ဝေဠူရိယာ ဗဟူ.

၁၇. တေ စ တေန အသန္တုဋ္ဌာ၊ ဘိယျော ဘိယျော အခါဏိသုံ၊

တေ တတ္ထာသီဝိသော [တတ္ထ အာသီဝိသော (က.)၊ တတ္ထပါသီဝိသော (သျာ.)] ဃောရော၊ တေဇဿီ တေဇသာ ဟနိ.

၁၈. တသ္မာ ခဏေ နာတိခဏေ၊ အတိခါတံ [အတိခဏံ (က.)] ဟိ ပါပကံ၊

ခါတေန စ [ခဏေန စ (က.)၊ ခဏနေန (သျာ.)] ဓနံ လဒ္ဓံ၊ အတိခါတေန [အတိခဏေန (က.)] နာသိတန္တိ.

ဇရူဒပါနဇာတကံ ဆဋ္ဌံ.