၅၄၅. မဟာနာရဒကဿပဇာတကံ (၈)

၁၁၅၃. ‘‘အဟု ရာဇာ ဝိဒေဟာနံ၊ အင်္ဂတိ [အင်္ဂါတိ (သီ.) ဧဝမုပရိပိ] နာမ ခတ္တိယော၊

ပဟူတယောဂ္ဂေါ ဓနိမာ၊ အနန္တဗလပေါရိသော.

၁၁၅၄. သော စ ပန္နရသိံ [ပန္နရသေ (သျာ. က.)] ရတ္တိံ၊ ပုရိမယာမေ အနာဂတေ၊

စာတုမာသာ [စာတုမဿ (သီ. ပီ.)] ကောမုဒိယာ၊ အမစ္စေ သန္နိပါတယိ.

၁၁၅၅. ‘‘ပဏ္ဍိတေ သုတသမ္ပန္နေ၊ မိတပုဗ္ဗေ [မိဟိတပုဗ္ဗေ (သီ. ပီ.)] ဝိစက္ခဏေ၊

ဝိဇယဉ္စ သုနာမဉ္စ၊ သေနာပတိံ အလာတကံ.

၁၁၅၆. ‘‘တမနုပုစ္ဆိ ဝေဒေဟော၊ ‘‘ပစ္စေကံ ဗြူထ သံ ရုစိံ၊

စာတုမာသာ ကောမုဒဇ္ဇ၊ ဇုဏှံ ဗျပဟတံ [ဗျပဂတံ (သီ. ပီ.)] တမံ၊

ကာယဇ္ဇ ရတိယာ ရတ္တိံ၊ ဝိဟရေမု ဣမံ ဥတုံ’’.

၁၁၅၇. ‘‘တတော သေနာပတိ ရညော၊ အလာတော ဧတဒဗြဝိ၊

‘‘ဟဋ္ဌံ ယောဂ္ဂံ ဗလံ သဗ္ဗံ၊ သေနံ သန္နာဟယာမသေ.

၁၁၅၈. ‘‘နိယျာမ ဒေဝ ယုဒ္ဓါယ၊ အနန္တဗလပေါရိသာ၊

ယေ တေ ဝသံ န အာယန္တိ၊ ဝသံ ဥပနယာမသေ [ဥပနိယျာမသေ (က.)]၊

ဧသာ မယှံ သကာ ဒိဋ္ဌိ၊ အဇိတံ ဩဇိနာမသေ.

၁၁၅၉. အလာတဿ ဝစော သုတွာ၊ သုနာမော ဧတဒဗြဝိ၊

‘‘သဗ္ဗေ တုယှံ မဟာရာဇ၊ အမိတ္တာ ဝသမာဂတာ.

၁၁၆၀. ‘‘နိက္ခိတ္တသတ္ထာ ပစ္စတ္ထာ၊ နိဝါတမနုဝတ္တရေ၊

ဥတ္တမော ဥဿဝေါ အဇ္ဇ၊ န ယုဒ္ဓံ မမ ရုစ္စတိ.

၁၁၆၁. ‘‘အန္နပါနဉ္စ ခဇ္ဇဉ္စ၊ ခိပ္ပံ အဘိဟရန္တု တေ၊

ရမဿု ဒေဝ ကာမေဟိ၊ နစ္စဂီတေ သုဝါဒိတေ’’.

၁၁၆၂. သုနာမဿ ဝစော သုတွာ၊ ဝိဇယော ဧတဒဗြဝိ၊

‘‘သဗ္ဗေ ကာမာ မဟာရာဇ၊ နိစ္စံ တဝ မုပဋ္ဌိတာ.

၁၁၆၃. ‘‘န ဟေတေ ဒုလ္လဘာ ဒေဝ၊ တဝ ကာမေဟိ မောဒိတုံ၊

သဒါပိ ကာမာ သုလဘာ၊ နေတံ စိတ္တမတံ [စိတ္တံ မတီ (က.)] မမ.

