၇. ဗီရဏထမ္ဘဝဂ္ဂေါ
၂၁၁. သောမဒတ္တဇာတကံ (၂-၇-၁)
၁၂၁. အကာသိ ယောဂ္ဂံ ဓုဝမပ္ပမတ္တော၊ သံဝစ္ဆရံ ဗီရဏထမ္ဘကသ္မိံ၊
ဗျာကာသိ သညံ ပရိသံ ဝိဂယှ၊ န နိယျမော တာယတိ အပ္ပပညံ.
၁၂၂. ဒွယံ ယာစနကော တာတ၊ သောမဒတ္တ နိဂစ္ဆတိ၊
အလာဘံ ဓနလာဘံ ဝါ၊ ဧဝံ ဓမ္မာ ဟိ ယာစနာတိ.
သောမဒတ္တဇာတကံ ပဌမံ.
၂၁၂. ဥစ္ဆိဋ္ဌဘတ္တဇာတကံ (၂-၇-၂)
၁၂၃. အညော ဥပရိမော ဝဏ္ဏော၊ အညော ဝဏ္ဏော စ ဟေဋ္ဌိမော၊
ဗြာဟ္မဏီ တွေဝ ပုစ္ဆာမိ၊ ကိံ ဟေဋ္ဌာ ကိဉ္စ ဥပ္ပရိ.
၁၂၄. အဟံ နဋောသ္မိ ဘဒ္ဒန္တေ၊ ဘိက္ခကောသ္မိ ဣဓာဂတော၊
အယဉှိ ကောဋ္ဌမောတိဏ္ဏော၊ အယံ သော ယံ [တွံ (က.)] ဂဝေသသီတိ.
ဥစ္ဆိဋ္ဌဘတ္တဇာတကံ ဒုတိယံ.
၂၁၃. ဘရုဇာတကံ (၂-၇-၃)
၁၂၅. ဣသီနမန္တရံ ကတွာ၊ ဘရုရာဇာတိ [ကုရုရာဇာတိ (က.)] မေ သုတံ၊
ဥစ္ဆိန္နော သဟ ရဋ္ဌေဟိ [ရဋ္ဌေန (သီ. ပီ.)]၊ သရာဇာ ဝိဘဝင်္ဂတော.
၁၂၆. တသ္မာ ဟိ ဆန္ဒာဂမနံ၊ နပ္ပသံသန္တိ ပဏ္ဍိတာ၊
အဒုဋ္ဌစိတ္တော ဘာသေယျ၊ ဂိရံ သစ္စုပသံဟိတန္တိ.
ဘရုဇာတကံ [ကုရုရာတကံ (က.)] တတိယံ.
၂၁၄. ပုဏ္ဏနဒီဇာတကံ (၂-၇-၄)
၁၂၇. ပုဏ္ဏံ နဒိံ ယေန စ ပေယျမာဟု၊ ဇာတံ ယဝံ ယေန စ ဂုယှမာဟု၊
ဒူရံ ဂတံ ယေန စ အဝှယန္တိ၊ သော တျာဂတော [တျာဘတော (သျာ. က.) ပဟေဠိဂါထာဘာဝေါ မနသိ ကာတဗ္ဗော] ဟန္ဒ စ ဘုဉ္ဇ ဗြာဟ္မဏ.
၁၂၈. ယတော မံ သရတီ ရာဇာ၊ ဝါယသမ္ပိ ပဟေတဝေ၊
ဟံသာ ကောဉ္စာ မယူရာ စ [ဟံသကောဉ္စမယူရာနံ (က. အဋ္ဌ. ပါဌန္တရံ)]၊ အသတီယေဝ ပါပိယာတိ.
ပုဏ္ဏနဒီဇာတကံ စတုတ္ထံ.
၂၁၅. ကစ္ဆပဇာတကံ (၂-၇-၅)
၁၂၉. အဝဓီ ဝတ အတ္တာနံ၊ ကစ္ဆပေါ ဗျာဟရံ ဂိရံ [ကစ္ဆပေါဝ ပဗျာဟရံ (သျာ.)၊ ကစ္ဆပေါ သော ပဗျာဟရံ (က.)]၊
သုဂ္ဂဟီတသ္မိံ ကဋ္ဌသ္မိံ၊ ဝါစာယ သကိယာဝဓိ.
၁၃၀. ဧတမ္ပိ ဒိသွာ နရဝီရိယသေဋ္ဌ၊ ဝါစံ ပမုဉ္စေ ကုသလံ နာတိဝေလံ၊
ပဿသိ ဗဟုဘာဏေန၊ ကစ္ဆပံ ဗျသနံ ဂတန္တိ.
ကစ္ဆပဇာတကံ ပဉ္စမံ.
