၆. နတံဒဠှဝဂ္ဂေါ
၂၀၁. ဗန္ဓနာဂါရဇာတကံ (၂-၆-၁)
၁၀၁. န တံ ဒဠှံ ဗန္ဓနမာဟု ဓီရာ၊ ယဒါယသံ ဒါရုဇပဗ္ဗဇဉ္စ [ဗဗ္ဗဇဉ္စ (သီ.)]၊
သာရတ္တရတ္တာ မဏိကုဏ္ဍလေသု၊ ပုတ္တေသု ဒါရေသု စ ယာ အပေက္ခာ.
၁၀၂. ဧတံ ဒဠှံ ဗန္ဓနမာဟု ဓီရာ၊ ဩဟာရိနံ သိထိလံ ဒုပ္ပမုဉ္စံ၊
ဧတမ္ပိ ဆေတွာန ဝဇန္တိ ဓီရာ၊ အနပေက္ခိနော ကာမသုခံ ပဟာယာတိ.
ဗန္ဓနာဂါရဇာတကံ ပဌမံ.
၂၀၂. ကေဠိသီလဇာတကံ (၂-၆-၂)
၁၀၃. ဟံသာ ကောဉ္စာ မယူရာ စ၊ ဟတ္ထယော [ဟတ္ထိနော (သီ.)၊ ဟတ္ထိယော (သျာ. ပီ.)] ပသဒါ မိဂါ၊
သဗ္ဗေ သီဟဿ ဘာယန္တိ၊ နတ္ထိ ကာယသ္မိ တုလျတာ.
၁၀၄. ဧဝမေဝ မနုဿေသု၊ ဒဟရော စေပိ ပညဝါ၊
သော ဟိ တတ္ထ မဟာ ဟောတိ၊ နေဝ ဗာလော သရီရဝါတိ.
ကေဠိသီလဇာတကံ ဒုတိယံ.
၂၀၃. ခဏ္ဍဇာတကံ (၂-၆-၃)
၁၀၅. ဝိရူပက္ခေဟိ မေ မေတ္တံ၊ မေတ္တံ ဧရာပထေဟိ မေ၊
ဆဗျာပုတ္တေဟိ မေ မေတ္တံ၊ မေတ္တံ ကဏှာဂေါတမကေဟိ စ.
အပါဒကေဟိ မေ မေတ္တံ၊ မေတ္တံ ဒွိပါဒကေဟိ မေ၊
စတုပ္ပဒေဟိ မေ မေတ္တံ၊ မေတ္တံ ဗဟုပ္ပဒေဟိ မေ.
မာ မံ အပါဒကော ဟိံသိ၊ မာ မံ ဟိံသိ ဒွိပါဒကော၊
မာ မံ စတုပ္ပဒေါ ဟိံသိ၊ မာ မံ ဟိံသိ ဗဟုပ္ပဒေါ.
သဗ္ဗေ သတ္တာ သဗ္ဗေ ပါဏာ၊ သဗ္ဗေ ဘူတာ စ ကေဝလာ၊
သဗ္ဗေ ဘဒြာနိ ပဿန္တု၊ မာ ကဉ္စိ [ကိဉ္စိ (သျာ. က.)] ပါပမာဂမာ.
၁၀၆. အပ္ပမာဏော ဗုဒ္ဓေါ၊ အပ္ပမာဏော ဓမ္မော၊
အပ္ပမာဏော သံဃော၊ ပမာဏဝန္တာနိ သရီသပါနိ [သိရိသပါနိ (သီ. သျာ. ပီ.)]၊
အဟိဝိစ္ဆိကသတပဒီ၊ ဥဏ္ဏနာဘိ [ဥဏ္ဏာနာဘိ (သီ. သျာ. ပီ.)] သရဗူမူသိကာ.
ကတာ မေ ရက္ခာ ကတာ မေ ပရိတ္တာ၊ ပဋိက္ကမန္တု ဘူတာနိ၊
သောဟံ နမော ဘဂဝတော၊ နမော သတ္တန္နံ သမ္မာသမ္ဗုဒ္ဓါနန္တိ.
ခဏ္ဍဇာတကံ တတိယံ.
၂၀၄. ဝီရကဇာတကံ (၂-၆-၄)
၁၀၇. အပိ ဝီရက ပဿေသိ၊ သကုဏံ မဉ္ဇုဘာဏကံ၊
မယူရဂီဝသင်္ကာသံ၊ ပတိံ မယှံ သဝိဋ္ဌကံ.
၁၀၈. ဥဒကထလစရဿ ပက္ခိနော၊ နိစ္စံ အာမကမစ္ဆဘောဇိနော၊
တဿာနုကရံ သဝိဋ္ဌကော၊ သေဝါလေ ပလိဂုဏ္ဌိတော မတောတိ.
ဝီရကဇာတကံ စတုတ္ထံ.
၂၀၅. ဂင်္ဂေယျဇာတကံ (၂-၆-၅)
၁၀၉. သောဘတိ မစ္ဆော ဂင်္ဂေယျော၊ အထော သောဘတိ ယာမုနော [သောဘန္တိ မစ္ဆာ ဂင်္ဂေယျာ၊ အထော သောဘန္တိ ယာမုနာ (သျာ. ပီ.)]၊
စတုပ္ပဒေါယံ ပုရိသော၊ နိဂြောဓပရိမဏ္ဍလော၊
ဤသကာယတ [ဤသမာယတ (က.)] ဂီဝေါ စ၊ သဗ္ဗေဝ အတိရောစတိ.