၁၁၆၄. ‘‘သမဏံ ဗြာဟ္မဏံ ဝါပိ၊ ဥပါသေမု ဗဟုဿုတံ၊

ယော နဇ္ဇ ဝိနယေ ကင်္ခံ၊ အတ္ထဓမ္မဝိဒူ ဣသေ’’.

၁၁၆၅. ဝိဇယဿ ဝစော သုတွာ၊ ရာဇာ အင်္ဂတိ မဗြဝိ၊

‘‘ယထာ ဝိဇယော ဘဏတိ၊ မယှမ္ပေတံဝ ရုစ္စတိ.

၁၁၆၆. ‘‘သမဏံ ဗြာဟ္မဏံ ဝါပိ၊ ဥပါသေမု ဗဟုဿုတံ၊

ယော နဇ္ဇ ဝိနယေ ကင်္ခံ၊ အတ္ထဓမ္မဝိဒူ ဣသေ.

၁၁၆၇. ‘‘သဗ္ဗေဝ သန္တာ ကရောထ မတိံ၊ ကံ ဥပါသေမု ပဏ္ဍိတံ၊

ယော [ကော (သီ. ပီ.)] နဇ္ဇ ဝိနယေ ကင်္ခံ၊ အတ္ထဓမ္မဝိဒူ ဣသေ’’.

၁၁၆၈. ‘‘ဝေဒေဟဿ ဝစော သုတွာ၊ အလာတော ဧတဒဗြဝိ၊

‘‘အတ္ထာယံ မိဂဒါယသ္မိံ၊ အစေလော ဓီရသမ္မတော.

၁၁၆၉. ‘‘ဂုဏော ကဿပဂေါတ္တာယံ၊ သုတော စိတြကထီ ဂဏီ၊

တံ ဒေဝ [တဒေဝ (က.)] ပယိရုပါသေမု [ပယိရုပါသယ (သီ. ပီ.)]၊ သော နော ကင်္ခံ ဝိနေဿတိ’’.

၁၁၇၀. ‘‘အလာတဿ ဝစော သုတွာ၊ ရာဇာ စောဒေသိ သာရထိံ၊

‘‘မိဂဒါယံ ဂမိဿာမ၊ ယုတ္တံ ယာနံ ဣဓာနယ’’.

၁၁၇၁. တဿ ယာနံ အယောဇေသုံ၊ ဒန္တံ ရူပိယပက္ခရံ [ရူပိယုပက္ခရံ (က.)]၊

သုက္ကမဋ္ဌပရိဝါရံ၊ ပဏ္ဍရံ ဒေါသိနာမုခံ.

၁၁၇၂. ‘‘တတြာသုံ ကုမုဒါယုတ္တာ၊ စတ္တာရော သိန္ဓဝါ ဟယာ၊

အနိလူပမသမုပ္ပါတာ [အနိလူပမသမုပ္ပါဒါ (က.)]၊ သုဒန္တာ သောဏ္ဏမာလိနော.

၁၁၇၃. ‘‘သေတစ္ဆတ္တံ သေတရထော၊ သေတဿာ သေတဗီဇနီ၊

ဝေဒေဟော သဟမစ္စေဟိ၊ နိယျံ စန္ဒောဝ သောဘတိ.

၁၁၇၄. ‘‘တမနုယာယိံသု ဗဟဝေါ၊ ဣန္ဒိခဂ္ဂဓရာ [ဣန္ဒခဂ္ဂဓရာ (သီ.)၊ ဣဋ္ဌိခဂ္ဂဓရာ (ပီ.)] ဗလီ၊

အဿပိဋ္ဌိဂတာ ဝီရာ၊ နရာ နရဝရာဓိပံ.

၁၁၇၅. သော မုဟုတ္တံဝ ယာယိတွာ၊ ယာနာ ဩရုယှ ခတ္တိယော၊

ဝေဒေဟော သဟမစ္စေဟိ၊ ပတ္တီ ဂုဏမုပါဂမိ.

