၈. ကာသာဝဝဂ္ဂေါ

၂၂၁. ကာသာဝဇာတကံ (၂-၈-၁)

၁၄၁. အနိက္ကသာဝေါ ကာသာဝံ၊ ယော ဝတ္ထံ ပရိဒဟိဿတိ [ပရိဒဟေဿတိ (သီ. ပီ.)]၊

အပေတော ဒမသစ္စေန၊ န သော ကာသာဝမရဟတိ.

၁၄၂. ယော စ ဝန္တကသာဝဿ၊ သီလေသု သုသမာဟိတော၊

ဥပေတော ဒမသစ္စေန၊ သ ဝေ ကာသာဝမရဟတီတိ.

ကာသာဝဇာတကံ ပဌမံ.

၂၂၂. စူဠနန္ဒိယဇာတကံ (၂-၈-၂)

၁၄၃. ဣဒံ တဒါစရိယဝစော၊ ပါရာသရိယော ယဒဗြဝိ [ပေါရာဏာစရိယောဗြဝိ (က.)]၊

မာသု တွံ အကရိ [အကရာ (သီ. ပီ.)] ပါပံ၊ ယံ တွံ ပစ္ဆာ ကတံ တပေ.

၁၄၄. ယာနိ ကရောတိ ပုရိသော၊ တာနိ အတ္တနိ ပဿတိ၊

ကလျာဏကာရီ ကလျာဏံ၊ ပါပကာရီ စ ပါပကံ၊

ယာဒိသံ ဝပတေ ဗီဇံ၊ တာဒိသံ ဟရတေ ဖလန္တိ.

စူဠနန္ဒိယဇာတကံ ဒုတိယံ.

၂၂၃. ပုဋဘတ္တဇာတကံ (၂-၈-၃)

၁၄၅. နမေ နမန္တဿ ဘဇေ ဘဇန္တံ၊ ကိစ္စာနုကုဗ္ဗဿ ကရေယျ ကိစ္စံ၊

နာနတ္ထကာမဿ ကရေယျ အတ္ထံ၊ အသမ္ဘဇန္တမ္ပိ န သမ္ဘဇေယျ.

၁၄၆. စဇေ စဇန္တံ ဝနထံ န ကယိရာ၊ အပေတစိတ္တေန န သမ္ဘဇေယျ၊

ဒိဇော ဒုမံ ခီဏဖလန္တိ ဉတွာ၊ အညံ သမေက္ခေယျ မဟာ ဟိ လောကောတိ.

ပုဋဘတ္တဇာတကံ တတိယံ.

၂၂၄. ကုမ္ဘိလဇာတကံ (၂-၈-၄)

၁၄၇. ယဿေတေ စတုရော ဓမ္မာ၊ ဝါနရိန္ဒ ယထာ တဝ၊

သစ္စံ ဓမ္မော ဓိတိ စာဂေါ၊ ဒိဋ္ဌံ သော အတိဝတ္တတိ.

၁၄၈. ယဿ စေတေ န ဝိဇ္ဇန္တိ၊ ဂုဏာ ပရမဘဒ္ဒကာ၊

သစ္စံ ဓမ္မော ဓိတိ စာဂေါ၊ ဒိဋ္ဌံ သော နာတိဝတ္တတီတိ.

ကုမ္ဘိလဇာတကံ စတုတ္ထံ.

၂၂၅. ခန္တိဝဏ္ဏဇာတကံ (၂-၈-၅)

၁၄၉. အတ္ထိ မေ ပုရိသော ဒေဝ၊ သဗ္ဗကိစ္စေသု ဗျာဝဋော [ဝါဝဋော (က.)]၊

တဿ စေကောပရာဓတ္ထိ၊ တတ္ထ တွံ ကိန္တိ မညသိ.

၁၅၀. အမှာကမ္ပတ္ထိ ပုရိသော၊ ဧဒိသော ဣဓ ဝိဇ္ဇတိ၊

ဒုလ္လဘော အင်္ဂသမ္ပန္နော၊ ခန္တိရသ္မာက ရုစ္စတီတိ.

ခန္တိဝဏ္ဏဇာတကံ ပဉ္စမံ.

၂၂၆. ကောသိယဇာတကံ (၂-၈-၆)

၁၅၁. ကာလေ နိက္ခမနာ သာဓု၊ နာကာလေ သာဓု နိက္ခမော၊

အကာလေန ဟိ နိက္ခမ္မ၊ ဧကကမ္ပိ ဗဟုဇ္ဇနော၊

န ကိဉ္စိ အတ္ထံ ဇောတေတိ၊ ဓင်္ကသေနာဝ ကောသိယံ.

၁၅၂. ဓီရော စ ဝိဓိဝိဓာနညူ၊ ပရေသံ ဝိဝရာနုဂူ၊

သဗ္ဗာမိတ္တေ ဝသီကတွာ၊ ကောသိယောဝ သုခီ သိယာတိ.

ကောသိယဇာတကံ ဆဋ္ဌံ.

၂၂၇. ဂူထပါဏဇာတကံ (၂-၈-၇)

၁၅၃. သူရော သူရေန သင်္ဂမ္မ၊ ဝိက္ကန္တေန ပဟာရိနာ၊

ဧဟိ နာဂ နိဝတ္တဿု၊ ကိံ နု ဘီတော ပလာယသိ၊

ပဿန္တု အင်္ဂမဂဓာ၊ မမ တုယှဉ္စ ဝိက္ကမံ.