၂၁၆. မစ္ဆဇာတကံ (၂-၇-၆)
၁၃၁. န မာယမဂ္ဂိ တပတိ၊ န သူလော သာဓုတစ္ဆိတော၊
ယဉ္စ မံ မညတေ မစ္ဆီ၊ အညံ သော ရတိယာ ဂတော.
၁၃၂. သော မံ ဒဟတိ ရာဂဂ္ဂိ၊ စိတ္တံ စူပတပေတိ မံ၊
ဇာလိနော မုဉ္စထာယိရာ မံ၊ န ကာမေ ဟညတေ ကွစီတိ.
မစ္ဆဇာတကံ ဆဋ္ဌံ.
၂၁၇. သေဂ္ဂုဇာတကံ (၂-၇-၇)
၁၃၃. သဗ္ဗော လောကော အတ္တမနော အဟောသိ၊ အကောဝိဒါ ဂါမဓမ္မဿ သေဂ္ဂု၊
ကောမာရိ ကော နာမ [ကောမာရိကာ နာမ (က.)၊ ကောမာရိကော နာမ (သျာ. ပီ.)] တဝဇ္ဇ ဓမ္မော၊ ယံ တွံ ဂဟိတာ ပဝနေ ပရောဒသိ.
၁၃၄. ယော ဒုက္ခဖုဋ္ဌာယ ဘဝေယျ တာဏံ၊ သော မေ ပိတာ ဒုဗ္ဘိ ဝနေ ကရောတိ၊
သာ ကဿ ကန္ဒာမိ ဝနဿ မဇ္ဈေ၊ ယော တာယိတာ သော သဟသံ ကရောတီတိ.
သေဂ္ဂုဇာတကံ သတ္တမံ.
၂၁၈. ကူဋဝါဏိဇဇာတကံ (၂-၇-၈)
၁၃၅. သဌဿ သာဌေယျမိဒံ သုစိန္တိတံ၊ ပစ္စောဍ္ဍိတံ ပဋိကူဋဿ ကူဋံ၊
ဖာလဉ္စေ ခါဒေယျုံ [အဒေယျုံ (သီ. ပီ.)] မူသိကာ၊ ကသ္မာ ကုမာရံ ကုလလာ န [နော (သီ. သျာ. ပီ.)] ဟရေယျုံ.
၁၃၆. ကူဋဿ ဟိ သန္တိ [သန္တီဓ (က.)] ကူဋကူဋာ၊ ဘဝတိ [ဘဝန္တိ (က.)] စာပိ နိကတိနော နိကတျာ၊
ဒေဟိ ပုတ္တနဋ္ဌ ဖာလနဋ္ဌဿ ဖာလံ၊ မာ တေ ပုတ္တမဟာသိ ဖာလနဋ္ဌောတိ.
ကူဋဝါဏိဇဇာတကံ အဋ္ဌမံ.
၂၁၉. ဂရဟိတဇာတကံ (၂-၇-၉)
၁၃၇. ဟိရညံ မေ သုဝဏ္ဏံ မေ၊ ဧသာ ရတ္တိံ ဒိဝါ ကထာ၊
ဒုမ္မေဓာနံ မနုဿာနံ၊ အရိယဓမ္မံ အပဿတံ.
၁၃၈. ဒွေ ဒွေ ဂဟပတယော ဂေဟေ၊ ဧကော တတ္ထ အမဿုကော၊
လမ္ဗတ္ထနော ဝေဏိကတော၊ အထော အင်္ကိတကဏ္ဏကော၊
ကီတော ဓနေန ဗဟုနာ၊ သော တံ ဝိတုဒတေ ဇနန္တိ.
ဂရဟိတဇာတကံ နဝမံ.
၂၂၀. ဓမ္မဓဇဇာတကံ (၂-၇-၁၀)
၁၃၉. သုခံ ဇီဝိတရူပေါသိ၊ ရဋ္ဌာ ဝိဝနမာဂတော၊
သော ဧကကော ရုက္ခမူလေ [အရညသ္မိံ (သီ. သျာ. ပီ.)]၊ ကပဏော ဝိယ ဈာယသိ.
၁၄၀. သုခံ ဇီဝိတရူပေါသ္မိ၊ ရဋ္ဌာ ဝိဝနမာဂတော၊
သော ဧကကော ရုက္ခမူလေ၊ ကပဏော ဝိယ ဈာယာမိ၊
သတံ ဓမ္မံ အနုဿရံတိ.
ဓမ္မဓဇဇာတကံ ဒသမံ.
ဗီရဏထမ္ဘဝဂ္ဂေါ သတ္တမော.
တဿုဒ္ဒါနံ –
အထ ဗီရဏထမ္ဘဝရော စ နဋော၊ ဘရုရာဇဝရုတ္တမပုဏ္ဏနဒီ၊
ဗဟုဘာဏိ အဂ္ဂိပဝနေ မူသိကာ၊ သဟလမ္ဗတ္ထနော ကပဏေန ဒသာတိ.