၁၁၇၆. ယေပိ တတ္ထ တဒါ အာသုံ၊ ဗြာဟ္မဏိဗ္ဘာ သမာဂတာ၊

န တေ အပနယီ ရာဇာ၊ အကတံ ဘူမိမာဂတေ.

၁၁၇၇. ‘‘တတော သော မုဒုကာ ဘိသိယာ၊ မုဒုစိတ္တကသန္ထတေ [မုဒုစိတ္တကဠန္ဒကေ (သီ. ပီ.)]၊

မုဒုပစ္စတ္ထတေ ရာဇာ၊ ဧကမန္တံ ဥပါဝိသိ.

၁၁၇၈. ‘‘နိသဇ္ဇ ရာဇာ သမ္မောဒိ၊ ကထံ သာရဏိယံ တတော၊

‘‘ကစ္စိ ယာပနိယံ ဘန္တေ၊ ဝါတာနမဝိယဂ္ဂတာ [ဝါတာနမဝိသဂ္ဂတာ (သီ. ပီ.)၊ ဝါတာနမဝိယတ္တတာ (သျာ.)].

၁၁၇၉. ‘‘ကစ္စိ အကသိရာ ဝုတ္တိ၊ လဘသိ [လဗ္ဘတိ (သီ. ပီ.)] ပိဏ္ဍယာပနံ [ပိဏ္ဍိယာပနံ (သျာ. က.)]၊

အပါဗာဓော စသိ ကစ္စိ၊ စက္ခုံ န ပရိဟာယတိ’’.

၁၁၈၀. တံ ဂုဏော ပဋိသမ္မောဒိ၊ ဝေဒေဟံ ဝိနယေ ရတံ၊

‘‘ယာပနီယံ မဟာရာဇ၊ သဗ္ဗမေတံ တဒူဘယံ.

၁၁၈၁. ‘‘ကစ္စိ တုယှမ္ပိ ဝေဒေဟ၊ ပစ္စန္တာ န ဗလီယရေ၊

ကစ္စိ အရောဂံ ယောဂ္ဂံ တေ၊ ကစ္စိ ဝဟတိ ဝါဟနံ၊

ကစ္စိ တေ ဗျာဓယော နတ္ထိ၊ သရီရဿုပတာပိယာ’’ [သရီရဿုပတာပိကာ (သီ. ပီ.)၊ သရီရဿုပတာပနာ (?)].

၁၁၈၂. ပဋိသမ္မောဒိတော ရာဇာ၊ တတော ပုစ္ဆိ အနန္တရာ၊

အတ္ထံ ဓမ္မဉ္စ ဉာယဉ္စ၊ ဓမ္မကာမော ရထေသဘော.

၁၁၈၃. ‘‘ကထံ ဓမ္မံ စရေ မစ္စော၊ မာတာပိတူသု ကဿပ၊

ကထံ စရေ အာစရိယေ၊ ပုတ္တဒါရေ ကထံ စရေ.

၁၁၈၄. ‘‘ကထံ စရေယျ ဝုဍ္ဎေသု၊ ကထံ သမဏဗြာဟ္မဏေ၊

ကထဉ္စ ဗလကာယသ္မိံ၊ ကထံ ဇနပဒေ စရေ.

၁၁၈၅. ‘‘ကထံ ဓမ္မံ စရိတွာန၊ မစ္စာ ဂစ္ဆန္တိ [ပေစ္စ ဂစ္ဆတိ (သီ. သျာ. ပီ.)] သုဂ္ဂတိံ၊

ကထဉ္စေကေ အဓမ္မဋ္ဌာ၊ ပတန္တိ နိရယံ အထော’’.

၁၁၈၆. ‘‘ဝေဒေဟဿ ဝစော သုတွာ၊ ကဿပေါ ဧတဒဗြဝိ၊

‘‘‘သုဏောဟိ မေ မဟာရာဇ၊ သစ္စံ အဝိတထံ ပဒံ.

၁၁၈၇. ‘‘‘နတ္ထိ ဓမ္မစရိတဿ [ဓမ္မဿ စိဏ္ဏဿ (သီ.)]၊ ဖလံ ကလျာဏပါပကံ၊

နတ္ထိ ဒေဝ ပရော လောကော၊ ကော တတော ဟိ ဣဓာဂတော.