၁၅၄. န တံ ပါဒါ ဝဓိဿာမိ၊ န ဒန္တေဟိ န သောဏ္ဍိယာ၊

မီဠှေန တံ ဝဓိဿာမိ၊ ပူတိ ဟညတု ပူတိနာတိ.

ဂူထပါဏဇာတကံ သတ္တမံ.

၂၂၈. ကာမနီတဇာတကံ (၂-၈-၈)

၁၅၅. တယော ဂိရိံ အန္တရံ ကာမယာမိ၊ ပဉ္စာလာ ကုရုယော ကေကကေ စ [ကုရယော ကေကယေ စ (သီ.)]၊

တတုတ္တရိံ [တဒုတ္တရိံ (က.)] ဗြာဟ္မဏ ကာမယာမိ၊ တိကိစ္ဆ မံ ဗြာဟ္မဏ ကာမနီတံ.

၁၅၆. ကဏှာဟိဒဋ္ဌဿ ကရောန္တိ ဟေကေ၊ အမနုဿပဝိဋ္ဌဿ [အမနုဿဝဒ္ဓဿ (သီ. ပီ.)၊ အမနုဿဝိဋ္ဌဿ (သျာ.)] ကရောန္တိ ပဏ္ဍိတာ၊

န ကာမနီတဿ ကရောတိ ကောစိ၊ ဩက္ကန္တသုက္ကဿ ဟိ ကာ တိကိစ္ဆာတိ.

ကာမနီတဇာတကံ အဋ္ဌမံ.

၂၂၉. ပလာယိတဇာတကံ (၂-၈-၉)

၁၅၇. ဂဇဂ္ဂမေဃေဟိ ဟယဂ္ဂမာလိဘိ၊ ရထူမိဇာတေဟိ သရာဘိဝဿေဘိ [သရာဘိဝဿဘိ (သျာ. သီ. အဋ္ဌ.)၊ သရာဘိဝဿိဘိ (?)]၊

ထရုဂ္ဂဟာဝဋ္ဋ [ဓနုဂ္ဂဟာဝဋ္ဋ (က.)] ဒဠှပ္ပဟာရိဘိ၊ ပရိဝါရိတာ တက္ကသိလာ သမန္တတော.

၁၅၈. [အဘိဓာဝထာ စ ပတထာ စ၊ ဝိဝိဓဝိနဒိတာ စ ဒန္တိဘိ၊ ဝတ္တတဇ္ဇ တုမုလော ဃောသော၊ ယထာ ဝိဇ္ဇုတာ ဇလဓရဿ ဂဇ္ဇတောတိ၊ (သီ. ပီ. က.)] အဘိဓာဝထ စူပဓာဝထ စ [အဘိဓာဝထာ စုပ္ပတထာ စ (သျာ.)]၊ ဝိဝိဓာ ဝိနာဒိတာ [ဝိနာဒိတတ္ထ (က.)] ဝဒန္တိဘိ၊

ဝတ္တတဇ္ဇ တုမုလော ဃောသော ယထာ၊ ဝိဇ္ဇုလတာ ဇလဓရဿ ဂဇ္ဇတောတိ [အဘိဓာဝထာ စ ပတထာ စ၊ ဝိဝိဓဝိနဒိတာ စ ဒန္တိဘိ၊ ဝတ္တတဇ္ဇ တုမုလော ဃောသော၊ ယထာ ဝိဇ္ဇုတာ ဇလဓရဿ ဂဇ္ဇတောတိ၊ (သီ. ပီ. က.)].

ပလာယိတဇာတကံ နဝမံ.

၂၃၀. ဒုတိယပလာယိတဇာတကံ (၂-၈-၁၀)

၁၅၉. ဓဇမပရိမိတံ အနန္တပါရံ၊ ဒုပ္ပသဟံဓင်္ကေဟိ သာဂရံဝ [သာဂရမိဝ (သီ. သျာ. ပီ.)]၊

ဂိရိမိဝအနိလေန ဒုပ္ပသယှော [ဒုပ္ပသဟော (သီ. ပီ. က.)]၊ ဒုပ္ပသဟော အဟမဇ္ဇတာဒိသေန.

၁၆၀. မာ ဗာလိယံ ဝိလပိ [ဝိပ္ပလပိ (ဗဟူသု)] န ဟိဿ တာဒိသံ၊ ဝိဍယှသေ [ဝိဠယှသေ (သီ. ပီ.)] န ဟိ လဘသေ နိသေဓကံ၊

အာသဇ္ဇသိ ဂဇမိဝ ဧကစာရိနံ၊ ယော တံ ပဒါ နဠမိဝ ပေါထယိဿတီတိ.

ဒုတိယပလာယိတဇာတကံ ဒသမံ.

ကာသာဝဝဂ္ဂေါ အဋ္ဌမော.

တဿုဒ္ဒါနံ –

ဝရဝတ္ထဝစော ဒုမခီဏဖလံ၊ စတုရောဓမ္မဝရံ ပုရိသုတ္တမ၊

ဓင်္ကမဂဓာ စ တယောဂိရိနာမ၊ ဂဇဂ္ဂဝရော ဓဇဝရေန ဒသာတိ.