၁၁၀. ယံ ပုစ္ဆိတော န တံ အက္ခာသိ [အက္ခာ (သီ. သျာ. ပီ.)]၊ အညံ အက္ခာသိ [အက္ခာတိ (သျာ. ပီ.)] ပုစ္ဆိတော၊
အတ္တပ္ပသံသကော ပေါသော၊ နာယံ အသ္မာက ရုစ္စတီတိ.
ဂင်္ဂေယျဇာတကံ ပဉ္စမံ.
၂၀၆. ကုရုင်္ဂမိဂဇာတကံ (၂-၆-၆)
၁၁၁. ဣင်္ဃ ဝဒ္ဓမယံ [ဝဒ္ဓမယံ (သီ. သျာ. ပီ.)] ပါသံ၊ ဆိန္ဒ ဒန္တေဟိ ကစ္ဆပ၊
အဟံ တထာ ကရိဿာမိ၊ ယထာ နေဟိတိ လုဒ္ဒကော.
၁၁၂. ကစ္ဆပေါ ပါဝိသီ ဝါရိံ၊ ကုရုင်္ဂေါ ပါဝိသီ ဝနံ၊
သတပတ္တော ဒုမဂ္ဂမှာ၊ ဒူရေ ပုတ္တေ အပါနယီတိ.
ကုရုင်္ဂမိဂဇာတကံ ဆဋ္ဌံ.
၂၀၇. အဿကဇာတကံ (၂-၆-၇)
၁၁၃. အယမဿကရာဇေန၊ ဒေသော ဝိစရိတော မယာ၊
အနုကာမယ ကာမေန [အနုကာမယဝနုကာမေန (သီ. ပီ.)]၊ ပိယေန ပတိနာ သဟ.
၁၁၄. နဝေန သုခဒုက္ခေန၊ ပေါရာဏံ အပိဓီယတိ [အပိထီယတိ (သီ. ပီ.)၊ အပိထိယျတိ (သျာ.)]၊
တသ္မာ အဿကရညာဝ၊ ကီဋော ပိယတရော မမာတိ.
အဿကဇာတကံ သတ္တမံ.
၂၀၈. သုသုမာရဇာတကံ (၂-၆-၈)
၁၁၅. အလံ မေတေဟိ အမ္ဗေဟိ၊ ဇမ္ဗူဟိ ပနသေဟိ စ၊
ယာနိ ပါရံ သမုဒ္ဒဿ၊ ဝရံ မယှံ ဥဒုမ္ဗရော.
၁၁၆. မဟတီ ဝတ တေ ဗောန္ဒိ၊ န စ ပညာ တဒူပိကာ၊
သုသုမာရ [သုံသုမာရ (သီ. သျာ. ပီ.)] ဝဉ္စိတော မေသိ၊ ဂစ္ဆ ဒါနိ ယထာသုခန္တိ.
သုသုမာရဇာတကံ အဋ္ဌမံ.
၂၀၉. ကုက္ကုဋဇာတကံ (၂-၆-၉)
၁၁၇. ဒိဋ္ဌာ မယာ ဝနေ ရုက္ခာ၊ အဿကဏ္ဏာ ဝိဘီဋကာ [ဝိဘေဒကာ (သျာ. က.)]၊
န တာနိ ဧဝံ သက္ကန္တိ၊ ယထာ တွံ ရုက္ခ သက္ကသိ.
၁၁၈. ပုရာဏကုက္ကုဋော [ကက္ကရော (သီ. သျာ. ပီ.)] အယံ၊ ဘေတွာ ပဉ္ဇရမာဂတော၊
ကုသလော ဝါဠပါသာနံ၊ အပက္ကမတိ ဘာသတီတိ.
ကုက္ကုဋ [ကက္ကရ (သီ. သျာ. ပီ.)] ဇာတကံ နဝမံ.
၂၁၀. ကန္ဒဂလကဇာတကံ (၂-၆-၁၀)
၁၁၉. အမ္ဘော ကော နာမ ယံ ရုက္ခော၊ သိန္နပတ္တော [သီနပတ္တော (သီ. ပီ.)] သကဏ္ဋကော၊
ယတ္ထ ဧကပ္ပဟာရေန၊ ဥတ္တမင်္ဂံ ဝိဘိဇ္ဇိတံ [ဝိသာဋိကံ (သီ. သျာ. ပီ.)၊ ဝိဃာဋိတံ (သီ. နိယျ)].
၁၂၀. အစာရိ ဝတာယံ ဝိတုဒံ ဝနာနိ၊ ကဋ္ဌင်္ဂရုက္ခေသု အသာရကေသု၊
အထာသဒါ ခဒိရံ ဇာတသာရံ [ဇာတိသာရံ (က.)]၊ ယတ္ထဗ္ဘိဒါ ဂရုဠော ဥတ္တမင်္ဂန္တိ.
ကန္ဒဂလက [ကန္ဒလက (က.)] ဇာတကံ ဒသမံ.
နတံဒဠှဝဂ္ဂေါ ဆဋ္ဌော.
တဿုဒ္ဒါနံ –
ဒဠှဗန္ဓန ဟံသဝရော စ ပုန၊ ဝိရူပက္ခ သဝိဋ္ဌက မစ္ဆဝရော၊
သကုရုင်္ဂ သအဿက အမ္ဗဝရော၊ ပုန ကုက္ကုဋကော ဂရုဠေန ဒသာတိ.