၁၁၈၈. ‘‘‘နတ္ထိ ဒေဝ ပိတရော ဝါ၊ ကုတော မာတာ ကုတော ပိတာ၊

နတ္ထိ အာစရိယော နာမ၊ အဒန္တံ ကော ဒမေဿတိ.

၁၁၈၉. ‘‘‘သမတုလျာနိ ဘူတာနိ၊ နတ္ထိ ဇေဋ္ဌာပစာယိကာ၊

နတ္ထိ ဗလံ ဝီရိယံ ဝါ၊ ကုတော ဥဋ္ဌာနပေါရိသံ၊

နိယတာနိ ဟိ ဘူတာနိ၊ ယထာ ဂေါဋဝိသော တထာ.

၁၁၉၀. ‘‘‘လဒ္ဓေယျံ လဘတေ မစ္စော၊ တတ္ထ ဒါနဖလံ ကုတော၊

နတ္ထိ ဒါနဖလံ ဒေဝ၊ အဝသော ဒေဝဝီရိယော.

၁၁၉၁. ‘‘‘ဗာလေဟိ ဒါနံ ပညတ္တံ၊ ပဏ္ဍိတေဟိ ပဋိစ္ဆိတံ၊

အဝသာ ဒေန္တိ ဓီရာနံ၊ ဗာလာ ပဏ္ဍိတမာနိနော.

၁၁၉၂. ‘‘‘သတ္တိမေ သဿတာ ကာယာ၊ အစ္ဆေဇ္ဇာ အဝိကောပိနော၊

တေဇော ပထဝီ အာပေါ စ၊ ဝါယော သုခံ ဒုခဉ္စိမေ၊

ဇီဝေ စ သတ္တိမေ ကာယာ၊ ယေသံ ဆေတ္တာ န ဝိဇ္ဇတိ.

၁၁၉၃. ‘‘‘နတ္ထိ ဟန္တာ ဝ ဆေတ္တာ ဝါ၊ ဟညေ ယေဝါပိ [ဟညရေ ဝါပိ (သီ. သျာ. ပီ.)] ကောစိ နံ၊

အန္တရေနေဝ ကာယာနံ၊ သတ္ထာနိ ဝီတိဝတ္တရေ.

၁၁၉၄. ‘‘‘ယော စာပိ [ယောပါယံ (သီ. ပီ.)၊ ယော စာယံ (သျာ. က.)] သိရမာဒါယ၊ ပရေသံ နိသိတာသိနာ၊

န သော ဆိန္ဒတိ တေ ကာယေ၊ တတ္ထ ပါပဖလံ ကုတော.

၁၁၉၅. ‘‘‘စုလ္လာသီတိမဟာကပ္ပေ၊ သဗ္ဗေ သုဇ္ဈန္တိ သံသရံ၊

အနာဂတေ တမှိ ကာလေ၊ သညတောပိ န သုဇ္ဈတိ.

၁၁၉၆. ‘‘‘စရိတွာပိ ဗဟုံ ဘဒြံ၊ နေဝ သုဇ္ဈန္တိနာဂတေ၊

ပါပဉ္စေပိ ဗဟုံ ကတွာ၊ တံ ခဏံ နာတိဝတ္တရေ.

၁၁၉၇. ‘‘‘အနုပုဗ္ဗေန နော သုဒ္ဓိ၊ ကပ္ပါနံ စုလ္လသီတိယာ၊

နိယတိံ နာတိဝတ္တာမ၊ ဝေလန္တမိဝ သာဂရော’’’.

၁၁၉၈. ကဿပဿ ဝစော သုတွာ၊ အလာတော ဧတဒဗြဝိ၊

‘‘ယထာ ဘဒန္တော ဘဏတိ၊ မယှမ္ပေတံဝ ရုစ္စတိ.

၁၁၉၉. ‘‘အဟမ္ပိ ပုရိမံ ဇာတိံ၊ သရေ သံသရိတတ္တနော၊

ပိင်္ဂလော နာမဟံ အာသိံ၊ လုဒ္ဒေါ ဂေါဃာတကော ပုရေ.

၁၂၀၀. ‘‘ဗာရာဏသိယံ ဖီတာယံ၊ ဗဟုံ ပါပံ ကတံ မယာ၊

ဗဟူ မယာ ဟတာ ပါဏာ၊ မဟိံသာ သူကရာ အဇာ.

၁၂၀၁. ‘‘တတော စုတော ဣဓ ဇာတော၊ ဣဒ္ဓေ သေနာပတီကုလေ၊

နတ္ထိ နူန ဖလံ ပါပံ၊ ယောဟံ [ပါပေ သောဟံ (သီ. ပီ.)] န နိရယံ ဂတော.

၁၂၀၂. အထေတ္ထ ဗီဇကော နာမ၊ ဒါသော အာသိ ပဋစ္စရီ [ပဠစ္စရီ (သီ. ပီ.)၊ ပဋဇ္ဇရီ (က.)]၊

ဥပေါသထံ ဥပဝသန္တော၊ ဂုဏသန္တိကုပါဂမိ.

၁၂၀၃. ကဿပဿ ဝစော သုတွာ၊ အလာတဿ စ ဘာသိတံ၊

ပဿသန္တော မုဟုံ ဥဏှံ၊ ရုဒံ အဿူနိ ဝတ္တယိ.

၁၂၀၄. တမနုပုစ္ဆိ ဝေဒေဟော၊ ‘‘ကိမတ္ထံ သမ္မ ရောဒသိ၊

ကိံ တေ သုတံ ဝါ ဒိဋ္ဌံ ဝါ၊ ကိံ မံ ဝေဒေသိ ဝေဒနံ’’.

၁၂၀၅. ဝေဒေဟဿ ဝစော သုတွာ၊ ဗီဇကော ဧတဒဗြဝိ၊

‘‘နတ္ထိ မေ ဝေဒနာ ဒုက္ခာ၊ မဟာရာဇ သုဏောဟိ မေ.

၁၂၀၆. ‘‘အဟမ္ပိ ပုရိမံ ဇာတိံ၊ သရာမိ သုခမတ္တနော၊

သာကေတာဟံ ပုရေ အာသိံ၊ ဘာဝသေဋ္ဌိ ဂုဏေ ရတော.

၁၂၀၇. ‘‘သမ္မတော ဗြာဟ္မဏိဗ္ဘာနံ၊ သံဝိဘာဂရတော သုစိ၊

န စာပိ ပါပကံ ကမ္မံ၊ သရာမိ ကတမတ္တနော.

၁၂၀၈. ‘‘တတော စုတာဟံ ဝေဒေဟ၊ ဣဓ ဇာတော ဒုရိတ္ထိယာ၊

ဂဗ္ဘမှိ ကုမ္ဘဒါသိယာ၊ ယတော ဇာတော သုဒုဂ္ဂတော.

၁၂၀၉. ‘‘ဧဝမ္ပိ ဒုဂ္ဂတော သန္တော၊ သမစရိယံ အဓိဋ္ဌိတော၊

ဥပဍ္ဎဘာဂံ ဘတ္တဿ၊ ဒဒါမိ ယော မေ ဣစ္ဆတိ.

၁၂၁၀. ‘‘စာတုဒ္ဒသိံ ပဉ္စဒသိံ၊ သဒါ ဥပဝသာမဟံ၊

န စာပိ [န အဟံ (က.)] ဘူတေ ဟိံသာမိ၊ ထေယျဉ္စာပိ ဝိဝဇ္ဇယိံ.

၁၂၁၁. ‘‘သဗ္ဗမေဝ ဟိ နူနေတံ၊ သုစိဏ္ဏံ ဘဝတိ နိပ္ဖလံ၊

နိရတ္ထံ မညိဒံ သီလံ၊ အလာတော ဘာသတီ ယထာ.

၁၂၁၂. ‘‘ကလိမေဝ နူန ဂဏှာမိ၊ အသိပ္ပေါ ဓုတ္တကော ယထာ၊

ကဋံ အလာတော ဂဏှာတိ၊ ကိတဝေါသိက္ခိတော ယထာ.

၁၂၁၃. ‘‘ဒွါရံ နပ္ပဋိပဿာမိ၊ ယေန ဂစ္ဆာမိ သုဂ္ဂတိံ၊

တသ္မာ ရာဇ ပရောဒါမိ၊ သုတွာ ကဿပဘာသိတံ’’.

၁၂၁၄. ဗီဇကဿ ဝစော သုတွာ၊ ရာဇာ အင်္ဂတိ မဗြဝိ၊

‘‘နတ္ထိ ဒွါရံ သုဂတိယာ၊ နိယတိံ [နိယတံ (သျာ.)] ကင်္ခ ဗီဇက.

၁၂၁၅. ‘‘သုခံ ဝါ ယဒိ ဝါ ဒုက္ခံ၊ နိယတိယာ ကိရ လဗ္ဘတိ၊

သံသာရသုဒ္ဓိ သဗ္ဗေသံ၊ မာ တုရိတ္ထော [တုရိတော (သျာ.)] အနာဂတေ.

၁၂၁၆. ‘‘အဟမ္ပိ ပုဗ္ဗေ ကလျာဏော၊ ဗြာဟ္မဏိဗ္ဘေသု ဗျာဝဋော [ဝါဝဋော (က.)]၊

ဝေါဟာရမနုသာသန္တော၊ ရတိဟီနော တဒန္တရာ’’.

၁၂၁၇. ‘‘ပုနပိ ဘန္တေ ဒက္ခေမု၊ သင်္ဂတိ စေ ဘဝိဿတိ’’၊

ဣဒံ ဝတွာန ဝေဒေဟော၊ ပစ္စဂါ သနိဝေသနံ.

၁၂၁၈. တတော ရတျာ ဝိဝသာနေ၊ ဥပဋ္ဌာနမှိ အင်္ဂတိ၊

အမစ္စေ သန္နိပါတေတွာ၊ ဣဒံ ဝစနမဗြဝိ.

၁၂၁၉. ‘‘စန္ဒကေ မေ ဝိမာနသ္မိံ၊ သဒါ ကာမေ ဝိဓေန္တု မေ၊

မာ ဥပဂစ္ဆုံ အတ္ထေသု၊ ဂုယှပ္ပကာသိယေသု စ.

၁၂၂၀. ‘‘ဝိဇယော စ သုနာမော စ၊ သေနာပတိ အလာတကော၊

ဧတေ အတ္ထေ နိသီဒန္တု၊ ဝေါဟာရကုသလာ တယော’’.

၁၂၂၁. ဣဒံ ဝတွာန ဝေဒေဟော၊ ကာမေဝ ဗဟုမညထ၊

န စာပိ ဗြာဟ္မဏိဗ္ဘေသု၊ အတ္ထေ ကိသ္မိဉ္စိ ဗျာဝဋော.

၁၂၂၂. တတော ဒွေသတ္တရတ္တဿ၊ ဝေဒေဟဿတြဇာ ပိယာ၊

ရာဇကညာ ရုစာ [ရုဇာ (သီ. ပီ.) ဧဝမုပရိပိ] နာမ၊ ဓာတိမာတရမဗြဝိ.

၁၂၂၃. ‘အလင်္ကရောထ မံ ခိပ္ပံ၊ သခိယော စာလင်္ကရောန္တု [စ ကရောန္တု (သီ. ပီ.)] မေ၊

သုဝေ ပန္နရသော ဒိဗျော၊ ဂစ္ဆံ ဣဿရသန္တိကေ’ [ပိတုဿ သန္တိကေ (သျာ.)].

၁၂၂၄. တဿာ မာလျံ အဘိဟရိံသု၊ စန္ဒနဉ္စ မဟာရဟံ၊

မဏိသင်္ခမုတ္တာရတနံ၊ နာနာရတ္တေ စ အမ္ဗရေ.